პარლამენტის ადამიანის უფლებათა დაცვისა და იურიდიულ საკითხთა კომიტეტები პრეზიდენტის მიერ უზენაესი სასამართლოს მოსამართლეებად წარდგენილი კანდიდატების მოსმენას საშემოდგომო სესიის გახსნამდე გეგმავენ.
აღნიშნულ კომიტეტებში აცხადებენ, რომ საკითხი საშემოდგომო სესიისთვის მზად იქნება.
“თუკი ივლისში კომიტეტის შეკრება შესაძლებელი იქნება, კომიტეტის სხდომას დავნიშნავთ, ხოლო თუ ეს ივლისში ვერ მოხერხდა, სექტემბრის პირველ კვირას, ვიდრე პარლამენტის ბიუროს სხდომა ჩატარდება, საკომიტეტო სხდომას გავმართავთ. ასე რომ, ბიუროს, რომელიც 6 სექტემბერს უნდა გაიმართოს, საკითხს გადავცემთ. შესაბამისად, შესაძლებელი იქნება უზენაესი სასამართლოს მოსამართლეობის კანდიდატების არჩევის საკითხის პლენარულ სხომაზე გატანა”, - განუცხადა ”ინტერპრესნიუსს” ვახტანგ ხმალაძემ.
ადამიანის უფლებათა დაცვის კომიტეტის თავმჯდომარის, ეკა ბესელიას ინფორმაციითაც, კომიტეტს პარლამენტის საშემოდგომო სესიისთვის მოსამართლეობის კანდიდატების მოსმენის საკითხი მზად ექნება, თუმცა ბესელია ამ ეტაპზე ვერ აკონკრეტებს სავარაუდო თარიღს, თუ როდის მოიწვევენ საკომიტეტო სხდომას.
პრეზიდენტმა უზენაეს სასამართლოში, სამი ვაკანტური თანამდებობიდან ორზე ნონა თოდუა და თამარ ლალიაშვილი ხელახლა წარადგინა. მათ პარლამენტმა ერთხელ უკვე არ დაუჭირა მხარი. კიდევ ერთი კანდიდატურა უზენაესი სასამართლოს მოსამართლის პოსტზე ლევან ბოძაშვილია.
უზენაესი სასამართლოს წევრის თანამდებობაზე ასარჩევი კანდიდატურები პარლამენტის ბიუროს 20 ივლისის სხდომაზე წარედგინა. პარლამენტის თავმჯდომარის დავალებით საკითხი შესაბამისმა კომიტეტებმა უნდა განიხილავენ და საშემოდგომო სესიაზე წარსადგენად მოამზადებენ.
