საქართველოს ცენტრალური საარჩევნო კომისიის განცხადებით, სანდრა რულოვსისთვის პარლამენტის დეპუტატის უფლებამოსილების შეწყვეტის თაობაზე გადაწყვეტილება საკანონმდებლო ორგანომ უნდა მიიღოს. როგორც ”ინტერპრესნიუსს” ცესკოს პრესსპიკერმა ანა მიქელაძემ განუცხადა, ცენტრალური საარჩევნო კომისიის უფლებამოსილება დეპუტატის უფლებამოსილების შეწყვეტა არ არის.
”ცენტრალური საარჩევნო კომისიის უფლებამოსილება ეს არ არის. საქართველოს პარლამენტი როდესაც შეიკრიბება, სანდრა რულოვსს შეუძლია საქართველოს პარლამენტს მიმართოს წერილით. პარლამენტი მიიღებს გადაწყვეტილებას უფლებამოსილების შეწყვეტასთან დაკავშირებით. ამის შემდეგ პარლამენტი თავის დადგენილებას გამოუგზავნის ცენტრალურ საარჩევნო კომისიას და პროპორციულ სიაში მისი უფლებამონაცვლე ვინც არის, ის დაიკავებს მის ადგილს, თუ, რა თქმა უნდა, ისიც თანახმა იქნება”, - განაცხადა მიქელაძემ.
”ნაციონალური მოძრაობის” წევრი სანდრა რულოვსი დეპუტატის მანდატზე უარს ამბობს. აღნიშნულის შესახებ რულოვსმა ცენტრალურ სარჩევნო კომისიას მიმართა. რულოვსი დეპუტატობის შეჩერებას ითხოვს. 8 ოქტომბრის საპარლამენტო არჩევნებში, ”ნაციონალურმა მოძრაობამ” პროპორციული სიით 27 მანდატი მოიპოვა. პროპორციულ სიაში 28-ე ნომერი და შესაბამისად სანდრა რულოვსის ადგილმონაცვლე სავარაუდოდ გიორგი ღვინიაშვილი იქნება.
