მთავარი პროკურორის, ირაკლი შოთაძის განმარტებით, საქართველოს ყოფილი პრეზიდენტის, მიხეილ სააკაშვილისთვის მოქალაქეობის შეწყვეტა პროკურატურისთვის გარემოებებს არ ცვლის. ამის შესახებ ირაკლი შოთაძემ გადაცემაში "პოლიტიკა" განაცხადა, როდესაც უპასუხა კითხვას, მიხეილ სააკაშვილისთვის მოქალაქეობის შეწყვეტა პროკურატურას მის სამართლებრივ დევნას გაუიოლებს თუ გაურთულებს.
როგორც ირაკლი შოთაძემ აღნიშნა, ყოფილი პრეზიდენტის მიმართ არსებობს 4 სისხლის სამართლის საქმე, ოთხივე სასამართლოშია და მიმდინარეობს არსებითი განხილვა.
"რაც შეეხება ყოფილი პრეზიდენტისთვის მოქალაქეობის შეწყვეტას, მინდა გითხრათ, რომ ეს არც გააუარესებს და გააუმჯობესებს იმ პერსპექტივებს", -განაცხადა შოთაძემ.
მთავარმა პროკურორმა განმარტა შესაბამისი პროცედურებიც. "ვთქვათ, მან მიიღო უკრაინის მოქალაქეობა, ამ შემთხვევაში უკრაინას, როგორც უმეტეს ქვეყნებს, აქვს კონსტიტუციური გარანტია თავისი მოქალაქეებისადმი და არ ახდენენ ამ პირების ექსტრადირებას. თუმცა, მიუხედავად ამისა, მანამდე, სანამ მას ჰქონდა საქართველოს მოქალაქეობაც, საქართველოს პროკურატურამ მიმართა ოფიციალურად უკრაინის პროკურატურას და მოვთხოვეთ მიხეილ სააკაშვილის ექსტრადირება საქართველოში, რაზეც მათგან მივიღეთ ოფიციალური პასუხი.
შესაბამისად, ის სიტუაცია, რაც არსებობდა მოქალაქეობის შეწყვეტამდე, მას მაინც ჰქონდა უკრაინის მოქალაქეობა. შესაბამისად, ეს ჩვენთვის გარემოებებს არ ცვლის", - განაცხადა შოთაძემ.
როგორც მთავარმა პროკურორმა განმარტა, თუ სააკაშვილის დაკავება ბრალდებულის სტატუსით მოხდება უცხოეთში, ამ შემთხვევაში უკრაინის მოქალაქე არის თუ არ არის, ამას მნიშვნელობა არ აქვს და, ამ შემთხვევაში გადამწყვეტი არის ის ბრალდებები, რასაც მას ედავება საქართველოს მხარე.
