სანდრამ ნახა, რომ არჩევნებში უკვე მეორედ დამარცხდა, ახლა მესამედაც უნდა დამარცხდეს და ბუნებრივია, ეს სასიამოვნო არ არის, - ასე ეხმაურება ”ქართული ოცნების” ერთ-ერთი ლიდერი, პარლამენტის პირველი ვიცე-სპიკერი მანანა კობახიძე ზუგდიდის მუნიციპალიტეტის მაჟორიტარულ ოლქში ”ნაციონალური მოძრაობის” კანდიდატის სანდრა რულოვსის გადაწყვეტილებას, არ მიიღოს მონაწილეობა მაჟორიტარული არჩევნების მეორე ტურში.
კობახიძის აზრით, რულოვსის გადაწყვეტილება ლოგიკურია, რადგან იცის, რომ ზუგდიდში მას მხარდაჭერა ვერ ექნება და მაჟორიტარი დეპუტატი ვერ გახდება.
კობახიძის თქმით, არჩევნებს ყველა მაღალ შეფასებას აძლევს, გარდა მიხეილ სააკაშვილისა. მისივე შეფასებით, 50 მაჟორიტარულ ოლქში არჩევნების მეორე ტურის დანიშვნა ადასტურებს, რომ არჩევნები დემოკრატიულად ჩატარდა.
”ყველა საერთაშორისო სადამკვირვებლო მისია, ორგანიზაცია ცალსახად, ძალიან ცხადად წერს, აღიარებს, რომ საქართველოში 2016 წლის საპარლამენტო არჩევნები დემოკრატიის სტანდარტებით, ადამიანის ფუნდამენტური უფლებების დაცვით და თავისუფლად ჩატარდა, იყო უპრეცედენტოდ მშვიდი, მიუხედავად ეპიზოდური დარღვევებისა, რომელიც გამოსწორებულია. იგივე ჯიხაშკარში, განმუხურში განმეორებითი კენჭისყრა ჩატარდა, რადგან იქ იყო დარღვევები, ეს უბნები გაბათილდა და არჩევნები ხელახლა ჩატარდა. ეს არის ძალიან დემოკრატიული, კანონის შესაბამისი პროცესი. ყველა აკვირდებოდა, რომ არჩევნები იყო ძალიან მშვიდი - ყოველგვარი ექსცესისა და დაძაბულობის გარეშე. დამკვირვებელთა რაოდენობა თითქმის ამომრჩევლებზე მეტი იყო და აღნიშნული უბნებისაკენ ძალიან დიდი ყურადღება იყო მიქცეული. ამას ყველა აღიარებს, როგორც დასავლეთში, ასევე ქვეყნის შიგნით. ამას არ აღიარებს მხოლოდ მიხეილ სააკაშვილი. როცა სანდრა რულოვსზე ვსაუბრობ, ვამბობ, რომ ის იგივე მიხეილ სააკაშვილია, რადგან სანდრა რულოვსი პოლიტიკაში არ შემოვიდოდა, ეს დავალება რომ არ ჰქონოდა მიხეილ სააკაშვილისგან. ის არჩევნებში მონაწილეობას დიდი სიხარულით არც მიიღებდა - ჰქონდა პირდაპირი დავალება, იყო გარკვეული ტაქტიკური სვლა და ამიტომაც ჩასვეს სიაში მეორე ნომრად. სანდრა რულოვსის სახით ფაქტობრივად მიხეილ სააკაშვილი შემოვიდა არჩევნებში და მხოლოდ ეს ადამიანები ამბობენ, რომ ყველაფერი გაყალბდა, რაც სასაცილოა. ზუგდიდელი ამომრჩეველი მას ხმას არ აძლევს, რადგან ხმას არ აძლევს ძალადობასა და ღირსების შელახვას”, - განუცხადა ”ინტერპრტესნიუსს” მანანა კობახიძემ.
მისივე თქმით, მიმდინარე პროცესები ადასტურებს, რომ ”ნაციონალურ მოძრაობაში” დიდი არეულობაა და ”მიხეილ სააკაშვილი საკუთარ პარტიას აღარ უნდა”.
”ერთმანეთში მიდის ღია პოლემიკა და არის ურთიერთდაპირისპირება. ”ნაციონალურმა მოძრაობამ” იცის, რომ ის 27%, რაც არის, არის და იმის იქეთ ერთ ხმასაც ვერ მიიღებს”, - აღნიშნა კობახიძემ.
”ნაციონალური მოძრაობის” მაჟორიტარი დეპუტატობის კანდიდატი ზუგდიდის მუნიციპალიტეტში სანდრა რულოვსი მეორე ტურში მონაწილეობაზე უარს ამბობს. როგორც რულოვსი ”ოდიში ნიუსთან'' ექსკლუზიურ ინტერვიუში აცხადებს, უსამართლო არჩევნების ფონზე მეორე ტურში მონაწილეობა შეურაცხმყოფელია.
