მიზანშეწონილია, თუკი გიორგი კვირიკაშვილი პარლამენტის წევრის უფლებამოსილებას და პრემიერ-მინისტრის მოვალეობას ერთდროულად არ შეასრულებს, - ამის შესახებ ”ინტერპრესნიუსს” ორგანიზაცია ”საერთაშორისო გამჭვირვალობის” საპარლამენტო მდივანმა ლიკა საჯაიამ განუცხადა.
საჯაიას შეფასებით, როგორც კი პარლამენტში გიორგი კვირიკაშვილის სადეპუტატო უფლებამოსილება იქნება ცნობილი, წარმოიქმნება თანამდებობრივი შეუთავსებლობის საკითხი, პრემიერის მოვალეობის შემსრულებლის სტატუსთან მიმართებით.
ამასთან, საჯაიას აზრით, იმის გათვალისწინებით, რომ ასეთ შემთხვევაზე კანონი რაიმე განსხვავებულ ჩანაწერს არ ითვალისწინებს, მასზე ის საკანონმდებლო ნორმა უნდა გავრცელდეს, როცა თანამდებობრივი შეუთავსებლობის აღმოფხვრა შვიდი დღის ვადაში ხდება.
”ერთია, ვიმსჯელოთ იმის შესახებ, რამდენად ეთიკური და სწორია გიორგი კვირიკაშვილი ერთდროულად ასრულებდეს პარლამენტის წევრის და პრემიერის უფლებამოსილებას და მეორეა, რას ამბობს კანონი. კანონი მას პრემიერ-მინისტრის უფლებამოსილების განხორციელებას არ უკრძალავს, რადგან არის გონივრული ვადა - შვიდი დღე და ამ შვიდ დღეში, მან უნდა მიიღოს გადაწყვეტილება პარლამენტის წევრის უფლებამოსილების შეწყვეტის შესახებ. შვიდი დღის ვადაში რომ იყოს პრემიერის მოვალეობის შემსრულებელი და იმავდროულად ჰქონდეს დეპუტატის უფლებამოსილება, ამით კანონი არ დაირღვევა, თუმცა მეორე საკითხია, ეს რამდენად სწორი და მისთვის კომფორტული იქნება, იგივე ეს რამდენად მიზანშეწონილია ხელისუფლების დანაწილების თვალსაზრისით. მიზანშეწონილობის თვალსაზრისით სჯობს, გიორგი კვირიკაშვილმა ერთდროულად ორივე ფუნქცია არ შეასრულოს”, - განუცხადა ”ინტერპრესნიუსს” ლიკა საჯაიამ.
ახალი მთავრობის ფორმირებამდე, გიორგი კვირიკაშვილი პარლამენტის წევრიც ხდება და იმავდროულად, პრემიერის მოვალეობის შემსრულებელიც.
საქმე ის არის, რომ გიორგი კვირიკაშვილი მოქმედი პრემიერ-მინისტრია და პარლამენტში იმავდროულად პრემიერ-მინისტრის რანგში შედის. ახალარჩეული პარლამენტის უფლებამოსილების ცნობისთანავე, მთავრობას უფლებამოსილება შეუწყდება და კვირიკაშვილი პრემიერ-მინისტრის მოვალეობის შემსრულებელი გახდება. შესაბამისად, წარმოიშვება ვითარება, როცა კვირიკაშვილი რამდენიმე დღის განმავლობაში - ახალი მთავრობის ფორმირებამდე, პარლამენტის წევრიც იქნება და პრემიერ-მინისტრის მოვალეობასაც შეასრულებს.
ახალი მთავრობისათვის ნდობის გამოცხადების შემდეგ კი, პარლამენტი კვირიკაშვილსაც შეუწყვეტს სადეპუტატო უფლებამოსილებას.
