ახალ ალიანსს, რომელიც ბიძინა ივანიშვილის ირგვლივ იკვრება, კიდევ ერთი პარტია შეემატა – თავისუფალი დემოკრატებისა და რესპუბლიკელების რიგებს „ეროვნული ფორუმი“ შეავსებს. თუმცა კი, თავისუფალი დემოკრატებისა და რესპუბლიკელებისგან განსხვავებით, ფორუმს ხანგრძლივად მოუწია ფიქრი, რომ აღნიშნულ ალიანსს შეერთებოდა, ან პირიქით – ივანიშვილმა გამოიყენა ეს დრო ფორუმზე დასაკვირვებლად. თუმცა ვერ ვიტყვით, რომ ამ ინტერვიუს ყველაზე საინტერესო ნაწილი სწორედ ეს თემაა. კვლავაც აქტუალურია ამერიკის პეზიდენტთან მიხეილ სააკაშვილის შეხვედრა და შეხვედრა ვიცე–პრეზიდენტ ჯო ბაიდენთან. სხვათა შორის, ეს თემა ობამა–სააკაშვილის შეხვედრის განხილვებმა (შინ თუ გარეთ) გადაფარა და ყურადღემის მიღმა დარჩა სწორედ ის საკითხები, რომელიც სავარაუდოდ ბაიდენთან შეხვედრის დროს უნდა განხილულიყო.

კიდევ, საზოგადოებისთვის სხვა, ბევრ საინტერესო თემაზე ვისაუბრეთ ჩვენს რესპოდენტთან და ამიტომ, უკეთესია საუბრის ჩანაწერი ინტერვიუს სახით შემოგთავაზოთ, რომელიც თავისუფალი დემოკრატების ლიდერთან ირაკლი ალასანიასთან ჩავწერეთ.

ყველაზე ცხელი თემით დავიწყოთ, ალიანსი გაფართოვდა, მაგრამ საინტერესოა რატომ გაგრძელდა ამდენი ხანი ფორუმთან მოლაპარაკებები? პრობლემა თქვენში იყო თუ ფორუმის ლიდერებში?

– მოლაპარაკება თითქმის ერთ თვეს გრძელდებოდა და სიმართლე გითხრათ, წინააღმდეგობა არ ყოფილა. უბრალოდ, ეს ის პერიოდი იყო, როდესაც ჩვენ ახალ პარტნიორთან ერთად დაკავებული ვიყავით შიდასტრუქტურული საკითხების მოწესრიგებით, რომელიც ამ ალიანსის წარმატებულ საარჩევნო კამპანიას უნდა დაედოს საფუძვლად. ასე რომ, თავისთავად, ფორუმთან ურთიერთობის გადაწყვეტა მნიშვნელოვანი იყო, მაგრამ სხვა უფრო მნიშვნელოვანი საკითხებიც იყო, რომლითაც ვიყავით დაკავებული.

ფორუმის გადაწყვეტილება ჩვენთვის საბოლოოდ, ამ რამდენიმე დღის წინ გახდა ცნობილი და დღეს, საბოლოოდ შედგა შეთანხმება ივანიშვილს, ფორუმსა და ჩვენს შორის. ყოველ შემთხვევაში, განსაკუთრებულად ეს საკითხი არც გაჭიმულა და არც ფორსირება არ მოგვიხდენია.

კითხვა რომ უფრო ნათელი იყოს, ასე დაგისვამთ – ბიძინა ივანიშვილის მხრიდან კითხვები არ არსებობდა რესპუბლიკელებისა და თავისუფალი დემოკრატების მიმართ, მაგრამ  ფორუმის მიმართ კითხვები თავიდანვე დასვა ივანიშვილმა, რაც ალბათ, წარსულში მათი პოლიტიკური ნაბიჯებიდან გამომდინარე უნდა დასმულიყო. ახლა კი პირდაპირ გკითხავთ, რამდენად ენდობით ერთმანეთს, თუ ძალაში რჩება ბიძინა ივანიშვილის გამონათქვამი – „რაც ვართ ეს ვართ...“

