პარლამენტში შესვლისა და მეორე ტურში მონაწილეობის გადაწყვეტილება პოლიტსაბჭომ ხმათა უმრავლესობით მიიღო, - ამის შესახებ ჟურნალისტებს "ნაციონალური მოძრაობის" პოლიტსაბჭოს წევრმა სერგი კაპანაძემ განუცხადა.
მისი შეფასებით, ეს იყო სწორი გადაწყვეტილება. "გადაწყვეტილება მიიღო პარტიის პოლიტსაბჭომ ხმათა აბსოლუტური უმრავლესობით. იყო დისკუსია და ეს არის ჯანსაღი პროცესი ყველა ნორმალურ დემოკრატიულ ევროპულ პარტიაში. გვქონდა აზრთა გაცვლა-გამოცვლა, თუმცა კიდევ ერთხელ ვამბობ, რომ გადაწყვეტილება ხმათა აბსოლუტური უმრავლესობით მივიღეთ", - აღნიშნა კაპანაძემ.
მისივე თქმით, ძალიან პრობლემატური იყო ის წინასაარჩევნო გარემო, რომელშიც "ნაციონალურ მოძრაობას" მოუწია მონაწილეობის მიღება. "იყო ძალიან ბევრი დარღვევა, სერიოზული ძალადობა, არათანაბარი პირობები, მაგრამ მიუხედავად ამისა ჩვენ ვალდებულები ვართ პატივი ვცეთ იმ ამომრჩევლებს, ვინც ხმა დაგვიჭირა და ასევე მათ, ვინც ხმა არ მოგვცა. დღეს, როგორც არასდროს, საქართველოს სჭირდება ძლიერი პროდასავლური ოპოზიცია, რათა ივანიშვილს შევუშალოთ ხელი, მოაგროვოს საკონსტიტუციო უმრავლესობა და მართოს ქვეყანა ისე, როგორც მოესურვება", - განაცხადა კაპანაძემ.
