იმის თქმა, რომ პრეზიდენტის გარდა არავინ ჰყავს მოკავშირე სასამართლო რეფორმას, უსამართლო შეფასებაა, - ასე გამოეხმაურა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია საქართველოს პრეზიდენტის პრესსპიკერის ეკა მიშველაძის განცხადებას მართლმსაჯულების სისტემის რეფორმის მესამე ტალღასთან დაკავშირებით.
„მე არ ვიზიარებ ამ შეფასებას. სასამართლო რეფორმას ჰყავს მოკავშირეც, ავტორიც და გულშემატკივარიც: ავტორი - იუსტიციის სამინისტრო, პარლამენტი, რომელიც ძალიან დიდი გულშემატკივარია და ჩვენთვის ეს არის ნომერ პირველი რეფორმა, ამიტომ თქმა იმისა, რომ პრეზიდენტის გარდა არავინ ჰყავს გულშემატკივარი მოკავშირე სასამართლო რეფორმას, უსამართლო შეფასებაა. ჩვენთვის სასამართლო რეფორმა არის ძალიან მნიშვნელოვანი და ამიტომაც განხორციელდა პირველი ორი ეტაპი და მესამე ეტაპსაც ჩვენ ბოლომდე მივიყვანთ“, - განაცხადა ეკა ბესელიამ.
საპარლამენტო უმრავლესობის ლიდერი ზვიად კვაჭანტირაძე კი მიიჩნევს, რომ არაფერია საგანგაშო იმაში, თუ რეფორმის მესამე ტალღას შემდეგი, მე-9 მოწვევის პარლამენტი დაასრულებს.
შეგახსენებთ, რომ ეკა მიშველაძის თქმით, „პრეზიდენტი მიიჩნევს, რომ მას არ ჰყავს მოკავშირეები არც ერთ პოლიტიკურ ძალაში იმისთვის, რომ მოხდეს სასამართლოს რეფორმა“.