– შემიძლია გითხრათ ფორუმი არის ის ძალა, რომლის მიმართაც მე პირადად, ჩემს პარტნიორებს – ბატონ ბიძინას, დათოს აქვთ ნდობა და ამიტომაც გამოცხადდა ეს გადაწყვეტილება. ბიძინასთვის ფორუმი და ფორუმის ლიდერები არ იყვნენ თავიდანვე ცნობილი და ამიტომაც ორივეს დასჭირდა დრო, რათა გაერკვიათ ერთმანეთის ღირებულებები და შეხედულებები. ბუნებრივია, ამისთვის ერთი შეხვედრა არ იყო საკმარისი და ამიტომაც მოხდა რამდენიმე შეხვედრა. ჩემთვის კი უფრო მნიშვნელოვანია, რომ დღეს ალიანსისთვის, ფორუმისთვისაც და ქართული საზოგადოებისთვისაც სასურველი და საჭირო გადაწყვეტილება იქნა მიღებული.

და შემდეგი ნაბიჯი რა იქნება? ლოგიკურად ამას უფრო ქმედითი ნაბიჯები უნდა მოყვეს. საზოგადოება უკმაყოფილოა თქვანი ინერტულობით.

– საზოგადოების მხრიდან მეც მესმის და ძალიან ხშირად, შეხვედრების დროს მოქალაქეები მეკითხებიან როდის დაიწყება აქტიური ფაზა. მინდა ვისარგებლო ამ ინტერვიუს საშუალებით  და ყველას ავუხსნა – ჩვენ ვამზადებთ სისტემას, რომელიც ჩვენი ალიანსის შექმნის დღიდან ადეკვატური და სწორად  ფუნდამენტჩაყრილი იქნება. ძალიან მალე, შემიძლია ვთქვა – უახლოეს დღეებში, ბიძინა ივანიშვილის პარტიის საინიციატივო ჯგუფს წარადგენს და სწორედ ამის შემდეგ გამოცხადდება ალიანსი იმ პოლიტიკური ძალების, ვინც ერთად ვაპირებთ  საპარლამენტო არჩევნებში საარჩევნო წარმატების მიღწევას და სწორედ ამის შემდეგ დაიწყება დინამიკის ზრდა და კამპანიურ რეჟიმზე გადასვლა.

ივანიშვილის პარტია ჯერჯერობით არ შექმნილა და მას არც ხელმძღვანელი ყავს, რაც ცოტა გაუგებრობებს იწვევს. თავიდან  ითქვა, რომ ეკატერინე ხვედელიძე ჩაუდგებოდა პარტიას სათავეში, მაგრამ შემდეგ ეს თემა გადავიდა მეორე პლანზე. ვინ იქნება პარტიის ლიდერი?

– ეს კავშირშია ბიძინა ივანიშვილის მოქალაქეობასთან, თუმცა დარწმუნებული ვარ, რომ ხელისუფლებას სხვა გამოსავალი არ აქვს თუ არა მიანიჭოს მას მოქალაქეობა.

ხელისუფლებას ერთი თვე აქვს ვადა, ამიტომ ჩვენ არ ველოდებით ბიძინა ივანიშვილის მოქალაქეობას, მიღებულია გადაწყვეტილება, რომ შეიქმნას პარტია. საინიციტივო ჯგუფი არის პირველი ნაბიჯი და შემდეგ, ალიანსურ რეჟიმზე გადავალთ.

და რა იქნება მერე?

