დამოუკიდებელი საქართველოს ისტორიაში, 2016 წლის საპარლამენტო არჩევნები იყო ყველაზე დემოკრატიული არჩევნები, სადაც ხალხის არჩევანი შედეგზე რეალურად აისახა, - განაცხადა საბურთალოს მაჟორიტარობის კანდიდატმა, მამუკა მდინარაძემ გადაცემა 2030-ში.
„ყველა წინა საპარლამენტო არჩევნები შიშით, გაყალბებით ტარდებოდა და იყო არა არჩევნები, არამედ ომი, თუ არ ჩავთვლით 90-იანი წლების დასაწყისის არჩევნებს, რომელსაც ქართველმა ხალხმა რეფერენდუმი უწოდა“, - განაცხადა მდინარაძემ.
მისი თქმით, მეორე ტურში „ქართული ოცნების“ მაჟორიტარობის ყველა კანდიდატი წარმატებას მიაღწევს.
„ჩვენს გუნდში ყველა კანდიდატი ღირსეულია და ყველა მათგანს 50%-თან მიახლოებული შედეგი აქვს. ნაწილმა პირველივე ტურში მოახერხა გამარჯვება, ნაწილი კი, ბრძოლას მეორე ტურში განაგრძობს. ზოგ შემთხვევაში შესაძლოა, საარჩევნო კამპანიის ხარვეზიც იყო, ზოგ შემთხვევაში ოპონენტი იყო ძლიერი, ზოგ შემთხვევაში კი - ბევრი ოპონენტი. დარწმუნებული ვარ, მეორე ტურში ყველა მათგანი ძალიან ღირსეულ გამარჯვებას მიაღწევს. ამაში მთელი გუნდი გადავერთვებით და ჩვენი კანდიდატებისა და ქვეყნის წარმატებისთვის მობილიზებული ვიქნებით“, - განაცხადა მამუკა მდინარაძემ.
