საქართველოს პარლამენტის თავმჯდომარე დავით უსუფაშვილი ოპოზიციას მოუწოდებს, "სანამ სულ გვიან არ არის" მხარი დაუჭიროს მმართველი გუნდის საკონსტიტუციო ცვლილებებს, რომელიც 2016 წლის არჩევნების შემდეგ პროპორციულ სისტემაზე გადასვლას გულისხმობს.
როგორც უსუფაშვილმა ჟურნალისტებს ვენეციის კომისიის დელეგაციასთან შეხვედრის შემდეგ განუცხადა, საპარლამენტო არჩევნების შემდეგ აღნიშნული ცვლილებების განხორციელება ისევე რთული აღმოჩნდება, როგორც ახლა. რაც შეეხება საარჩევნო კანონმდებლობაში უკვე შეტანილ ცვლილებებს, დავით უსუფაშვილის შეფასებით, ისინი არა თუ შეესაბამება, აღემატება კიდეც ვენეციის კომისიის სტანდარტებს.
"დღევანდელი შეხვედრა იყო ძალიან საქმიანი და კეთილგანწყობილი. კოლეგებმა ვენეციის კომისიიდან, ეუთო-ს მისიიდან მოისმინეს ყველა ის არგუმენტი, რაც საფუძვლად დაედო ჩვენს მიერ მიღებულ გადაწყვეტილებას, იმ გეგმას, რომელიც შედგება ორი პუნქტისგან. პირველი არის 2016 წლის არჩევნების ჩატარება შერეული სისტემით, რომელიც არათუ შეესაბამება ვენეციის კომისიის სტანდარტებს, არამედ აღემატება კიდეც მას. სტუმრებიც დაგვეთანხმნენ იმაში, რომ საქართველოს საკონსტიტუციო სასამართლომ იმაზე მაღალი სტანდარტი დაადგინა, ვიდრე ვენეციის კომისიას აქვს და სწორედ ამ სტანდარტიდან გამომდინარე მოგვიწია ჩვენ ძალიან ბევრი რაიონის გაერთიანება. რაც შეეხება შემდგომ პერიოდს, ჩვენ ავუხსენით კოლეგებს, რომ პროპორციულ სისტემაზე გადასვლა გათვალისწინებულია არა 2020 წლისთვის, არამედ 2016 წლის შემდგომვე. ანუ თუ მოხდება რიგგარეშე არჩევნები ან სხვა რამ, ჩვენ 2016 წლიდანვე, შემოდგომის ბოლოდან გვექნება ახალი სისტემა", - განაცხადა უსუფაშვილმა, თუმცა დასძინა, რომ ამას სჭირდება გადაწყვეტილების მიღება, რისთვისაც ცოტა დრო რჩება.
"საკონსტიტუციო ცვლილებების განხორციელებას სჭირდება ორ სესიაზე გადაწყვეტილების მიღება და სამი თვე, მათ შორის ზაფხული ძალიან დატვირთული იქნება წინასაარჩევნო კამპანიით. ასე რომ, იმედია, ჩვენი კოლეგები ოპოზიციიდან ბოლო-ბოლო დაინახავენ იმის აუცილებლობას, რომ ჩვენს მიერ ინიცირებულ საკონსტიტუციო ცვლილებებს სჭირდება მხარდაჭერა, სანამ სულ გვიან არ არის და სანამ ყველაფერი თავიდან არ დაიწყება 2016 წლის შემდეგაც, ისევე, როგორც ეს ხდებოდა განვლილი 25 წლის განმავლობაში, როდესაც მოახლოებული არჩევნების წინ იყო სისტემის შეცვლის მცდელობა. ეს ვერ ხერხდებოდა და სისტემა გვრჩებოდა უცვლელი", - განაცხადა დავით უსუფაშვილმა.
