უმრავლესობა საგაზაფხულო სესიის ფარგლებში, საკონსტიტუციო ცვლილებების ინიცირებას გეგმავს, რომელიც ქორწინების, როგორც ქალისა და მამაკაცის ერთობის, კონსტიტუციის დონეზე განსაზღვრას ითვალისწინებს.
როგორც "ინტერპრესნიუსს" უმრავლესობის ერთ-ერთმა ლიდერმა გია ვოლსკიმ განუცხადა, ამ ეტაპზე პროცედურული დეტალები თანხმდება.
დეპუტატის აზრით, საქმე ეხება არა მხოლოდ საქართველოში არსებული ტრადიციების და განწყობების გათვალისწინებას, არამედ ქვეყნის უსაფრთხოების საკითხს.
"სამოქალაქო კოდექსში ნათლად არის გაწერილი, რომ ქორწინება ქალისა და მამაკაცის ერთობას წარმოადგენს, მეუღლეების თანასწორობის გარანტირებით და დედისა და ბავშვის უფლების დაცვით. კონსტიტუციაში არსებობს ჩანაწერი, სადაც დედა და ბავშვი მოხსენიებულია, მაგრამ ჩვენი აზრით, მოკლე დამატება საჭიროა, რათა ერთხელ და სამუდამოდ გახდეს ნათელი, თუ რას ვგულიხმობთ ქორწინებაში. კონსტიტუციაში ეს მკაფიოობა აუცილებლად შესატანია, რადგან, როგორც ჩანს, სხვადასხვა ჯგუფები ამ თემით სპეკულურებას აპირებენ. საქმე არა მარტო საქართველოში მცხოვრები ადამიანების ტრადიციების და განწყობების გათვალისწინებას ეხება, არამედ ქვეყნის უსაფრთხოებიდან გამომდინარე, დესტაბილიციის ნიშნებიც არ უნდა დავუშვათ და დაინტერესებულ ჯგუფებს ამ თემით სპეკულირების საშუალება არ უნდა მივცეთ", - განუცხადა "ინტერპრესნიუსს" გია ვოლსკიმ.
