საგარეჯოს არჩევნების გამოძიების პროცესში თავდაცვის მინისტრი არ დაკითხულა, - ამის შესახებ ჟურნალისტებს მთავარმა პროკურორმა ირაკლი შოთაძემ განუცხადა. მისი თქმით, დაკითხულია ყველა ის პირი, რომელთა დაკითხვის აუცილებლობა არსებობდა საქმეზე სრულყოფილი გამოძიების ჩასატარებლად.
"ამ სისხლის სამართლის საქმეზე ყველა საჭირო საგამოძიებო მოქმედება ტარდება. ვისი დაკითხვის აუცილებლობაც არსებობდა, დაიკითხა. შესაბამისად, ვინაიდან არ გამოვლინდა რაიმე სახის დანაშაულის ნიშნები, საქმეზე გამოძიება შეწყდა. თავდაცვის მინისტრი არ დაკითხულა, რადგან ამის საჭიროება არ არსებობდა", - განაცხადა მთავარმა პროკურორმა.
მთავარი პროკურატურის პრესსამსახურის ინფორმაციით, პროკურატურამ საგარეჯოს არჩევნების საქმეზე მიმდინარე გამოძიება შეწყვიტა.
როგორც "ინტერპრესნიუსს" მთავარი პროკურატურიდან აცნობეს, საქართველოს მთავარმა პროკურატურამ, საგარეჯოში ჩატარებული შუალედური საპარლამენტო არჩევნების დროს სხვადასხვა საჯარო მოხელის მიერ უფლებამოსილების ბოროტად გამოყენების ფაქტზე გამოძიება დაასრულა, სადაც შესაძლო დანაშაულის ჩადენის ფაქტი არ დადასტურდა.
"საქართველოს მთავარ პროკურატურაში 2016 წლის 25 თებერვალს დაიწყო გამოძიება საჯარო მოხელეების მიერ უფლებამოსილების ბოროტად გამოყენების ფაქტზე, საქართველოს სისხლის სამართლის კოდექსის 332-ე მუხლით, რომელსაც საფუძვლად დაედო განცხადებები, რომლებიც ეხებოდა საგარეჯოში 2015 წლის 31 ოქტომბერს ჩატარებული შუალედური საპარლამენტო არჩევნების დროს საჯარო მოხელეების მხრიდან უფლებამოსილების ბოროტად გამოყენების შესაძლო ფაქტებს.
საქმეზე სრულყოფილი გამოძიების ჩატარების მიზნით მიმდინარე გამოძიების ფარგლებში განხორციელდა მთელი რიგი საგამოძიებო/საპროცესო მოქმედებები, დაიკითხა 30-მდე მოწმე, მათ შორის საუბნო და საოლქო საარჩევნო კომისიის წევრები, საქართველოს თავდაცვის სამინისტროდან და საქართველოს ცენტრალური საარჩევნო კომისიიდან გამოთხოვილი იქნა სრული ინფორმაცია საგარეჯოს არჩევნებთან დაკავშირებით, ასევე პირველი ინსტანციისა და სააპელაციო სასამართლოს გადაწყვეტილებები ხსენებული არჩევნების შედეგების კანონიერებასთან დაკავშირებით", - აცხადებენ მთავარ პროკურატურაში.
მათივე თქმით, ჩატარებული გამოძიების შედეგად, საგარეჯოში ჩატარებული შუალედური საპარლამენტო არჩევნების პერიოდში, საჯარო მოხელეების მხრიდან სისხლის სამართლის კოდექსით გათვალისწინებული დანაშაულის ჩადენის ფაქტი არ დადასტურდა, რის გამოც საქართველოს პროკურატურამ საქმეზე გამოძიება შეწყვიტა.
