საქართველო სომხეთსა და აზერბაიჯანს კონფლიქტის დარეგულირების საკითხში თბილისში შეხვედრას სთავაზობს. საპარლამენტო უმრავლესობის ლიდერი გიორგი ვოლსკი აცხადებს, რომ ქვეყნის ხელისუფლება მზადაა თბილისში სომხეთისა და აზერბაიჯანის წარმომადგენლებს შორის სასწრაფო შეხვედრა გაიმართოს – ნათქვამია "რადიო თავისუფლების" ინფორმაციაში.
"ხდება ძალიან სამწუხარო მოვლენები. არის მსხვერპლი. ვითარება საგანგებოა. მზად ვართ, გავხდეთ შუამავლები ნებისმიერი ფორმით", – განაცხადა ვოლსკიმ.
რადიოსადგურის კორესპონდენტი აღნიშნავს, რომ ასეთი წინადადებით საქართველო პირველად 1991 წელს გამოვიდა, როდესაც იმ დროინდელმა პრეზიდენტმა ზვიად გამსახურდიამ სომხეთისა და აზერბაიჯანის პრეზიდენტებს მშვიდობიანი მოლაპარაკებების გამართვა თბილისში შესთავაზა.
