კოალიცია ,,ქართული ოცნების” ერთ-ერთი ლიდერი ირაკლი ალასანია გორში, 21 მაისს, კინოთეატრ ,,გამარჯვებაში” ადგილობრივ მხარდამჭერებს შეხვდა. შენობაში შესვლამდე ალასანიას წერილი ქარელში მცხოვრებმა ლია რაზმაძემ (როგორც თავად ამბობს, ვახტანგ რაზმაძის შვილიშვილია) გადასცა. ქალბატონს 10 წლის შვილი ავად ჰყავს. მისი თქმით, დახმარება თვით პრეზიდენტმაც არ გაუწია და წერილი ბიძინა ივანიშვილთან გაატანა.
ალასანია წერილის განხილვას დაპირდა. მან შეხვედრაზე კი სოფლის მეურნეობის განვითარების გეგმებზე ისაუბრა. ალასანია გორელებს დაპირდა, რომ ხელისუფლებაში მოსვლის შემთხვევაში მიწის სერტიფიკაცია მოხდება. ,,შეიქმნება მიწის სამართლებრივი და იურიდიული ბაზა” – აღნიშნა ალასანიამ. ასევე პოლიციელებს შეუთვალა, რომ ხელისუფლებაში მოსვლის შემდეგ პროფესიონალები ადგილზე დარჩებიან. საზოგადოებრივი მოძრაობის ექსპერტმა გია ვოლსკიმ აღნიშნა, რომ მომავალი კვირიდან ქართული ოცნების ლიდერები ევროპის ქვეყნებში გავლენ და რეალურ ინფორმაციას გაიტანენ.
შეხვედრა ერთ საათს გაგრძელდა.
