განსხვავებული აზრის ქონის მიუხედავად, პატივი უნდა ვცეთ პოლიტიკურ დისციპლინას, საერთო გადაწყვეტილებას და ქართველი ხალხის არჩევანს, - ასე ეხმაურება პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი ქვეყნის ჩრდილოატლანტიკურ კურსთან დაკავშირებით თანაფრაქციელ თამაზ მეჭიაურის განცხადებას.
როგორც სესიაშვილმა ”ინტერპრესნიუსს” განუცხადა, ”ქართული ოცნება” მეჭიაურის პოზიციას ემიჯნება.
”ამ ქვეყანას, სახელმწიფოს, ხელისუფლებას, ხალხს ერთად გვაქვს არჩევანი გაკეთებული - ეს არჩევანი არის მტკიცე და მას ვერავინ შეცვლის. ჩვენი ქვეყნის ნატოში ინტეგრაცია გარდაუვალია. რა თქმა უნდა, სასურველია, რომ ამ გზაზე ყველამ ერთხმად, ერთი პოზიციით გამოვხატოთ ჩვენი ქვეყნის არჩევანი. ამ შემთხვევაში თამაზ მეჭიაურის განცხადება, რა თქმა უნდა, სცილდება იმ პოლიტიკურ მრწამსს და არჩევანს, რაც ”ქართულ ოცნებას” ქართველ ხალხთან ერთად აქვს გაკეთებული. რა თქ მა უნდა, ჩვენ მას ვემიჯნებით. იმის მიუხედვად, რომ ვსაუბრობთ, ეს არის მისი პირადი აზრი, მე მაინც ვიტყოდი, რომ განსხვავებული აზრის ქონის მიუხედავად, პატივი უნდა ვცეთ პოლიტიკურ დისციპლინას, საერთო გადაწყვეტილებას და ქართველი ხალხის არჩევანს და განსხავავებული აზრით კი არ უნდა გამოვჩნდეთ, არამედ პასუხიმგებლობა ავიღოთ იმაზე, სადაც უმრავლესობაა”, - აღნიშნა სესიაშვილმა.
იგი ”არაეთიკურს” უწოდებს ”რესპუბლიკელი” დეპუტატის დავით ბერძენიშვილის შეფასებას, ”ქართული ოცნების” მეჭიაურიზაციის შესახებ. ”მე ამ თემით სპეკულაციას ვხედავ. როგორც ჩანს, წინასაარჩევნოდ ჩვენი რიგებიდან გასულ პოლიტიკურ ძალებს, რომელთაც არჩევნებში დამოუკიდებლად მონაწილეობა აქვთ გადაწყვეტილი, ამით სურთ ზიანი მიაყენონ პოლიტიკურ ოპონენტს. ეს უკვე პოლიტიკური სპეკულირებაა. ცალკეული დეპუტატების განსხვავებული აზრი, რა თქმა უნდა, არამც და არამც არ ნიშნავს უმრავლესობის საერთო პოზიციის შერყევას. ბერძენიშვილის საუბარი ჩასაფრებულის პოზიციიდან რეაქციას, ვიწრო პოლიტიკურ ინტერესზე მორგებულს ჰგავს. ეს მისი არჩევანია”, - აღნიშნა სესიაშვილმა.
დეპუტატმა აქვე დასძინა, რომ არჩევნების წინ ”ქართული ოცნება” კიდევ ერთხელ გაუსვამს ხაზს ქვეყნის საგარეო ვექტორის ურყევობას. ”ჩვენს საარჩევნო სიაში მკაფიოდ პროდასავლური ძალები იქნებიან გაერთიანებული”, - ამბობს სესიაშვილი.
