”ნაციონალური მოძრაობის” ქმედებები არასდროს ყოფილა სამაგალითო, არც მაშინ, როდესაც იყავით ხელისუფლებაში, არც ახლა, როდესაც ხართ ოპოზიციაში, მაგრამ მაინც უნდა ვთქვათ, რომ სახელმწიფო მნიშვნელობის საკითხებს პასუხისმგებლიანი ხალხი ასე არ უნდა უდგებოდეს, - ასე უპასუხა ”ქართული ოცნების” დეპუტატმა ზაზა გაბუნიამ პარლამენტში სიტყვით გამოსვლისას, ”ნაციონალური მოძრაობის” ინიციატივას, რომელიც ”საქართველოს ტერიტორიული მთლიანობისთვის მებრძოლი სამხედრო მოსამსახურების საიდუმლო ინფორმაციის გაცემისა და მათი რუსეთის ფედერაციაში ექსტრადიციის ხელშეწყობის დანაშაულებრივი ქმდებების ფაქტებზე” სპეციალური საგამოძიებო კომისიის შექმნას ითვალისწინებს.
ინიციატივა დეპუტატებს ”ნაციონალური მოძრაობის” წევრმა სალომე სამადაშვილმა წარუდგინა. ამ კონტექსტში ყურადღება ვიცე-პოლკოვნიკ გია ცერცვაძის საკითხზე გამახვილდა. ”ნაციონალური მოძრაობის” წარმომადგენლები ირწმუნებიან, რომ საქართველოს სახელმწიფო ორგანოებმა ცერცვაძის პერსონალური მონაცემები რუსეთის ფედერაციას გადასცა.
როგორც ზაზა გაბუნიამ აღნიშნა, სამხედრო მოსამსახურეების შესახებ საიდუმლო ინფორმაცია არ გადაეცემა არავის და ”ნაციონალური მოძრაობის” მხრიდან არის მცდელობა, შეცდომაში შეიყვანოს საზოგადოება.
”ნაციონალური მოძრაობა” არ ისვენებს. არ ისვენებს ოღონდ არა ჩვენი ქვეყნის ინტერესების დაცვისთვის, არამედ პირიქით, ჩვენი ქვეყნის ეროვნული ინტერესების დისკრედიტაციისთვის ყველაფერს აკეთებს. განცხადებები და ფორმულირება, რომელსაც ჩვენ ვხედავთ, არის ცალსახად იერიშის მიტანის მცდელობა ჩვენი ქვეყნის ეროვნულ ინტერესებზე.
გია ცერცვაძის უსაფრთხოებისთვის ყველაფერი გააკეთა სახელმწიფომ. ამ საქმეში ჩართული იყო ქვეყნის ყველა კომპეტენტური ორგანო შიგნით და საქართველოს ქვეყნის გარეთ საელჩო. ასე უბრალოდ გადახაზვა წითელი ხაზით ამ საკითხის, არის უმოწყალო სპეკულირება თემასთან მიმართებით.
ვფიქრობ, დადგენილების პროექტი არ უნდა გავიზიაროთ. ”ნაციონალური მოძრაობის” მიერ ფორმულირებული ტექსტი ცალსახად შეიცავს ცილისმწამებლურ პოზიციას სახელმწიფოს მიმართ. ცალსახად ცილისწამებაა მოცემული დადგენილების პროექტის ფორმულირებაში. სამხედრო მოსამსახურეების შესახებ საიდუმლო ინფორმაცია არ გადაეცემა არავის. ეს არის მორიგი უპასუხისმგებლობა ”ნაციონალური მოძრაობის” მხრიდან, როცა ძალიან მგრძნობიარე საკითხით მანიპულაციის გზით, თქვენ გსურთ სამხედრო მომსამსახურეების, მათი ოჯახის წევრების და არაინფორმირებული საზოგადოების შეცდომაში შეყვანა.
”ნაციონალური მოძრაობის” ქმედებები არასდროს ყოფილა სამაგლითო, არც მაშინ, როდესაც იყავით ხელისუფლებაში, არც ახლა, როდესაც ხართ ოპოზიციაში, მაგრამ მაინც უნდა ვთქვათ, სახელმწიფო მნიშვნელობის საკითხებს პასუხისმგებლიანი ხალხი ასე არ უნდა უდგებოდეს.
ერთი არასპეკულანტური არგუმენტი მაინც გვითხარით, რომლითაც დადასტურდება იმ ცილისმწამებლური ტექსტის მართებულობა, რომელიც დადგენილების პროექტში გაქვს მოცემული”, - მიმართა ზაზა გაბუნიამ სალომე სამადაშვილს.
