გიორგი ქადაგიძეს როგორც შევატყვე, კბილები უკაწკაწებს, როდის გავარდება და შევარდება პოლიტიკაში, – ამის შესახებ სოზარ სუბარმა ეროვნული ბანკის პრეზიდენტის გუშინ გაკეთებული განცხადებების შეფასებისას განაცხადა.
საქართველოს ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრის სოზარ სუბარის თქმით, გიორგი ქადაგიძეს რამდენიმე დღე უნდა მოეთმინა და მას შემდეგ, რაც ის დატოვებდა დაკავებულ თანამდებობას, უნდა გაეკეთებინა პოლიტიკური განცხადებები.
"მე რამდენადაც ვიცი, გიორგი ქადაგიძეს რამდენიმე დღეში ეწურება უფლებამოსილება. კარგი იქნებოდა მოეთმინა და შემდეგ გაეკეთებინა პოლიტიკური განცხადებები. როგორც შევატყვე, კბილები უკაწკაწებს, როდის გავარდება და შევარდება პოლიტიკაში. კარგი იქნებოდა, მოეთმინა რამდენიმე დღე და შემდეგ ეკეთებინა ეს განცხადებები. უფრო ადეკვატური იქნებოდა", - განაცხადა სოზარ სუბარმა.
მისივე შეფასებით, ეროვნული ბანკის პრეზიდენტი გაცილებით სხვა თემებზე უნდა საუბრობდეს, ვიდრე ეს პოლიტიკური განცხადებებია.
კითხვაზე, რატომ არ მოუსმინეს დეპუტატებმა გიორგი ქადაგიძის მოხსენებას, სუბარმა აღნიშნა, რომ პარლამენტში პოლიტიკური განცხადებებისთვის არის ჩიორა თაქთაქიშვილი და "კიდევ ერთი თაქთაქიშვილის დამატება საჭირო არ არის".
"პარლამენტმა რატომ არ მოუსმინა ქადაგიშვილს, პარლამენტის წევრებს ვკითხოთ. თუ პარლამენტში იგივე უნდა ელაპარაკა, რაც გუშინ გააკეთა პოლიტიკური განცხადებები, ისედაც ბევრი კეთდება. ჩიორა თაქთაქიშვილი საკმარისია ამისთვის პარლამენტში. არ არის საჭირო კიდევ ერთი თაქთაქიშვილის დამატება. ბანკის პრეზიდენტმა უნდა ისაუბროს სხვა თემებზე და არა აკეთოს პოლიტიკური განცხადებები", - განაცხადა სოზარ სუბარმა.
