”ნაციონალური მოძრაობა” ცდილობს, საკუთარი მარცხი გაამართლოს ამ ფარული ჩანაწერებით, რასაც ვერ გადაეჩვია, - ამის შესახებ თელავსა და ყვარელში ”ქართული ოცნების” მაჟორიტარობის კანდიდატმა ირაკლი სესიაშვილმა, ”ნაციონალური მოძრაობის” მაჟორიტარობის კანდიდატის ბრალდებების საპასუხოდ განაცხადა, რომელიც საარჩევნო კომისიის წევრებზე ზეწოლის ფაქტებს ეხება.
როგორც ”ინტერპრესნიუსს” სესიაშვილმა განუცხადა, მის საარჩევნო შტაბში მისულ პირებს ის უშუალოდ არ შეხვედრია და შესაბამისად, არ აქვს ინფორმაცია, ვინ იყვნენ ვიდეოკადრებში დაფიქსირებული ადამიანები.
სესიაშვილის ინფორმაციით, მის საარჩევნო შტაბში ”სხვადასხვა დარღვევაზე საკუთარი წუხილის გამოსახატად არაერთი ადამიანი მიდის”.
”ნაციონალური მოძრაობა” ამ ფარულ ჩანაწერებს ვერ გადაეჩვია. მე პირადად ამ ადამიანებს არ შევხვედრივარ, თუმცა რამდენადაც არჩევნების პროცესში ძალიან ბევრ დარღვევას ჰქონდა ადგილი, მათ შორის ფულის გადაცემას, ასევე ე.წ. ”სომხურ კარუსელს”, ამასთან დაკავშირებით ჩვენთან მოქალაქეები მოდიან და თავიანთ წუხილს გამოთქვამენ. მე ვერ გეტყვით, ვინ ვინ იყო, რადგან მათთან შეხება არ მქონია, თუმცა შტაბში ეს ინფორმაცია შემოდიოდა და ვის მიერ იყო ორგანიზებული, ნამდვილად არ ვიცი. ფაქტია, რომ ”ნაციონალური მოძრაობა” ცდილობს, საკუთარი მარცხი გაამართლოს ამ ფარული ჩანაწერებით, რასაც ვერ გადაეჩვია. მე დარწმუნებული ვარ, რომ არჩევნებზე ჩვენი საზოგადოება ამ ყველაფერს ადეკვატურ პასუხს გასცემს”, - განაცხადა სესიაშვილმა.
”ნაციონალური მოძრაობის” მაჟორიტარი დეპუტატობის კანდიდატი თელავისა და ყვარლის ოლქში გიორგი ბოტკოველი ”ქართული ოცნების” მაჟორიტარი დეპუტატობის კანდიდატ ირაკლი სესიაშვილს საარჩევნო კომისიის წევრებზე ზეწოლაში ადანაშაულებს.
როგორც ბოტკოველმა დღეს გამართულ პრესკონფერენციაზე განაცხადა, სესიაშვილი პირადად იბარებს კომისიის წევრებს და დავალებებს აძლევს. გიორგი ბოტკოველმა ვიდეომასალაც გასაჯაროვა, სადაც მისი მტკიცებით, ასახულია, თუ როგორ მიდიან სესიაშვილთან შეხვედრაზე კომისიის წევრები.
