“ქართული ოცნების“ წარმომადგენლის, ზაქარია ქუცნაშვილის შეფასებით, “თავისუფალი დემოკრატების“ ყოფილმა წევრებმა: ზურაბ აბაშიძემ, დავით ონოფრიშვილმა და გიორგი ცაგარეიშვილმა დღეს სწორი პოზიცია დააფიქსირეს, რისთვისაც მათ მადლობას უხდის.
“მხადაჭერისთვის მადლობას ვუცხადებთ. მადლობის მეტი არაფერი გვეთქმის. მათ საკუთარ ამომრჩეველს მოუწოდეს, არჩევნების მეორე ტურში მხარი არა “ნაციონალური მოძრაობის“, არამედ “ქართული ოცნების“ წარმომადგენელს დაუჭირონ, რისთვისაც მადლობას ვუხდით“, - განუცხადა “ინტერპრესნიუსს“ ზაქარია ქუცნაშვილმა.
ამასთან, კითხვაზე, ხედავს თუ არა “თავისუფალი დემოკრატებიდან“ წამოსული პოლიტიკოსების ადგილს “ქართული ოცნების“ ხელისუფლებაში, ქუცნაშვილმა განაცხადა, რომ ამაზე საუბარი ნაადრევია, მით უფრო იმ ფონზე, როცა არჩევნები დასრულებული არ არის.
”თავისუფალი დემოკრატების“ ყოფილი წევრები მხარდამჭერებს მოუწოდებენ, საპარლამენტო არჩევნების მეორე ტურში მხარი “ქართული ოცნების“ კანდიდატებს დაუჭირონ. ამის შესახებ ერთობლივი განცხადება დღეს, პარლამენტში გამართულ ბრიფინგზე დავით ონოფრიშვილმა, ზურაბ აბაშიძემ და გიორგი ცაგარეიშვილმა გააკეთეს.
