”ქართული ოცნება” პარლამენტში 100 დეპუტატით არ იქნება წარმოდგენილი, იქნება გაცილებით ნაკლებით, - ამის შესახებ ”ინტერპრესნიუსს” ”რესპუბლიკური პარტიის” ერთ-ერთმა ლიდერმა ლევან ბერძენიშვილმა განუცხადა. მისი თქმით, ბიძინა ივანიშვილის გუშინდელი განცხადება ამასთან დაკავშირებით სერიოზულად არ უნდა აღვიქვათ.
”ქართული ოცნება” პარლამენტში 100 დეპუტატით არ იქნება წარმოდგენილი, იქნება გაცილებით ნაკლებით. ამაში მე არანაირად არ მეპარება ეჭვი, თუმცა ბატონ ბიძინას თავისი მოსაზრებები აქვს. ის ამ პარტიის დამფუძნებელი და გულშემატკივარია და ამიტომ მისი ნათქვამი არ ითვლება, ამ შემთხვევაში თავის გუნდზე ლაპარაკობს და არ არის ექსპერტი. ამიტომ, ეს ნაწილი სერიოზულად არ უნდა აღვიქვათ. ეს როგორც ჩანს სურვილებს უფრო გავს, ვიდრე შეფასებას”, - განაცხადა ბერძენიშვილმა.
რაც შეეხება ბიძინა ივანიშვილის დაბრუნებას სატელევიზიო ეთერში, ბერძენიშვილის შეფასებით, ”ბატონი ბიძინას გამოჩენა ახლა ისეთი მნიშვნელოვანი არ არის როგორც თავად ივანიშვილს ჰგონია“.
”ახლა არ არის 2012 წელი. ბიძინა ივანიშვილისადმი ნდობა საზოგადოებაში დაწეულია და იგი არ არის პოლიტიკაში როგორც ოფიციალურად გაცხადებულია. ამიტომ, მისი გამოჩენა დამაბნეველია ბევრისთვის და არა პირიქით. არამგონია, რომ ეს სერიოზულად აამაღლებს ”ქართული ოცნების” ავტორიტეტს. მათ ისეთი ტიპის კანდიდატები წარმოადგინეს, ბიძინა ივანიშვილი კი არა ბევრი გულშემატკივარიც რომ აღმოაჩნდეთ, ძალიან გაუჭირდებათ. ძალიან არაპოლიტიკური ხალხი წარმოადგინეს საპარლამენტოდ. ბიძინა არაპოლიტიკოსი, ბიძინა გეგიძეები და ფეხბურთელები არაკვალიფიციურ შემადგენლობად აღიქმება”, - განაცხადა ბერძენიშვილმა.
