პრეზიდენტის საპარლამენტო მდივანი და ევროსასამართლოს მოსამართლეობის კანდიდატობის კონკურსში მონაწილე ანა დოლიძე მთავრობისაგან ახსნა-განმარტებას ითხოვს, თუ რა კრიტერიუმებზე დაყრდნობით მოხდა საქართველოს მთავრობის მიერ ევროსასამართლოს მოსამართლეობის კანდიდატად ევა გოცირიძის შერჩევის საკითხი სტრასბურგის ადამიანის უფლებათა სასამართლოში. 

როგორც ანა დოლიძემ განაცხადა, პროცესი გაუმჭვირვალედ მიმდინარეობდა. პრეზიდენტის საპარლამენტო მდივანის თქმით, მას როგორც კონკურსის ფინალისტს უსამართლობის განცდა აქვს.

”მე როგორც ამ კონკურსის ფინალისტს, ამ ნაჩქარევი და გაუმჭვირვალე გადაწყვეტილებით დამრჩა შთაბეჭდლება, რომ მოხდა გარკვეული უსამართლობა. მეც და საქართველოს მოსახლეობასაც გვაქვს მოლოდინი, რომ იმ პირთა მიერ, რომლებმაც ეს გადაწყვეტილება მიიღეს, წარმოდგენილი იქნება დასაბუთებული ახსნა-განმარტება თუ რა კრიტერიუმებით, რა მაღალი ზნეობრივი მონაცემებით, ადამიანის უფლებებში გამოცდილებით თუ უცხო ენების ცოდნით მოხდა ამ გადაწყვეტილების მიღება, ასე ნაჩქარევად და დახურულ კარს მიღმა. 

ჩვენთვის ცნობილია, რომ კანდიდატურის შეცვლა მოხდა სწრაფად, შესაბამისი პროცედურების და დასაბუთებს გარეშე. შესაბამისად ბუნებრივია, ჩნდება დიდი კითხვის ნიშნები, უსამართლობასთან დაკავშირებით. მე, როგორც ფინალისტს ეს განცდა მაქვს და ბუნებრივია, საქართველოს მოსახლეობას, რომლის უმაღლესი წარმომადგენელი იქნება ეს პიროვნება ევროპის ადამიანის უფლებათა სასამართლოში, აქვს კითხვის ნიშნები”,-განაცხადა ანა დოლიძემ.