23 სექტემბერს, ლევილის მამულის ტერიტორიაზე განხორციელდება ხელმოწერა დასკვნით აქტზე, რომლის შედეგად, ლევილის მამული 25 წლიანი გზის შემდეგ დაუბრუნდება მის კანონიერ მესაკუთრეს - ქართველს ხალხს, - ამის შესახებ დიასპორის საკითხებში სახელმწიფო მინისტრმა გელა დუმბაძემ ჟურნალისტებს გუშინ, მთავრობის სხდომის შემდეგ განუცხადა. 
როგორც გელა დუმბაძემ აღნიშნა, საქართველოს უბრუნდება თავისი საკუთრება პარიზიდან 37 კილომეტრში, 5 ჰექტრამდე მიწა და შატო. „მე მინდა, რომ ეს პროცესი იყოს განხილული, როგორც საშუალება, როგორც სულიერი ინსპირაცია უფრო დიდი ტერიტორიების დასაბრუნებლად, ღირსებით და მშვიდობიან პირობებში“, - განაცხადა გელა დუმბაძემ. 
მისივე განმარტებით, მაისში მიღებული განკარგულების შედეგად, გადმოცემის პროცესის შემდეგ, საქართველოს ხელისუფლებას გათვალისწინებული აქვს 10 წლის განმავლობაში ამ პროცესისთვის დახარჯოს 5 600 000 ევრო და საჭიროების შემთხვევაში თანხები დაემატება.