– კამპანია. მერე იქნება ჩვენი ალიანსის  წარმომადგენლების შეხვედრები საზოგადოებასთან თითოეულ სოფელში. რაც მთავარია, იმ ალტერნატივის წარმოჩენა – რითი იქნება ჩვენი ერთობლივი პოლიტიკური ძალა უკეთესი ჩვენი ქვეყნისთვის, რას გააკეთებს ყველა მიმართულებით – განათლების, სოციალურ სფეროებში, ეს იქნება მცირე და საშუალო ბიზნესის ხელშეწყობა, სამუშაო ადგილების შექმნა, სოფლის მეურნეობის ფეხზე დაყენება და ა.შ.  დარწმუნებული ვარ ჩვენი ამომრჩევლის დიდ მხარდაჭერას მოვიპოვებთ. ამას სჭირდება ყოველდღიური  შეხვედრები და სწორედ ამას ვიძახდი სექტემბერში, როდესაც ჩემს პარტნიორებს მოვუწოდებდი, რომ ერთად გვევლო რეგიონებში იმ ხალხთან, ვისთანაც ტელემედიის მონოპოლიის გამო ინფორმაციის დეფიციტი იგრძნობა. ახლა უკვე, ერთობლივად დავიწყებთ ამის კეთებას.

ბოლო ინტერვიუში რესპუბლიკელებთან დაკავშირებით საინტერესო ფრაზა თქვა ბიძინა ივანიშვილმა. ის ამბობს, რომ რესპუბლიკელები არიან  დაბალრეიტინგული პარტია, რაც გარკვეულწილად, შესაძლოა, საზოგადოების დაბალი პოლიტიკური კულტურის ბრალიც არის, მაგრამ ამავდროულად ეს რესპუბლიკელების პრობლემაცაა, რადგან მათ არ შეუძლიათ ხალხს ხალხის ენით ელაპარაკონ. რაც შეგეხებათ თქვენ, „ხალხოსნობით“ ვერც თქვენ იტრაბახებთ, რადგან დიპლომატიამ თავისი კვალი დაგატყოთ. ჩვენი საზოგადოება კი, მყვირალა ფრაზებს შეეჩვია და თქვენი გაწონასწორებული და შორსმიმავალ გეგმებზე საუბრები დიდად არ სიამოვნებთ. არ თვლით, რომ ეს ბარიერი რეალურად დგას თქვენსა და საზოგადოებას შორის?

– თუ დამერწმუნებით, რეალურად აღარ დგას. მე თვითონაც შევიცვალე, ასე ვთქვათ, საუბრის მანერაც შევიცვალე და მე ამას ვგრძნობ. რამდენი მეტად  გავდივარ ხალხში იქიდან უკეთესი ქართველი ვბრუნდები, ჯერ ერთი, უფრო სწორედ ვგებულობ სატკივარს და მართლაც ვხვდები, რომ შენი ენაც, შენი შეთავაზებაც უნდა იყოს იმ ადამიანისთვის გასაგები და პირველ რიგში, ამიტომ მაქვს სულ წამოწეული ის მტკივნეული საკითხები როგორიც არის სოფლის მეურნეობა, როგორიც არის მიტოვებული გლეხი, მიტოვებული სკოლები, დახურული სავადმყოფოები რომელმაც უმუშევრობის დონე აამაღლა. ბოლო ორი თვის განმავლობაში ამ თემებზე გვაქვს საუბარი და იმ ენით, რაც გასაგები იქნება იმ ადამიანებისთვის ვისთვისაც მინდა, რომ ეს ცვლილებები განხორციელდეს.

სხვათა შორის, ფურუმი მართლაც შენაძენია ამ კუთხით, გუბაზ სანიკიძეს ყველაზე უკეთ გამოსდის ეს...

– გეთანხმებით, რომ ჩვენ ვავსებთ ერთმანეთს. ამასთან, არ არსებობს არცერთი თვითკმარი პოლიტიკური ორგანიზაცია საქართველოში. ჯერ ერთი იმიტომ, რომ ოცი წლის განმავლობაში  მრავალპარტიულ პოლიტიკურ სისტემას განვითარების საშუალება არ მიეცა. ხელისუფლება ყოველთვის ცდილობდა  მთელი სივრცის მონოპოლიზება მოეხდინა. ჩვენ ამის შეცვლა გვინდა, ამიტომაც ვართ ერთმანეთის გვერდიგვერდ ფორუმი, რესპუბლიკელები, თავისუფალი დემოკრატები, ბიძინა ივანიშვილის პარტია, რომელიც შეიქმნება, ზვიად ძიძიგური თუ ნებისმიერი სხვა. ჩემი აზრით, ისეთი პოლიტიკური ძალის კონტურები იკვეთება, რომელიც ყველა გემოვნების ამომრჩეველს პასუხობს და საკუთარ ენაზეც  დაელაპარაკება.

