საქართველოს საგარეო საქმეთა მინისტრი, მიხეილ ჯანელიძე 29თებერვალს -1 მარტს ქალაქ ჟენევაში, გაერო-ს ადამიანის უფლებათა საბჭოს 31-ე სესიაში მიიღებს მონაწილეობას.
როგორც "ინტერპრესნიუსს" საქართველოს საგარეო საქმეთა სამინისტროდან აცნობეს, მინისტრი სიტყვით გამოვა ადამიანის უფლებათა საბჭოს მაღალი დონის სეგმენტზე, სადაც ისაუბრებს ადამიანის უფლებების დაცვის სფეროში გაერო-ს როლზე; ადამიანის უფლებების სფეროში ქვეყანაში მიმდინარე რეფორმებზე და ადამიანის უფლებების მდგომარეობის გაუმჯობესების კუთხით მთავრობის მიერ გატარებულ ღონისძიებებზე; განსაკუთრებულ ყურადღებას გაამახვილებს საქართველოს ოკუპირებულ რეგიონებში ადამიანის უფლებების დაცვის კუთხით არსებულ რთულ ვითარებაზე.
უწყების ინფორმაციით, საგარეო საქმეთა მინისტრი მონაწილეობას მიიღებს და სიტყვით გამოვა ყოველწლიურ მაღალი დონის პანელში: "გაერო-ს მდგრადი განვითარების 2030 დღის წესრიგი და ადამიანის უფლებების დაცვა, განვითარების უფლების უზრუნველყოფა".
სესიის პარალელურად მინისტრი ორმხრივ შეხვედრებს გამართავს გაერო-ს მაღალი დონის ოფიციალურ პირებთან და კოლეგა მინისტრებთან.
საქართველო 2016 წლის იანვრიდან 3 წლის ვადით გაერო-ს ადამიანის უფლებათა საბჭოს სრულუფლებიან წევრად აირჩიეს.
