"საქართველოს ხმის" დამფუძნებლის, ბიძინა კუჭავას ავტომობილის დათვალიერებისას "მაკაროვის" ტიპის იარაღი და მჭიდი აღმოაჩინეს.
კუჭავას "მერსედესის" მარკის ავტომობილს წუხელ, 11 საათის განმავლობაში პოლიციის მთავარ სამმართველოში ათვალიერებდნენ.
დათვალიერების პროცესს კუჭავას ქვრივი მარინა ნიკოლოზაშვილის და ოჯახის ადვოკატი ნათია კორკოტაძე დაესწრნენ, რომლებსაც ავტომობილის სავარძლის ქვეშ, იარაღის არსებობა საეჭვოდ მიაჩნიათ.
მათი ინფორმაციით, ავტომობილი ცაგარელის ქუჩაზე 2 დღე, ღია მდგომარეობაში იდგა, შემდეგ კი დალუქეს. მათ გააჩნიათ შეკითხვები, რატომ ვერ აღმოაჩინეს ავტომობილში იარაღი სამართალდამცველებმა დალუქვამდე.
"მანქანა დაათვალიერეს, დალუქეს და შემდეგ გადმოიყვანეს ქალაქის პოლიციის სამმართველოში. დამატებითი დათვალიერების შემდეგ კი, მასში აღმოჩნდა იარაღი. ეს ჩვენთვის ძალიან მოულოდნელი იყო. გავარკვევთ ვის ეკუთვნის ეს იარაღი", - განაცხადა ადვოკატმა.
ბიძინა კუჭავას ქვრივის მარინა ნიკოლოზაშვილის თქმით კი, ოჯახის პოზიცია გამყარდა ეჭვებთან დაკავშირებით.
"ეჭვები კვლავ მაქვს და უამრავი ახალი კითხვა გამიჩნდა. როგორც თავიდან ვაცხადებდი, ახლაც გამოვრიცხავ, რომ ბიძინა კუჭავამ თავი მოიკლა", - განაცხადა გარდაცვლილის მეუღლემ.