რაც შეეხება ნდობა–უნდობლობას, პოლიტიკაში და ზოგადად ცხოვრებაში, ყოველთვის დგას ადამიანი თუ ძალა იმ დილემის წინაშე ვინ არის სანდო და ვინ – არა. მე ყოველთვის მხარს ვუჭერ გადაწყვეტილებას, რომ ენდო ადამიანებს. ენდო ადამიანებს იმიტომ, რომ ეს ნდობა მათში უკეთესს წამოწევს, ვიდრე ეჭვი და უნდობლობა, მაგრამ აქ უნდა იყოს გარკვეული თანხვედრა.   ფორუმთან უკვე რამდენიმე წელია ვპარტნიორობთ, ეს არის ტრადიციული, ეროვნული ძალა, რომელსაც არაერთხელ, ხაზგასმით უთქვავს, რომ საქართველოს მომავალს ხედავენ ევროპულ ოჯახში. ანუ, ტრადიციების შენარჩუნება, მოვლა არის ჩვენთვისაც ასევე ღირებულია, მაგრამ ამის პროგრესულად წინ წაწევა უკავშირდება ჩვენს ადგილს ევროპულ ოჯახში. ასე რომ, ფუნდამენტალურ საკითხებში არც არასდროს გვქონია განსხვავება და დღესაც ვემთხვევით ერთმანეთს.

თუ ხედავთ სხვა პოლიტიკურ ძალას, რომელიც შესაძლოა გაწევრიანდეს ალიანსში, თუ ამით უკვე ალიანსი ჩაიკეტა?

- არა, ვერ ვიტყვი, რომ ჩაიკეტა, მაგრამ ვხედავ პოლიტიკურ ძალებს, ვისთანაც შეიძლება შეთანხმება მაჟორიტარულ ოლქებთან თანამშრომლობის კუთხით.

კონკრეტულად, რომელ ძალებს გულისხმობთ და მათ შორის არის თუ არა ნინო ბურჯანაძის პარტია?

- მესმის, რომ მაღლი ინტერესია ბურჯანაძესთან ურთიერთობასთან დაკავშირებით, მაგრამ მასთან არ განიხილება არანაირი ფორმით თანამშრომლობა. თუმცა, ვხედავ შეთანხმების შესაძლებლობას სხვა ძალებთან, თუ ასეთები გამოჩნდებიან,  რათა ჩვენ, ოპოზიციური ძალები არ დავუპირისპირდეთ ერთმანეთს მაჟორიტარულ ოლქებში.

სხვა ვინ რჩება - ძალები, რომლებიც ხელისუფლებასთან თანამშრომლობენ?

-  არა, აქ ძალიან მყარი შეფასებები გაკეთდა ჩვენი მხრიდან, არიან პოლიტიკური ძალები, რომლებიც პირდაპირ გაგრძელებები არიან „ნაციონალური მოძრაობის“. ეს ძალები ნაციონალების მხრიდან ფინანსდებიან და მათ მიერვე კონტროლირდებიან. ეს საზოგადოებისთვისაც ნათელია და ამიტომ მათთან თანამშრომლობის კუთხით დამატებთი კითხვები აღარ რჩება.

აქ არის საუბარი ისეთ ძალებზე, რომელთაც მართლა უნდათ მრავალპარტიული პოლიტიკური სისტემის ჩამოყალიბება, უნდათ, რომ კონკურენტული არჩევნები ჩატარდეს და, რომ შემდეგი პარლამენტი და ხელისუფლებაც იყოს დაბალანსებული. მე ვთვლი, რომ პრაქტიკულად ყალიბდება სახელისუფლებო ალტერნატივა, რომელიც შეძლებს „ნაციონალური მოძრაობა“ დაამარცხოს და უმცირესობაში გადაიყვანოს.

