მთავრობა უნდა უსმენდეს კერძო სექტორს, - ამის შესახებ საქართველოს პრემიერ-მინისტრმა გიორგი კვირიკაშვილმა მცირე და საშუალო ბიზნესის წარმომადგენლებთან შეხვედრის შემდეგ ჟურნალისტებს განუცხადა.
მისი თქმით, შეხვედრა ძალიან საჭირო და საინტერესო იყო, ვინაიდან მეწარმეებმა მრავალი საჭირბოროტო საკითხი დასვეს. "ჩვენი პრიორიტეტია, რაც შეიძლება მეტი არაცნობადი სახე იყოს მსგავს შეხვედრებზე და ვაპირებთ შევქმნათ მუდმივმოქმედი ჯგუფი მცირე და საშუალო ბიზნესთან კომუნიკაციისთვის. ეს ძალიან მნიშვნელოვანია, რომ მთავრობა უსმენდეს კერძო სექტორს. განსაკუთრებით მნიშვნელოვანია მცირე და საშუალო ბიზნესის მოსმენა", - აღნიშნა პრემიერ-მინისტრმა.
გიორგი კვირიკაშვილის თქმით, პრემიერის ინფორმაციით, დღევანდელ შეხვედრაზე ძალიან ბევრი საკითხი დაისვა, მათ შორის ადმინისტრაციული, საგადასახადო, ფინანსებზე წვდომის გაიოლების კუთხით.
"ჩვენ გავაცანით ჩვენი რეფორმების 4 კომპონენტი, რომლის უმნიშვნელოვანესი ნაწილიც გახლავთ მოგების გადასახადის გაუქმება, ასევე საგადასახადო ადმინისტრირების მიმართულება. მაქსიმალურად შევეცდებით, რომ აქცენტი გავაკეთოთ მცირე მეწარმეებზე, ვინაიდან დასაქმების ეფექტი არის ძალიან მნიშვნელოვანი", - აღნიშნა გიორგი კვირიკაშვილმა. მისივე თქმით, შეხვედრაზე ასევე საუბარი შეეხო სახელმწიფო შესყიდვების კუთხით გარკვეულ შეთავაზებებს მცირე და საშუალო ბიზნესთან მიმართებაში.
მთავრობის მეთაური პირობას დებს, რომ მსგავსი სახის შეხვედრები გაგრძელდება და ასევე მუდმივმოქმედი გუნდი, რომელიც უნდა შეიქმნას, სახელმწიფოსთან მიიტანს მცირე და საშუალო ბიზნესის წინადადებებს.
შეხვედრა სავაჭრო ცენტრ "ექსპო ჯორჯიაში" გაიმართა და დაახლოებით 2 საათის განმავლობაში დახურულ კარს მიღმა მიმდინარეობდა.
