პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი პარლამენტის ბიუროს ხვალინდელ სხდომაზე ნდობის ჯგუფის ფორმირების თაობაზე განცხადებას გააკეთებს.
როგორც სესიაშვილმა ”ინტერპრესნიუსს” განუცხადა, ბიუროს ხვალინდელ სხდომაზე შესაბამის საპარლამენტო სუბიექტებს ნდობის ჯგუფში საკუთარი კანდიდატურების წარდგენასთან დაკავშირებით მიმართავს.
”უნდა მოხდეს ნდობის ჯგუფის ფორმირება. მაქვს სურვილი, თუკი დროში მოვასწრებთ, ერთი სხდომა მიმდინარე წელსაც ჩავატაროთ. საქმე ითხოვს და საჭიროა, ჩატარდეს ნდობის ჯგუფის სხდომა. ასე რომ, სასურველია, ჯგუფი დროზე შეიკრიბოს”, - განუცხადა ”ინტერპრესნიუსს” ირაკლი სესიაშვილმა.
ამასთან, თავდაცვისა და უშიშროების კომიტეტის თავმჯდომარე არ ასახელებს, თუ ვინ არიან ნდობის ჯგუფის შემადგენლობაში წარსადგენი კანდიდატები როგორც უმრავლესობის, ასევე საპარლამენტო ოპოზიციის მხრიდან. სესიაშვილის ინფორმაციით, როგორც საკუთრივ უმრავლესობის, ასევე მაჟორიტარების კვოტით წარსადგენ კანდიდატურებთან დაკავშირებით გუნდის შიგნით კონსულტაციები გაიმართება და ამის შემდეგ იქნება გადაწყვეტილება მიღებული.
”ჩვენ ვცდილობთ ორი ფაქტორი გავითვალისწინოთ - ერთი, ეს არის მაღალი პოლიტიკური პასუხისმგებლობა და ასევე, პროფესიონალიზმი. ამ პრინციპების გათვალისწინებით, უმრავლესობაში ვიმსჯელებთ, ვინ შეიძლება შევიდეს ნდობის ჯგუფში”, - აღნიშნა სესიაშვილმა.
თავდაცვისა და უშიშროების კომიტეტის თავმჯდომარე ირწმუნება, რომ მისთვის უცნობია, კონკრეტულად რომელ დეპუტატებს წარადგენს ნდობის ჯგუფში უმცირესობა და ე.წ. დამოუკიდებელი ფრაქცია ”საქართველოს პატრიოტები”. ”ინტერპრესნიუსის” ინფორმაციით კი, ე.წ. დამოუკიდებელი ფრაქცია ”საქართველოს პატრიოტებიდან” ნდობის ჯგუფში სავარაუდოდ, ვიცე-სპიკერი ირმა ინაშვილი შევა, ხოლო ”ნაციონალური მოძრაობა” დეპუტატ ირაკლი აბესაძეს წარადგენს.
პარლამენტის თავდაცვისა და უშიშროების კომიტეტში ნდობის ჯგუფი აღმასრულებელი ხელისუფლების ორგანოების სპეციალური პროგრამებისა და საიდუმლო საქმიანობის საბიუჯეტო კონტროლის მიზნით იქმნება.
ნდობის ჯგუფი ხუთი წევრისგან შედგება, რომელთაგან ერთი არის პარლამენტის თავდაცვისა და უშიშროების კომიტეტის თავმჯდომარე, ერთი – უმრავლესობის წევრი, ერთი – მაჟორიტარული წესით არჩეული დეპუტატების წარმომადგენელი, ერთი – უმცირესობის წევრი, ხოლო ერთი – უმრავლესობისა და უმცირესობის გარეთ დარჩენილ პარლამენტის წევრთაგან მეტი მხარდაჭერის მქონე დეპუტატი.
წინა მოწვევის პარლამენტში განხორციელებული საკანონმდებლო ცვლილებების საფუძველზე, ნდობის ჯგუფში წარდგენილ კანდიდატებს პარლამენტში, ხმათა უმრავლესობით არჩევა აღარ სჭირდება.
ნდობის ჯგუფის შემადგენლობას პარლამენტი ცნობად იღებს.