თქვენი განცხადებების მიღმა საზოგადოების ნაწილი რატომღაც კითხულობს ქვეტექსტებს, თითქოს, თქვენ წინასწარ ეგუებით აზრს, რომ შესაძლოა, უმრავლესობით ვეღარ მოხვიდეთ პარლამენტში და „ნაციონალურ მოძრაობასთან“ ითანამშრომლებთ. ანუ, „ბრალად გედებათ“ წაგებულის პოზიციიდან განცხადებების კეთება.

- მე ვეგუები და ვიგუებ აზრს, რომ „ნაციონალურ მოძრაობას“ უმცირესობაში ვიხილავ მომავალ პარლამენტში. ჩვენ იმ ძალას წარმოვადგენთ, რომელიც არ ისახავს ამოცანად გავანადგუროთ და პოლიტიკიდან წავშალოთ დღეს არსებული სახელისუფლებო ძალა. ჩვენ მოვდივართ უმრავლესობით, მაგრამ ამაზე სპეკულირება არის აბსოლუტურად არასწორი, რადგან ამას გადაწყვეტს საქართველოს მოსახლეობა, რომლიც მოვა არჩევნებზე და მე როგორ შეიძლება განვუსაზღვრო მას რა გადაწყვეტილება უნდა მიიღოს არჩევნების დღეს?

მაგრამ თქვენ ხომ ამბობთ, რომ კარგად იცნობთ საზოგადოების განწყობებს?

- დიახ, მე ვიცი საზოგადოებრივი განწყობები, რადგან ვიყავი 200-მდე სოფელში და დავინახე ის კონტრასტი, რაც  მოქალაქეებთან ჩემს ურთიერთობაში ბიძინა ივანიშვილის პოლიტიკაში გამოჩენამ შემოიტანა. როგორც ცა და დედამიწა, ისეთი გაასმაგებული ენთუზიაზმით და იმედით უყურებს ჩვენი მოსახლეობა რეგიონებში მომავალს. ასე რომ, ყალბი თავმდაბლობის გარეშე, მაქვს საფუძველი ვივარაუდო, რომ ჩვენ კონკურენტუნარიან არჩევნებში დიდი უმრავლესობით გავიმარჯვებთ.

არ ფიქრობთ, რომ ივანიშვილის გამოჩენამ პირადად თქვენც დიდი ფორა მოგცათ, რომ 2013 წლის საპრეზიდენტო არჩევნებში კონკურენტუნარიანად გამოიყურებოდეთ?

- ერთი მხრივ, ვიტყვი, რომ მე პირადად ასეთი მხარდამჭერი და პარტნიორი პოლიტიკაში ჯერ არ მყოლია. ბიძინა ივანიშვილის გამოჩენა მიასმაგებს ზურგსა და ენთუზიაზმს და მე ვხედავ წარმატების ფორმულას, მაგრამ ჩვენ ჯერ არ ვლაპარაკობთ, რა იქნება საპარლამენტო არჩევნების შემდეგ. ჯერ იმდენი საზრუნავი და საქმე გვაქვს ამ საპარლამენტო არჩევნებზე გასამარჯვებლად, რომ ჯერ, ამ საპარლამენტო არჩევნებზე ვართ კონცენტრირებული.

აპირებენ თუ არა პირადად ბიძინა ივანიშვილი და რესპუბლიკელები თქვენსავით რეგიონებში გასვლას?

- რა თქმა უნდა, ჩვენ ერთობლივად, როგორც ალიანსი, ვაპირებთ კამპანია ვაწარმოოთ ნაციონალურ დონეზე. ჩვენთვის ეს ძალიან მნიშვნელოვანია და ჩვენ ჩვენს კვალს ყველგან დავტოვებთ.

თვლით თუ არა, რომ ობამა-სააკაშვილის შეხვედრამ ქართულ პოლიტიკაში რამე შეცვალა?

