საქართველოს თავისუფალი სტილით მოჭიდავე ბექა ლომთაძე (61) უნგრეთის დედაქალაქ ბუდაპეშტში მიმდინარე მსოფლიო ჩემპიონატზე ვერცხლის მედალს დასჯერდა. პლანეტის პირველობაზე, რომელიც არაოლიმპიურ წონით კატეგორიებში ტარდება, ქართველი ფალავანი ოქროს მედლისთვის შეხვედრაში ამერიკელ ლოგან სტიებერთან დამარცხდა - 4:8

ლომთაძემ ტურნირზე სასტარტო შეხვედრაში წმინდად მოუგო ყირგიზ ადილეტ მამატაევს, შემდეგ კი მოლდაველ ანდრეი პერპელიტას 5-2 სძლია. 1/4 ფინალში ბექამ ქულების აშკარა უპირატესობით, 12-2 საფრანგეთის წარმომადგენელ იური სიემაკინს აჯობა, ნახევარფინალში კი აზერიბაიჯანელი ახმედნაბი გვარზატილოვი უშეღავათო ბრძოლაში 12-11 დაამარცხა.

ტურნირზე ასევე იასპარეზა ბერძნულ-რომაული სტილით მოჭიდავე მინდია წულუკიძემაც (71), თუმცა 1/8-ფინალში აზერიბაჯანელ ჰასან ალიევთან დამარცხდა - 1-3.

ოლიმპიურ წელიწადში მსოფლიოს ჩემპიონატები არ ტარდება, ოლიმპიურ თამაშებზე მონაწილეობა კი თითოეულ სტილში მხოლოდ ექვსი წონითი კატეგორიის წარმომადგენლებს შეუძლიათ. დარჩენილი ორი არაოლიმპიური წონითი კატეგორიებისათვის კი UWW-მ დამატებითი მსოფლიოს ჩემპიონატის ჩატარება გადაწყვიტა.

11 დეკემბერს ბუდაპეშტში საქართველოს ნაკრებიდან, თავისუფალი სტილით მოჭიდავე დავით ტლაშაძე (70) იასპარეზებს, ბერძნულ-რომაულში კი ნიკოლო კელასოვი (80) გამოვა.