საქართველოს პრემიერ-მინისტრი გიორგი კვირიკაშვილი ხურჩაში მომხდარ მკვლელობაზე პასუხისმგებლობას ოკუპანტ ქვეყანას, რუსეთს აკისრებს .
როგორც კვირიკაშვილმა საქართველოს თავდაცვისა და უსაფრთხოების კონფერენციაზე დისკუსიისას განაცხადა, ხურჩაში მოხდა სასტიკი მკვლელობა და ეს იყო სასტიკი ძალადობა. „რა საკვირველია ამაზე პასუხისმგებლობა ეკისრება ოკუპანტ ქვეყანას, რუსეთს. ჩვენ საერთაშორისო თანამეგობრობის ყურადღება მივიპყარით და გაკეთდა მთელი რიგი განცხადებები“, - აღნიშნა კვირიკაშვილმა.
მისივე თქმით, ის შეხვდა ოჯახს, რომელიც არის მსხვერპლი ამ სიტუაციის. „დღეს შევხვდი მსხვერპლის ოჯახს. ისინი არიან მსხვერპლი ამ სიტუაციის, რომელიც შექმნა რუსეთმა. ჩვენ ველოდებით რეაგირებას აფხაზეთის დეფაქტო ხელისუფლებისგან და რუსეთისგან ამ ფაქტთან დაკავშირებით, თუმცა არანაირი რეაგირება მათი მხრიდან არ იგრძნობა, რაც სამწუხაროა. ეს მკვლელობა მიზნად ისახავს, რომ ძირი გამოუთხაროს იმ პროცესებს, რომელიც მიმდინარეობს ოკუპირებულ ტერიტორიაზე მცხოვრებლებთან მიმართებაში“, - განაცხადა კვირიკაშვილმა.
პრემიერის თქმით, კონფლიქტის მშვიდობიან მოგვარებას ალტერნატივა არ აქვს, თუმცა ამაში საქართველოს სჭირდება დახმარება. „ოკუპირებულ ტერიტორიებზე სკოლებში იკრძალება ქართული ენა. ხდება ე.წ. საზღვრების გადმოწევა. ჩვენ არ შეგვიძლია ეფექტური რეაგირება მოვახდინოთ, თუ მარტოები ვიქნები. ჩვენ გვაქვს ძალიან ლოიალური პრინციპები. ჩვენ თავიდან უნდა ავიცილოთ პროვოკაციები, უნდა ვიყოთ მტკიცეები და ადეკვატურად უნდა გავუმკლავდეთ საფრთხეებს და ადეკვატური პასუხი უნდა გავცეთ რუსეთისგან მომდინარე საფრთხეებს“, - განაცხადა კვირიკაშვილმა.