- თავიდან გამოვყოფდი საკითხს, რომ ორი პრეზიდენტის შეხვედრა ძალიან მნიშვნელოვანი იყო, რადგან ჩვენი პარტნიორი ქვეყნის პრეზიდენტმა ქართულ-ამერიკული ურთიერთობის მთავარი აქცენტი ღიად დააფიქსირა. ამ ურთიერთობის განმტკიცების საფუძველთა საფუძველი კი მომავალი საპარლამენტო არჩევნების სამართლიანად ჩატარებაა, რომ პოლიტიკურ ძალებს პოლიტიკური აქტიურობისთვის თანაბარი პირობები ჰქონდეთ და შედეგად, ოფიციალური, ანუ სრულმასშტაბიანი ხელისუფლების ცვლილება შედგეს.

ეს არა მარტო ჩვენთვის არის ნათელი, ეს ნათელია სააკაშვილისთვის და ამიტომ იყო სიმბოლურიც, რომ საარჩევნო წელს მოხდა ეს შეხვედრა, მანამდე ამერიკის ადმინისტრაცია და თეთრი სახლი არ პატიჟებდა სააკაშვილს და მხოლოდ წელს მოხდა ეს შეხვედრა.

თუმცა საუბარი იყო იმაზეც, რომ ობამამ სააკაშვილს შეხვედრაზე თანხმობა რუსეთის მსო-ში გაწევრიანებაზე თანხმობის სანაცვლოდ მისცა.

- ეს იყო ერთ-ერთი ფაქტორი, ორმხრივ ურთიერთობებში არის ფუნდამენტალური ღირებულებები, რასაც ვერაფერი შეცვლის, მაგრამ არის ასევე, ტაქტიკური ნაბიჯები, რომელიც ურთიერთობებს პოზიტივისკენ, ან ნეგატივისკენ გადახრის. ჩვენი ვაჟკაცი მებრძოლების გმირული წვლილი, რომელიც მათ შეაქვთ ავღანეთში საომარ მოქმედებებში, ესეც უდიდესი ფაქტორია ორმხრივ ურთიერთობებში - ეს არის ქართულ-ამერიკული ურთიერთობების ძლიერი მხარე, მაგრამ საფუძველთა საფუძველი, რაც ლაითმოტივად გაყვა ყველა შეხვედრას, დაწყებული ვიცე-პრეზიდენტი იქნებოდა ეს თუ – სახელმწიფო მდივანი, არის ის, რომ საქართველოში ის დადებითი ძვრები, რაც აღინიშნა, კონსოლიდირებული იყოს და ინსტიტუციურ დემოკრატიად ჩამოყალიბდეს. ამისთვის კი, უნდა ჩატარდეს სამართლიანი არჩევნები და ხელისუფლება შეიცვალოს არჩევნების გზით.

ეს ტოვებს დიდ ველს ქართულ-ამერიკულ ურთიერთობებში სადამკვირვებლო მისიების ფორმირებისთვის. კონგრესმენების, სენატორების, სხვადასხვა არასამთავრობო ორგანიზაციების მხრიდან აქცენტი გადატანილია და USAID-ც ფინანსურად ემზადება, რომ ორმხრივ ურთიერთობებში აღებული ვალდებულება შესრულდეს. ახლა კი მთავარი სიტყვა არის ქართულ საზოგადოებაზე - გვინდა თუ არა შევდგეთ, როგორც დემოკრატიული ქვეყანა და არა მხოლოდ დეკლარირებულად, არამედ, ნაბიჯებით წავიდეთ ევროპული ოჯახისკენ.

სააკაშვილი არის წარსულის პოლიტიკოსი, მაგრამ მომავლის შექმნა არც ვაშინგტონზე და არც ბრიუსელზე არ არის დამოკიდებული, მომავალი ჩვენ უნდა შევქმნათ.

როგორ ფიქრობთ, სააკაშვილი ასე მარტივად დათმობს ხელისუფლებას? გაიხსენეთ მისი ფრაზა - „რეკომანდაციები კარგია, მაგრამ გადაწყვეტილება ჩვენ უნდა მივიღოთ.“ ბოკერიამ კი გაცილებით ადრე თქვა, რომ თუ დასავლეთი იზოლაციაში მოაქცევთ, მათ არც ეს აფრთხობთ.

