გაერო-ს ადამიანის უფლებათა საბჭოს 33-ე სესიის გახსნაზე გაეროს ადამიანის უფლებათა უმაღლესმა კომისარმა ზეიდ რაად ალ ჰუსეინიმ საქართველოს აფახაზეთისა და ცხინვალის რეგიონებში შესვლის შეზღუდვებზე ისაუბრა.
როგორც „ინტერპრესნიუსს“ საქართველოს საგარეო საქმეთა სამინისტროდან აცნობეს, ზეიდ რაად ალ ჰუსეინიმ სესიაზე გამოსვლისას ვრცლად ისაუბრა პრობლემაზე, რომელსაც მისი ოფისის თანამშრომლები აფხაზეთისა და ცხინვალის რეგიონებში შესვლასთან და ადამიანის უფლებათა მდგომარეობის შეფასებასთან დაკავშირებით აწყდებიან.
"ღრმა შეშფოთებას გამოვთქვამ იმასთან დაკავშირებით, რომ ჩემი ოფისის თანამშრომლების მოთხოვნა, შესულიყვნენ აფხაზეთსა და სამხრეთ ოსეთში რამდენჯერმე იქნა უარყოფილი მათ მიერ, ვინც დე-ფაქტო კონტროლს ახორციელებს, და ეს მოხდა გენერალური მდივნის არაერთი მინიშნების მიუხედავად, რომ აღნიშნულ რეგიონებში საერთაშორისო მონიტორების არსებობა მნიშვნელოვანია", - განაცხადა უმაღლესმა კომისარმა.
მისი თქმით, გაერო-ს ოფისს სისტემატურად მიეწოდება ინფორმაცია საქართველოს ოკუპირებულ რეგიონებში ადამიანის უფლებათა დარღვევებზე. "გრძელდება ინფორმაციის მიღება სავარაუდო დარღვევების, მკვლელობების, უკანონო დაკავებების, წამებისა და არაადამიანური მოპყრობის, ასევე თავისუფალი გადაადგილების შეზღუდვის ფაქტებზე. კვლავ გადაუჭრელია დაკარგული პირების საკითხი, მუდმივ სირთულეებს ვაწყდებით საცხოვრებელი პირობებით უზრუნველყოფასთან, განათლებისა და საკუთრების უფლების დაცვასთან და ადმინისტრაციული დოკუმენტაციის გაფორმებასთან დაკავშირებით. ასევე, მწვავედ დგას სამოქალაქო საზოგადოებისა და თავისუფალი მედიისთვის სივრცის უზრუნველყოფის აუცილებლობის საკითხიც“, - განაცხადა თავის გამოსვლაში უმაღლესმა კომისარმა ზეიდ რაად ალ ჰუსეინიმ.
