თუ ჩვენ გვეყოლებიან განათლებული მსესხებლები, ვფიქრობ, ისინი უფრო კარგად შეაფასებენ თავიანთ რისკებს, - ამის შესახებ პარლამენტის საფინანსო-საბიუჯეტო კომიტეტის სხდომაზე პრეზიდენტის მიერ ეროვნული ბანკის საბჭოში წარდგენილმა კობა გვენეტაძემ განაცხადა.
როგორც კობა გვენეტაძემ აღნიშნა, ეკონომიკა ცოცხალი ორგანიზმია, მასზე შეიძლება მოხდეს დადებითი და უარყოფითი რყევები და სამწუხაროდ იგი არ არის დაცული ასეთი რყევებისგან.
"ვფიქრობ, იმ შემთხვევაში, როდესაც ასეთი რამეა მოსალოდნელი, ხელისუფლებამ მაქსიმალური უნდა გააკეთოს, რომ საზოგადოების ყველაზე დაუცველ ნაწილს ადვილად გადაატანინოს ასეთი პრობლემები. მე რამდენადაც ვიცი, უკვე არსებობს გარკვეული პროგრამები, იდენტიფიცირებულია შემოსავლის ის დონე, რომლის ქვემოთ მყოფი ხალხი არის ღარიბი. ვფიქრობ, ეს მექანიზმები ძალიან უნდა გაძლიერდეს. ხოლო რაც შეეხება ფინანსურ სისტემასთან ურთიერთობას, უნდა გავაკეთოთ ისე, რომ არც მწვადი დაიწვას და არც შამფური. მე ვფიქრობ, ამის გაკეთება შესაძლებელია და თუ ჩვენ გვეყოლებიან განათლებული მსესხებლები, ვფიქრობ, ისინი უფრო კარგად შეაფასებენ თავიანთ რისკებს. ამავე დროს, ეს ასევე კარგი იქნება იმ ფინანსური ორგანიზაციებისთვის, რომლებიც გასცემენ ამ სესხებს", -განაცხადა გვენეტაძემ.
