"ერთიანი ნაციონალური მოძრაობის" წევრის ნუგზარ წიკლაურის აზრით, საქართველოს ყოფილი პრეზიდენტის და ოდესის გუბერნატორის მიხეილ სააკაშვილისთვის მოქალაქეობის შეწყვეტა სამართლებრივი ბერკეტების პოლიტიკური ნიშნით გამოყენებაა.
როგორც წიკლაურმა ჟურნალისტებს განუცხადა, "ხელისუფლების მხრიდან ასეთი ოდიოზური ქმედების არაერთ შემთხვევას ჰქონია ადგილი და ეს ამ პრაქტიკის გაგრძელებაა".
"მიხეილ სააკაშვილის სახელთან არის დაკავშირებული ძალიან მნიშვნელოვანი გარდაქმნები ჩვენს ქვეყანაში. ახლა იმის გამო, რომ 2016 წელი ახლოვდება, ხელისუფლებას აქვს არჩევნებში დამარცხების შიში. ამიტომ გადაწყვიტეს, ამ გზებით აღუკვეთონ მას საქართველოს პოლიტიკურ ცხოვრებაში მონაწილეობის შესაძლებლობა, თუმცა ასეთი მექანიზმებით შეზღუდვა ვერ მოხდება. მიხეილ სააკაშვილი ის პოლიტიკური ლიდერია, რომელსაც მნიშვნელოვანი გავლენა ექნება პოლიტიკაზე. ცხადია, ის რჩება "ერთიანი ნაციონალური მოძრაობის" პოლიტიკურ ლიდერად, მიუხედავად იმისა, თუ რა სახის წინააღმდეგობებს შეუქმნის ხელისუფლება" , – აცხადებს ნუგზარ წიკლაური
ამასთან, ნუგზარ წიკლაურის ცნობით, პარტიის თავმჯდომარის არჩევის საკითხთან დაკავშირებით პოლიტსაბჭო შეიკრიბება და იმსჯელებს. თავად წიკლაური მიიჩნევს, რომ ამ ეტაპზე, ახალი პოლიტიკური ლიდერის არჩევა აუცილებელი არ არის.
"რეალურად, მიხეილ სააკაშვილი არის ლიდერი "ნაციონალური მოძრაობისთვის", ხოლო სხვა ტექნიკური ხასიათის დეტალები იმის მიხედვით გადაწყდება, როგორი ვითარება იქნება", - აღნიშნა წიკლაურმა.
