ტერორისტი, რომელმაც იერუსალიმში ტერორისტული აქტი განახორციელა, ე.წ. „ისლამური სახელმწიფოს“ მხარდამჭერი იყო, - განაცხადა ისრაელის პრემიერ-მინისტრმა ბენიამინ ნეთანიაჰუმ.
აღნიშნული კომენტარი ბენიამინ ნეთანიაჰუმ ტერორისტული აქტის ადგილზე გააკეთა, სადაც თავდაცვის მინისტრთან ავიგდორ ლიბერმანთან ერთად მივიდა.
„ჩვენ ვიცით თავდამსხმელის ვინაობა და ყველა ნიშნების მიხედვით, ის „ისლამური სახელმწიფოს“ მხარდამჭერია“, - განაცხადა ბენიამინ ნეთანიაჰუმ.
მისივე თქმით, შეიძლება კავშირი არსებობდეს იერუსალიმში მომხდარ თავდასხმასა და საფრანგეთსა და ბერლინში მომხდარ მსგავს თავდასხმებს შორის.
„ჩვენ ვებრძვით ამ ჭირს და ჩვენ დავამარცხებთ მას“, - დასძინა ისრაელის პრემიერ-მინისტრმა.
გუშინ იერუსალიმში მომხდარი ტერორისტული აქტის შედეგად 4 ჯარისკაცი გარდაიცვალა, 15-მდე ადამიანი კი დაშავდა. იერუსალიმში სატვირთო ავტომანქანა ქვეითად მოსიარულეებს დაეჯახა.