- ვფიქრობ, რომ ეს არის საკუთრი თავის და მხარდამჭერების შეგულიანებისთვის შერჩეული რიტორიკა. რეალურად, პირადად მე დარწმუნებული ვარ, რომ საპარლამენტო არჩევნებით დაიწყება ცვლილება, ხოლო საპრეზიდენტო არჩევნებით დასრულდება „ნაციონალური მოძრაობის“ ხელისუფლებიდან გასტუმრება. ამას ყველა შეგუებულია, ეს არის ხედვა ვაშინგტონის, ბრიუსელისაც და ახლა, მთავარია ქართულმა საზოგადოებამ ირწმუნოს საკუთრი თავის.

ეს დიდწილად თქვენს ალიანსზე იქნება დამოკიდებული.

- აბსოლუტურად გეთანხმებით. ჩვენ თუ ვერ ვივარგეთ, ვერც ქვეყანა ვერ ივარგებს. მე ბოლო პერიოდში, განსაკუთრებით მას შემდეგ, რაც ივანიშვილი გამოჩნდა ქართულ პოლიტიკაში, გამიასმაგდა ეს რწმენა და ქართულ საზოგადოებას აქვს იმის საფუძველი თქვას, რომ ჩვენ თვითონ უნდა შევცვალოთ ჩვენი მომავალი და პირველად, 20 წლის განმავლობაში, ხელისუფლება შევცვალოთ არჩევნების გზით. 

უშვებთ თუ არა, რომ ხელისუფლება შეეცდება არჩევნების გაყალბებას და ხართ თუ არა ამისთვის მზად?

- დავიწყებ საკუთარი თავის და საკუთარი მხარის კრიტიკით, პირველ რიგში, ჩვენ ვიყავით ძალიან სუსტები, - ოპოზიცია ზოგადად და – მეც, რადგან ბოლო არჩევნებში მოუმზადებელი საარჩევნო პროცებით მივიღთ მონაწილეობა. არ გვყავდა ერთგული, გაწვრთნილი კადრები კომისიებში, სადამკვირვებლო მისიები ერთგული ხალხით არ იყო დაკომპლექტებული, ვერ ვუწევდით სათანადო მხარდაჭერას და ვერ უზრუნველვყოფდით იმ ადამიანებს, ვინც შიშველი ხელებით, მართლაც გულით იცავდა ხმებს საარჩევნო ყუთებთან. ახლა ჩამოყალიბებულია სკოლა, რომელიც უახლოეს დღეებში დაიწყებს კადრების მომზადებას, გაფილტვრას და მათ ტრენინგს. ასევე მნიშვნელოვანია სადამკვირვებლო მისიებთან თანამშრომლობა, მე, ვიქტორ დოლიძე და დათო უსუფაშვილი შევხვდით ეუთოს გენერალურ მდივანს, თავმჯდომარე ქვეყანას - ირლანდიას, შევხვდით „ოდირს“, რომელიც უშუალოდ არის დაკავებული საარჩევნო მონიტორინგით, ასევე შევხვდით საერთაშორისო ორგანიზაციებს, რომლებთაც ასევე ძალიან კარგად აქვთ გააზრებული რა დეფიციტია საქართველოს საარჩევნო სისტემაში და სად არის აუცილებელი მტკიცე, სოლიდური მონიტორინგის აუცილებლობა.

კორპუსის კოორდინატორების საქმეებში რამდენად არიან ჩახედულები?

- ესეც იციან...  წინა არჩევნებში არ იყო შექმნილი საარჩევნო ინფრასტრუქტურა, რომელიც აღრიცხავდა, დაამაგრებდა და არჩევნების დღეს, საარჩევნო უბანზე მოიყვანდა ერთგულ ამომრჩეველს. ეს სისტემაც გამართული იქნება და მესამე - შიში. იცით რომ ხელისუფლებამ ადრეულ ეტაპზე დაიწყო ხალხის დაშინება - გურიაში მოხდა რამდენიმე ინციდენტი, შიდა ქართლში რამდენიმე პედაგოგი დაითხოვეს სკოლებიდან და ა. შ. ჩვენ შევთავაზეთ და მალე ამოქმედდება უწყებათაშორისი ჯგუფი, სადაც იქნება საერთაშორისო ორგანიზაციის ჩვენი წარმომადგენელი და, რომელიც რეაგირებას მოახდენს ყველა ასეთ შემთხვევაზე.

