მთავრობამ დავით ბაქრაძისთვის დაცვის დანიშვნის გადაწყვეტილება შესაძლოა იმ საფუძვლით მიიღო, რომ მის სიცოცხლეს ან ჯანმრთელობას რაიმე საფრთხე ემუქრება, - ამის შესახებ პარლამენტის საპროცედურო საკითხთა კომიტეტის თავმჯდომარე გიროგი კახიანმა, საპარლამენტო უმცირესობის ლიდერის, დავით ბაქრაძისთვის სახელმწიფო დაცვის დანიშვნის საკითხის კომენტირებისას განაცხადა.

როგორც კახიანმა აღნიშნა, ბაქრაძეს სახელმწიფო დაცვა დაენიშნა როგორც რიგით დეპუტატს და არა როგორც პარლამენტის ყოფილ თავმჯდომარეს. "რეგლამენტის შესაბამისად, პარლამენტის ყოფილ თავმჯდომარეს მომდევნო ერთი მოწვევის პარლამენტის უფლებამოსილების ვადაში ეკუთვნის სახელმწიფო დაცვა. ვინაიდან დავით ბაქრაძე იყო მე-7 მოწვევის პარლამენტის თავმჯდომარე, მე-8 მოწვევის პარლამენტის უფლებამოსილების ვადაში მას ისედაც ეკუთვნოდა სახელმწიფო დაცვა. ვადა გავიდა ნოემბერში. როგორც ჩანს ამის შემდეგ ისევ მიზანშეწონილად მიიჩნიეს, ერთი წლით მას კიდევ დაენიშნოს პერსონალური დაცვა, თუმცა ამჯერად მას დაცვა დაენიშნა როგორც პარლამენტის წევრს. ნებისმიერ პარლამენტის წევრს აქვა უფლება - თუ მის სიცოცხლეს ან ჯანმრთელობას რაიმე საფრთხე ემუქრება, მიმართოს შესაბამის სამსახურებს და შემდეგ უკვე მთავრობა იმსჯელებს იმაზე, დაენიშნოს თუ არა მას დაცვა. ასეთ შემთხვევასთან გვაქვს აქ საქმე. კონკრეტულად რა მოხდა, ბატონმა დავითმა თავად მიმართა აღნიშნულ სამსახურს, თუ როგორ იყო, დეტალები ჩემთვის უცნობია", - განაცხადა გიორგი კახიანმა.

საპროცედურო საკითხთა კომიტეტის თავმჯდომარე არ გამორიცხავს, რომ დავით ბაქრაძისთვის დაცვის დანიშვნის გადაწყვეტილება თავად სახელმწიფო დაცვის სპეციალურმა სამსახურმა, გარკვეული საფრთხეებიის შეფასების შედეგად გადაწყვიტა. "ფაქტია, რომ მთავრობამ მიიღო გადაწყვეტილება, ერთი წლის ვადით, იმ საფუძვლით, რომ შეიძლება ბატონი დავითის სიცოცხლეს ან ჯანმრთელობას რაიმე საფრთხე დაემუქროს, დაუნიშნა პერსონალური დაცვა", - განაცხადა კახიანმა.