მე არ ვფიქრობ, რომ ვიქტორ დოლიძეს პროფესიონალიზმი დაუფასეს და ამიტომ გახდა მინისტრი, - ამის შესახებ თავდაცვის ყოფილმა მინისტრმა, ”რესპუბლიკური პარტიის” ყოფილმა წევრმა თინა ხიდაშელმა, ”პალიტრანიუსის” გადაცემაში ”360 გრადუსი” განაცხადა. ხიდაშელი მმართველი პარტიის წევრთა განცხადებასაც გამოეხმაურა, სადაც უმრავლესობის წარმომადგენლები ვიქტორ დოლიძის წარდგენას დემოკრატიულ მმართველობად აფასებენ. ხიდაშელის თქმით, ეს ყველაფერი დემოკრატიის უკუპროპორციულია.
”მე არ ვფიქრობ, რომ ვიქტორ დოლიძეს პროფესიონალიზმი დაუფასეს და ამიტომ გახდა მინისტრი. სავარაუდოდ, დაუფასეს ის გადაწყვეტილება, რომელიც ჩვენ ყველამ ვნახეთ სულ ცოტა ხნის წინ. პროფერსიონალი ძალიან ბევრია ამ ქვეყანაში, მაგრამ პოლიტიკური ეჭვიანობა და მოშურნეობა ძალიან მაღალი დოზით არის წარმოდგენილი ამ ხელისუფლებაში. მოვისმინე უმრავლესობის წარმომადგენელთა კომენტარები, რომლებიც ამბობენ - ”ვიკა დოლიძე, რომ მინისტრი გახდა, ადასტურებს, როგორი დემოკრატიუილი მთავრობა ვართო”, ძალიან სასაცილოა. პირიქით, საპირისპიროს ასაბუთებს ეს ფაქტი. გიგლა აგულაშვილთან მიმართებით იგივე აზრი არ მაქვს, რადგან ის მთავრობაში სხვა დროს დარჩა, სხვა ვითარებასა და რეალობაში. ვიკამ პარტიასთან ერთად გადაიტანა ეს არჩევნები, პარტიასთან ერთად დამარცხდა ამ არჩევნებზე, მან შუა ბრძოლაში არ მიატოვა საკუთარი გუნდი, მიუხედავად იმისა, რომ სავარაუდოდ, ის ამ გადაწყვეტილებაზე უკვე ფიქრობდა. მან მაინც არ მიატოვა გუნდი, განსხვავებით გიგლასგან“, - განაცხადა თინა ხიდაშელმა.