მაგალითად, როდესაც გურიაში ჩვენი საინიციატივო ჯგუფის ერთ-ერთ წარმომადგენელს ავტომატი ჩაუდეს, სიმართლემ თავისი გაიტანა, რადგან ის კაცი მტკიცედ დადგა და არ დაჰყვა საპროცესო შეთანხმების გაფორმებას და ამიტომ, ჩვენც მოვახერხეთ მისი დაცვა. ასე რომ, შიში ნელ-ნელა ტყდება და სწორედ ეს გატეხავს სააკაშვილის ხელისუფლებას საარჩევნოდ.

ყველამ მოვისმინეთ ობამა-სააკაშვილის შეხვედრის ოფიციალური დეტალები, მაგრამ ბაიდენთან შეხვედრის დეტალებზე პრაქტიკულად არაფერი თქმულა, ალბათ, ეს შეხვედრა გაცილებით დატვირთული იყო შინაარსობრივად. ყველას აქვს მოლოდინი, რომ კულუარებიდან იმაზე მეტი ინფორმაცია გამოჟონავს, ვიდრე მოვისმინეთ. შეგიძლიათ დამატებით რამის თქმა?

- მე არ მაქვს იმაზე მეტი ინფორმაცია, რაც ზოგადად ცნობილია და ვფიქრობ, ობამამ ნათლად თქვა რისი ნახვა უნდა პარტნიორ ქვეყანაში. ეს ღიად ითქვა და ამაზე უფრო ენაწყლიანად ვერავინ იტყვის, მაგრამ როგორც დიპლომატს და ადამიანს მქონია შესაძლებლობა თეთრ სახლში ასეთ შეხვედრებზე ვყოფილიყავი, ბუნებრივია ვიცი, რომ უფრო მეტი და დეტალური საუბარია ხოლმე ეკრანს მიღმა. მე მაქვს სრული საფუძველი ვივარაუდო, რომ საუბარი იყო მედიის თავისუფლებაზე, ზეწოლებზე და პოლიციის და უშიშროების ზოგიერთ დანაყოფების (კუდზე და სოდზე მაქვს საუბარი) თავგასულ და თავხედურ საქმიანობაზე, რომელიც არ აძლევს საშუალებას ოპოზიციურ ძალებს საარჩევნო კამპანია დაუბრკოლებლად აწარმოონ და მესამე – ვვარაუდობ, საუბარი იყო იმ ფინანსურ შეზღუდვებზე, რომელიც კაბალური სისწრაფით მიიღო ნაციონალურმა მოძრაობამ მას შემდეგ, რაც ბიძინა ივანიშვილი გამოჩნდა ქართულ პოლიტიკაში. 

ბოლოს, მინდა შეფასება მისცეთ ბათუ ქუთელიას განმარტებას ჟურნალისტის კითხვაზე, - სთავაზობს თუ არა საქართველო ამერიკას საკუთარ ტერიტორიას ირანთან ომის შემთხვევაში? აღნიშნულ კითხვაზე საგარეო სამინისტროდანაც ორაზროვანი განმარტება გაკეთდა. რეალურად, განიხილება თუ არა საქართველოს ტერიტორიის გამოყენება ირანთან ომის შემთხვევაში?

- მგონია, რომ ეს თემა ბურუსით მოცულ საკითხად უნდათ დატოვონ. ჩემი ინფორმაციით ეს საკითხი არც განხილულა და აქედან გამომდინარე, სპეკულაციები, ჩემი აზრით მიზანმიმართული ეჭვის გაჩენის პოლიტიკას წარმოადგენს.