როლის მორგება, რომელიც ბიძინამ ჩაიფიქრა, მასავით დიდი ნიჭით დაჯილდოებული პიროვნებისთვისაც კი შეუსრულებელია, - ამის შესახებ პარლამენტის თავმჯდომარე დავით უსუფაშვილმა „კვირის პალიტრასთან“ ინტერვიუში განაცხადა.

უსუფაშვილმა იმ მიზეზებზე ისაუბრა, რის გამოც მოქმედი და ყოფილი პრემიერ-მინისტრებისადმი გაგზავნილი წერილის გასაჯაროება გადაწყვიტა.

„მიუხედავად იმისა, რომ არაერთხელ მოვუწოდე ყველას, პერსონალური თავდასხმები შეეწყვიტათ და გველაპარაკა პოლიტიკურად, ბრალდებები არ წყდება - ამის მოთმენას აღარ ვაპირებ, რადგან არჩევნებია და ამომრჩეველმა თავად უნდა განსაჯოს, რაშია საქმე და სადაა სიმართლე! გასაჯაროებული დოკუმენტი ერთია იმ მრავალთაგან, რომელიც ნათლად მეტყველებს, ვინ აზროვნებდა სახელმწიფოებრივად, ვინ ზრუნავდა სახელმწიფოზე, ქვეყანაზე, კოალიციასა და ცივილიზებული ურთიერთობების შენარჩუნების აუცილებლობაზე“, - განაცხადა უსუფაშვილმა.

მისივე თქმით, „ივანიშვილს და სააკაშვილს ერთნაირი მისწრაფებები აღმოაჩნდათ და ორივე სხვადასხვა ტერმინით ერთს გვეუბნება - პოლიტიკაზე ექსკლუზივი მე მინდაო“. 

„როლის მორგება, რომელიც ბიძინამ ჩაიფიქრა, ისეთი დიდი ნიჭით დაჯილდოებული პიროვნებისთვისაც კი, როგორც თავად ივანიშვილია, შეუსრულებელია. ფეხბურთში მიზნად კარში გოლის გატანაც დაისახო და ნეიტრალური მსაჯისაც, არ გამოვა. ჩემი აზრით, დღეს ბიძინა ივანიშვილის პოზიცია აზარალებს არა მხოლოდ „ქართულ ოცნებას“, თავად მის პიროვნულ ექსპერტობასა და ავტორიტეტსაც. გიორგი კვირიკაშილი კარგი პრემიერია, თუმცა მინდა, ის პარტიის კარგ ლიდერადაც ვიხილო. მას სჭირდება მეტი საშუალება, რომ თავისი შესაძლებლობები მაქსიმალურად გამოიყენოს. არ ვამბობ, რომ ივანიშვილი ხელებს უგრეხს, საუბარია იმაზე, რომ მას მეტი თანამოაზრე სჭრიდება გვერდით“, - განაცხადა დავით უსუფაშვილმა.