პარტია "ქართული ოცნების" პოლიტსაბჭოს წევრი არმაზ ახვლედიანი პარტიის მუშაობას აკრიტიკებს და მომავალ თავმჯდომარე გიორგი კვირიკაშვილს "ბებერი პოლიტიკური ნიანგების" სწრაფად ჩამოშორებას უსურვებს. შესაბამისი განცხადება ახვლედიანმა "ინტერპრესნიუსთან" საუბარში გააკეთა.
მისი თქმით, პარტიის პოლიტსაბჭოში რჩება და საუკეთესო პერიოდად იმ დროს მიიჩნევს, როდესაც ბიძინა ივანიშვილი "ქართული ოცნების" საპატიო თავმჯდომარე იყო.
"ჩემი სურვილია, რომ ხელი შევუწყო სხვა ადამიანებთან ერთად, პარტიაში ჯანსაღი დემოკრატიული პროცესის გაღვივებას. თუ ეს გამოვა, ძალიან კარგი იქნება.
ჩემს გეგმაში რომ ყოფილიყო, აქამდეც შევძლებდი პარტიის პოლიტსაბჭოს დატოვებას, თუმცა - ვრჩები, უბრალოდ არ ვმონაწილეობ პოლიტსაბჭოს მუშაობაში. არჩეული წევრი ვარ და მაქვს ჩემი აზრი პარტიაში მიმდინარე პროცესებთან დაკავშირებით და ამას ვაფასებ ძალიან კრიტიკულად. ეს აზრი მას შემდეგ გამიჩნდა, რაც პარტიაში გავწევრიანდი და გავხდი, "ქართული ოცნების" აღმასრულებელი მდივანი. პერიოდულად ამ აზრს გამოვთქვამდი და არავის ვუმალავდი. ძალიან კრიტიკული ვიყავი შეფასებებში, მაგრამ ხშირად ამის გათვალისწინება არ ხდებოდა და ინერციით მიდიოდა პარტიული ხელმძღვანელობა - გადაწყვეტილებების მიმღებები", - განაცხადა არმაზ ახვლედიანმა.
პარტიის ყოფილი აღმასრულებელი მდივნის განმარტებით, თუ კვლავაც ამ დინებას გაყვება "ქართული ოცნება" და არ დაიწყება რადიკალური, ძირეული რეფორმები - პარტიაში არ შევლენ ნორმალური, დემოკრატიული აზროვნების მქონე, გამოცდილი, განათლებული და წესიერი ადამიანების ჯგუფი, "ქართულ ოცნებას" ძალიან სერიოზული პრობლემები შეექმნება.
"ადამიანურად, პოლიტსაბჭოს ყველა წევრს პატივს ვცემ და მიმაჩნია, რომ ყველას თავისი დამსახურება შეიძლება ჰქონდეს. იქ არიან გამოცდილების მქონე და განათლებული ადამიანები, თუმცა საქართველოში ხშირად გვიწევს არჩევანის გაკეთება ცუდს და უარეს შორის და არა - კარგს და უკეთესს შორის. მე მინდა, რომ უახლოეს მომავალში "ქართულმა ოცნებამ" არჩევანი გააკეთოს კარგს და უკეთესს შორის, ეს არის საზოგადოების შეკვეთა", - აღნიშნა მან.
შეკითხვაზე, ვინ უნდა დატოვოს მისი აზრით პარტია, ახვლედიანის თქმით, შესაძლოა წასვლით არავინ უნდა წავიდეს და პარტიაში დარჩნენ კიდეც თუ ამის სურვილი ექნებათ, თუმცა "ზოგადად პარტიაში და ხელისუფლებაში კონფორმიზმის იდეით მოსულ ადამიანებს რიგითი წევრობა არ უნდათ ხოლმე, რადგან ხელმძღვანელობა აძლევს საშუალებას კომფორტულად იგრძნონ თავი და აკეთონ თავისი და არა საქვეყნო საქმეები".
"მიმოვიხედოთ, რამდენ გულანთებულ, დემოკრატიულად მოაზროვნე ადამიანს დავინახავთ, რომლებიც პოლიტიკური პროცესების მიღმა არიან. ისინი უნდა იყვნენ ჩვენს მაგივრად. ახლა სახელებს არ ვიტყვი, რადგან აქ პრობლემა არა სახელებში, არამედ იმ ტენდენციებშია, რომელიც ბოლო დროს გამოიკვეთა. ერთს გეტყვით, განსაკუთრებული სიამოვნებით ვიხსენებ იმ პერიოდს, როდესაც პარტიის საპატიო თავმჯდომარე იყო ბიძინა ივანიშვილი. მას ჰქონდა მართვის გაცილებით დემოკრატიული სტილი, ვიდრე დღეს ბევრი ამას იბრალებს. სამწუხაროდ, იგი ადრე წავიდა პოლიტიკიდან და ასპარეზი დარჩათ ისეთებს, ვისთვისაც დემოკრატია მხოლოდ სიტყვაა და მეტი არაფერი", - განაცხადა ახვლედიანმა.
მან პარტიის თავმჯდომარის პოსტზე გიორგი კვირიკაშვილის კანდიდატურაც შეაფასა და აღნიშნა, რომ პრემიერმა რაც შეიძლება მალე უნდა მოახერხოს "ქართულ ოცნება – დემოკრატიულ საქართველოში" დემოკრატიულად მოაზროვნე გუნდის შეკრება.
"მე მინდა ვუსურვო კვირიკაშვილს, რომ რაც შეიძლება სწრაფად გაათავისუფლოს ბებერი პოლიტიკური ნიანგებისგან პარტია და მოახერხოს ჯანსაღი, დემოკრატიულად მოაზროვნე გუნდის შემოკრება. ასეთ შემთხვევაში, მის ლიდერობას პარტიაში აზრი ექნება, ყველა სხვა შემთხვევაში კი, ეს იქნება ისევ მოჯადოებულ წრეზე ყოფნა. ნიანგები საკუთარ თავს მარტივად ამოიცნობენ", - აღნიშნა არმაზ ახვლედიანმა.
