საკრებულოს დამოუკიდებელი დეპუტატი ალეკო ელისაშვილი პარლამენტში მისვლას და პოლიტპატიმრებთან შეხვედრის აზრს ვერ ხედავს.
როგორც "ინტერპრესნიუსს" ელისაშვილმა განუცხადა, იგი არაფერს ამბობს პოლიტპატიმრებზე და მისთვის გაუგებარია, რატომ აქტიურობს მათი ერთი ნაწილი.
"პოლიტპატიმრები გარდა ერთი წინადადებისა, მე არ მიხსენებია. იმ წინადადებაშიც გავიმეორე ის სიტყვები, რაც ბიძინა ივანიშვილმა თქვა - რამდენიმე ადამიანი ფულის გადახდის სანაცვლოდ გათავისუფლდა. ჩემთვის გაუგებარია რატომ აქტიურობს ამ ადამიანების ერთი ნაწილი, პრინციპში გასაგებია, რომ მათ ბესელია მართავს. მე არ ვსაუბრობ პოლიტპატიმრებზე, ვსაუბრობ შეწყალების კომისიაში კორუფციაზე და რატომ უნდა მივიდე კომიტეტის სხდომაზე არ მესმის. მივიდნენ ეს ადამიანები და ესაუბრონ ბესელიას. ჩემი მისვლის აზრს ვერ ვხედავ", - განაცხადა ალეკო ელისაშვილმა.
მისივე თქმით, "ე.წ. პოლიტპატიმრები მასზე რატომ ნერვიულობენ, გაუგებარია".
"ამ ადამიანებმა უნდა ინერვიულონ იმაზე, რომ ის პროკურორები, რომლებმაც ბრალი წარუდგინეს კვლავ პროკურატურაში მუშაობენ, მოსამართლეები, რომლებმაც მიუსაჯეს, კვლავ ასრულებენ მოვალეობას და პოლიცია, რომელმაც დააკავა, ისევ მუშაობს", - განაცხადა ალეკო ელისაშვილმა.
პარლამენტის ადამიანის უფლებების დაცვის კომიტეტის თავმჯდომარე ეკა ბესელია და დეპუტატები 2012 წლის 28 დეკემბერს "ამინისტიის შესახებ" საქართველოს კანონის საფუძველზე პოლიტიკური პატიმრის სტატუსით გათავისუფლებულ პირებს დღეს შეხვდებიან.
