”ქართული ოცნების” წარმომადგენლის, ზაქარია ქუცნაშვილის შეფასებით, დავით უსუფაშვილის მიერ 2016 წლის 11 მარტს ბიძინა ივანიშვილისა და გიორგი კვირიკაშვილისადმი გაგზავნილ წერილში სენსაციური არაფერია.
როგორც ქუცნაშვილმა ”ინტერპრესნიუსს” განუცხადა, უსუფაშვილის წერილის დედააზრია, ”მოდი, გავაკეთოთ ორპარტიული კოალიცია ”.
”წერილი, რომლის თაობაზეც დავით უსუფაშვილი საუბრობს, არავითარი სენსაციური შინაარსის მატარებელი არ არის. წერილი იმას ადასტურებს, რომ ”რესპუბლიკელების” თხოვნა იყო, შექმნილიყო ორპარტიული კოალიცია. წერილის მთელი დედააზრია საარჩევნო კამპანიის მოახლოვებასთან ერთად ჩამოყალიბებულიყო ორპარტიული კოალიცია. დანარჩენი ის, რომ საჭიროა საარჩევნო კამპანიისთვის მზადება, რომ ყველამ უნდა იცოდეს თავისი ადგილი და რომ კანდიდატები შეთანხმებული უნდა იყოს, ეს ლოგიკური და სწორი მოთხოვნებია. წერილის დედააზრია, მოდი, ორპარტიული კოალიცია გავაკეთოთო, რაზეც როგორც ჩანს, მან უარი მიიღო”, - განუცხადა ”ინტერპრესნიუსს” ქუცნაშვილმა.
მისივე აზრით, ”კოალიცია ”ქართული ოცნება” ცივილურად დაიშალა და მასში შემავალ არც ერთი პარტიას არ უკადრია ის, რომ დეზინტეგრაციული პროცესები წინასაარჩევნო კამპანიის დაწყებამდე წასულიყო”.
“პარლამენტი ასრულებდა თავის მოვალეობას და მთავრობა ასრულებდა თავის მოვალეობას - ხელისუფლების არც ერთი განშტოება არ ყოფილა პარალიზებული, ხოლო წინასაარჩევნო კამპონიის დროს რომ კონკურენტულ რეჟიმში გადავედით, რომლისთვისაც პოლიტიკური დაპირისპირება თავისთავად დამახასიათებელია, ამაში გასაკვირი არაფერია”, - აღნიშნა ქუცნაშვილმა.
საქართველოს პარლამენტის თავმჯდომარემ, ”რესპუბლიკური პარტიის” ლიდერმა დავით უსუფაშვილმა ყოფილი და მოქმედი პრემიერების, ბიძინა ივანიშვილისა და გიორგი კვირიკაშვილისადმი 2016 წლის 11 მარტს გაგზავნილი წერილი გაასაჯაროვა.
წერილში უსუფაშვილი ადრესატებს წერს, რომ სასწრაფოდაა გადასაწყვეტი კოალიციის საარჩევნოდ დალაგების საკითხი. მისივე შეფასებით, ეს არის ნომერ პირველი კოალიციური, სახელისუფლებო და სახელმწიფო ამოცანა.
წერილში საუბარია ”რესპუბლიკელებთან“ ურთიერთობაზე. უსუფაშვილი აღნიშნავს, რომ შექმნილ ვითარებაში მას პრაქტიკულად ამოეწურა ”დამბალანსებელ-მომრიგებელ-შემრიგებელ-გადამგორებლის რესურსი”.
