ინგლისურ ენაში არის ორი სიტყვა, რომელიც ადასტურებს, რომ ოცნების ახდენა შესაძლებელია, ეს სიტყვებია ”ლესტერ სითი”, - ამის შესახებ საქართველოს პრემიერ-მინისტრმა გორგი კვირიკაშვილმა ლონდონში, ანალიტიკურ ცენტრ Chatham House-ში სიტყვით გამოსვლისას განაცხადა.
მან საქართველოში არსებულ მდგომარეობაზე და ქვეყნის სამომავლო გეგმებზე ისაუბრა. გიორგი კვირიკაშვილმა აღნიშნა, რომ საქართველოს ეკონომიკური და დემოკრატიული წინსვლა წარმოადგენს სასიცოცხლო მნიშვნელობის რესურსს რეგიონში სტაბილურობის უზრუნველსაყოფად.
”ვიყურებით რა მომავალში, ჩვენ ვაცნობიერებთ, რომ ეკონომიკური კეთილდღეობა და დემოკრატიული პროგრესი არის მთავარი არგუმენტები მათ წინააღმდეგ, ვინც ეწინააღმდეგება საქართველოს მშვიდობიან გზას და დასავლურ ორიენტაციას. მომავალში მე ვხედავ ერთიან და აყვავებულ საქართველოს, რომელიც ამაყობს ევროკავშირისა და ნატო-ს წევრობით. ვხედავ მომავალს, რომელშიც ჩვენ შევძლებთ რთული პრობლემების გადაჭრას და კარგი ურთიერთობების განმტკიცებას ყველა მეზობელთან, რუსეთის ჩათვლით. ვხედავ საქართველოს, როგორც უმნიშვნელოვანეს ცენტრს, რომელიც უზრუნველყოფს ევროპის ენერგოუსაფრთხოებას. ვხედავ აყვავებულ სავაჭრო, სატრანსპორტო და ლოგისტიკურ რეგიონულ ცენტრს. მავანთ ეს აუხდენელ ოცნებად შეიძლება მოეჩვენოს, მაგრამ ინგლისურ ენაში არის ორი სიტყვა, რომელიც ადასტურებს, რომ ოცნების ახდენა შესაძლებელია, ეს სიტყვებია ”ლესტერ სითი”. მჯერა, რომ ამ ხედვის ხორცშესხმაში მე შემიძლია მქონდეს გაერთიანებული სამეფოსა და ჩვენი სხვა ევროპელი პარტნიორების მხარდაჭერის იმედი”, - განაცხადა პრემიერმა.
შეგახსენებთ, რომ საფეხბურთო კლუბი ”ლესტერი” მისი არსებობის ისტორიაში პირველად წელს ინგლისის პრემიერ-ლიგის ჩემპიონი გახდა.
