"მაესტროს დირექტორი" ბაია გადაბაძე მის მიმართ მიზანმიმართული დევნის დაწყებაზე საუბრობს და სასამართლოს მიმართავს.

როგორც გადაბაძემ თბილისის საქალაქო სასამართლოში საჩივრის შეტანის შემდეგ განაცხადა, იგი მოითხოვს, რომ, სანამ დევნაზე მისი განცხადების თაობაზე გარემოებები არ დადგინდება, მანამდე შეჩერდეს ყველა კრების ოქმი, რომელიც არსებობს.

"ჩემს მიმართ მიმდინარეობს მიზანმიმართული დევნა. ამოცანა არის ის, რომ 19 თებერვალს, როდესაც დანიშნულია კრედიტორთა კრება, მე არ ვიყო დირექტორი. მიმაჩნია, რომ ნაწილობრივ ამ პროცესში სასამართლოც მონაწილეობს, პირდაპირ კი ამას აკეთებს გაჩეჩილაძეების მხარე. თეორიულად არსებობს შანსი, რომ 48 საათის განმავლობაში ორი ინსტანციის სასამართლომ განიხილოს საჩივარი, ორივემ მიიღოს გადაწყვეტილება, მიაწოდოს საჯარო რეესტრს, რეესტრმა კი სასწრაფოდ განიხილოს ეს ყველაფერი და პარასკევს, 19 თებერვალს, 14:00 საათზე მე აღარ ვიყო დირექტორი. ამის ეჭვი მაქვს. ჩემს მიმართ მიმდინარეობს დევნა და სასამართლოს ვთხოვ, ყველა ოქმის შეჩერებას, ვიდრე ეს საკითხი გაირკვევა. ლევან გაჩეჩილაძეს სურს, რომ ის გახდეს დირექტორი და ჩაშალოს ყველაფერი რაც "მაესტროს" რეაბილიტაციისთვის არის საჭირო", - განაცხადა ბაია გადაბაძემ.

საჩივრის შეტანის შესახებ ბაია გადაბაძე დღესვე საჯარო რეესტრს განცხადებით აცნობებს.