ტრამპს რუსეთის კრიტიკის, მოკავშირეების მხარდაჭერისკენ მოუწოდებენ, - ამ სათაურით ავრცელებს ”ამერიკის ხმის” ქართული რედაქცია სტატიას, რომელშიც საუბარია რუსეთ-ამერიკის ურთიერთობებზე.
სტატიაში ამერიკის სენატის საგარეო ურთიერთობათა კომიტეტის დემოკრატ სენატორის ბენ კარდინის ინტერვიუა, სადაც ის ამბობს, რომ რუსეთს ამერიკამ მკაცრი სიგნალი უნდა გაუგზავნოს. ”პუტინის რუსეთი, წესებზე დაფუძნებულ საერთაშორისო სისტემას უგულებელყოფს, არღვევს საკუთარი მოქალაქეების უფლებებს და ძალაუფლების კონსოლიდაციას ახდენს. ის სასიკვდილოდ იმეტებს უკრაინელებს, სირიელებს, აგრესიას აგრძელებს საქართველოში, ჩაერია ამერიკის საარჩევნო პროცესში - ყველაფერ ამისთვის ჩვენ მას მკაცრი სიგნალი უნდა გავუგზავნოთ და ვთქვათ, რომ ამ ნაბიჯებს შედეგი მოჰყვება“, - განაცხადა ამერიკის სენატის საგარეო ურთიერთობათა კომიტეტის გავლენიანმა დემოკრატმა სენატორმა ბენ კარდინმა.
მან დასძინა, რომ ამერიკის კონგრესის დიდი ნაწილი შეაშფოთა კანდიდატ დონალდ ტრამპის რუსეთთან შემრიგებლურმა განცხადებებმა. მან მოუწოდა პრეზიდენტ ტრამპს, კარგად გააცნობიეროს ვინ არის ამერიკის მტერი, მოკავშირეებს კი გვერდში დაუდგეს რუსეთის აგრესიისგან დასაცავად.
"იმედი მაქვს, რომ პრეზიდენტი ტრამპი, როცა ის რუსეთის მიმართ პოლიტიკის შემუშავებას დაიწყებს, მოუსმენს ჩვენი დაზვერვისა და უშიშროების სამსახურებს. რუსეთი ჩვენი მტერია. ამ აზრს სენატში წამყვანი დემოკრატები და რესპუბლიკელები იზიარებენ, პირობას გაძლევთ, ვიმუშავებ პრეზიდენტის ადმინისტრაციასთან, მაგრამ მე მის პოლიტიკას გავაკონტროლებ და თუ ეს პოლიტიკა ჩვენს ღირებულებებში არ ჯდება, ხმასაც ამოვიღებ", - განაცხადა ბენ კარდინმა.
”დონალდ ტრამპის მომავალი ადმინისტრაციის საგარეო პოლიტიკის შეფასება უჭირს უილიამ კორტნის, ამერიკის ყოფილ ელჩს საქართველოში და ამჟამად, ვაშინგტონში რენდის კორპორაციის ექსპერტს. ის დარწმუნებულია, რომ ჩართულობა რუსეთთან იქნება, სწორედ არსებული რთული საკითხების გადასაწყვეტად.
უილიამ კორტნი: "რთულია წინასწარ ითქვას, როგორი იქნება პრეზიდენტის დამოკიდებულება ნატოს პარტნიორებთან, რუსეთთან ან კავკასიის ქვეყნებთან. მნიშვნელოვანია მოსკოვთან ვისაუბროთ უკრაინის, სირიის, კავკასიაში მიმდინარე საკითხებზე, ასევე კიბერ უსაფრთხოებაზე, ამერიკის პოლიტიკურ სისტემაში-არჩევნებში-რუსეთის ჩარევის ფაქტებზე, თუმცა კონკრეტული პოლიტიკის წინასწარ განსაზღვრა, ჩემთვის რთულია. ვვარაუდობ, რომ როგორც ყველა წინა ადმინისტრაცია-ის რადიკალურად არ შეცვლის მთავარ მიმართულებებს", -ნათქვამია სტატიაში.
ამასთან, სტატიაში აღნიშნულია, რომ შეერთებული შტატების მომავალი პრეზიდენტის ინაუგურაცია 20 იანვარს შედგება. მანამდე, კი არჩეული პრეზიდენტი ადმინისტრაციის დაკომპლექტებას ახდენს. ექსპერტების აზრით, ის, თუ ვის შეარჩევს იგი წამყვან პოსტებზე, დიდწილად განსაზღვრავს პრეზიდენტის მიდგომას ამა თუ იმ საკითხში.
