პარლამენტი ახალ დემოგრაფიულ პოლიტიკაზე მუშაობს. ჯანდაცვის კომიტეტის თავმჯდომარის, დიმიტრი ხუნდაძის განცხადებით, დემოგრაფიული პოლიტიკა ხელისუფლების ერთ-ერთი პრიორიტეტული მიმართულებაა.
მისი ინფორმაციით, მიმდინარეობს ერის აქტიური დაბერების პროცესი - ხანდაზმულთა რაოდენობა ბავშვთა რაოდენობას აჭარბებს, თუმცა, ხუნდაძის განმარტებით, ეს დემოგრაფიული გარდაქმნის გარდაუვალი პროცესია, რომელსაც სწორი მართვა სჭირდება.
“ჩვენ დავიწყეთ ორ დოკუმენტზე მუშაობა - ერთი არის სახელმწიფო დემოგრაფიული უსაფრთხოების დოკუმენტი, რომელიც უახლოეს პერიოდში წარედგინება პარლამენტს და დადგენილების პროექტი “საქართველოში მოსახლეობის დაბერების საკითხზე სახელმწიფო პოლიტიკის კონცეფციის დამტკიცების შესახებ“, - განაცხადა დიმიტრი ხუნდაძემ.
მან დეპუტატებს დოკუმენტის შემადგენელ კომპონენტებზე დეტალური ინფორმაცია გააცნო. ხუნდაძემ მიგრაციის პროცესზეც ისაუბრა და აღნიშნა, რომ ქვეყანაში ეს პროცესი განსაკუთრებით ინტენსიურია.
“1 500 000 მოქალაქე ქვეყნიდანაა გასული, ასევე მძლავრია შიდა მიგრაცია, რომლის შედეგად ჩამოყალიბდა ე.წ. თბილისიზაცია“, - აღნიშნა ჯანდაცვის კომიტეტის თავმჯდომარემ.
დიმიტრი ხუნდაძის ინფორმაციით, დემოგრაფიული პოლიტიკის შემადგენელ სეგმენტზე - დაბერების პოლიტიკის დოკუმენტზე მუშაობა კომიტეტმა 2014 წელს დაიწყო.
მისი შეფასებით, ეს არის ახალი სახელმწიფო პოლიტიკა ხანდაზმულთა მიმართ. აქვე კომიტეტის თავმჯდომარემ აღნიშნა, რომ არც ერთ ხელისუფლებას არ ჰქონია იმდენი საპენსიო გასაცემელი, რამდენიც დღევანდელ ხელისუფლებას აქვს, რაც მან მეორე მსოფლიო ომის შემდგომ პერიოდში შობადობის მაღალი მაჩვენებლების არსებობით ახსნა.
