კონსტიტუციონალისტი ზურაბ ჯიბღაშვილი, რომელიც „ქრისტიან-დემოკრატების“ წარმომადგენლის, პარლამენტის ვიცესპიკერ ლევან ვეფხვაძის სამდივნოს უფროსი იყო, „ქრისტიან-დემოკრატებს“ და კონკრეტულად ლევან ვეფხვაძეს სიცრუეში ადანაშაულებს და აცხადებს, რომ მას ეცოდება ‘ის ადამიანები, ვისაც ჯერ კიდევ აწამებს იმის ილუზია, რომ ლალიაშვილის, ან ვეფხვაძის ნათქვამი რაიმე ფრაზა რაიმე ასპექტით შეიძლება ჭეშმარიტებასთან იყოს წილნაყარი“.

ჯიბღაშვილმა ეს განცხადება ლევან ვეფხვაძის იმ ინტერვიუსთან დაკავშირებით გააკეთა, სადაც ვეფხვაძე ამობს, რომ ჯიბღაშვილსა და ლალიაშვილს შორის ის საუბარი არ ყოფილა და მთლიანად ჯიბღაშვილის მოგონილია, რის გამოც ჯიბღაშვილმა „ქრისტიან-დემოკრატები“ ფაშისტური იდეოლოგიის გავრცელებაში დაადანაშაულა და პროტესტის ნიშნად ვეფხვაძის სამდივნოს უფროსის თანამდებობა დატოვა.

შეგახსენებთ, რომ ამის შესახებ განცხადება ჯიბღაშვილმა რამდენიმე დღის წინ საგანგებოდ გამართულ პრესკონფერენციაზე გააკეთა, სადაც წარმოადგინა მისი და ლალიაშვილის „ფეისბუკზე“ საუბრის ჩანაწერი და, სადაც ლალიაშვილი ამბობს, რომ 26 მაისის აქციის დარბევა სწორი იყო და თვითონ რომ ყოფილიყვნენ ხელისუფლებაში, უარეს გააკეთებდნენ და ხელისუფლებას, საერთოდ, „ბართლომეს ღამე“ უნდა მოეწყო.

რატომ ამბობს ვეფხვაძე, რომ ჯიბღაშვიული ტყუის და რა არგუმენტები აქვს ჯიბღაშვილს ვეფხვაძის იმ ბრალდებების საპასუხოდ, რაზეც იგი ამ ინტერვიუში საუბრობს, ამ საკითხებთან დაკავშირებით presage.tv ზურაბ ჯიბღაშვილს ესაუბრა.   

ზურაბ ჯიბღაშვილი: როდესაც ჩემი პრესკონფერენციის შემდეგ კომენტარი გააკეთებინეს ფრაქციის ყველაზე არაპოლიტიკურ ფიგურას, რატი მაისურაძეს, მინიშნება გაკეთდა იმაზე, რომ ეს საუბარი ვითომდა არ შემდგარა.

ნიკა ლალიაშვილთან მიმოწერის შემდეგ დავრწმუნდი, რა მენტალიტეტის და რა ფასეულობების ადამიანებთან მქონდა საუბარი და რატი მაისურაძის მიერ გაკეთებული კომენტარის შემდეგ იმასაც მივხვდი, თუ რა სიბინძურესთან მქონდა საქმე და შესაძლებელი იყო, რომ ყველაფერი უარეყოთ და ამიტომ, მე ეს მიმოწერა იმ დღესვე ვიზუალურად დავაფიქსირე.

ვიდრე მე განცხადებას გავაკეთებდი, რამდენიმე დღით ადრე ლალიაშვილი ისევ იყო ჩემს მეგობრებში. მაგრამ, როდესაც მაისურაძის ეს განცხადება მოვისმინე, მე კიდევ ერთხელ გადავამოწმე და ლალიაშვილს უკვე დაბლოკილი ვყავდი. ანუ, საქმე გვქონდა ძალიან მარტივ გათვლასთან, მაგრამ სიმარტივე გენიალურობის კონდიციას ნამდვილად ვერ აღწევდა და ეს იყო პრივიტიმიზმამდე მარტივი გათვლა, რომ მეგობრების სიიდან დაბლოკვა და არა უბრალოდ წაშლა შესაბამისად გააქრობდა ამ მიმოწერას და ამუშავდებოდა მათი პრინციპი, რომელიც ლალიაშვილს ჩემთან საუბარში არაერთხელ გამოუყენებია, - გალანძღე, გაიქეცი და ხალხს გალანძღული დაამახსოვრდებაო.

საბოლოოდ თქვენი საუბრის დამადასტურებელი მასალა არსებობს თუ წაიშალა?

- როგორც გითხარით, მე ეს მასალა შევინახე და დღეს თქვენ გადმოგცემთ იმ გვერდის ფოტოსურათს, რომელიც მე რატი მაისურაძის კომენტარის შემდეგ შევინახე. როგორც ჩანს, მათი გათვლა ის იყო, რომ საუბრის ჩანაწერი გამქრალიყო და ზურაბ ჯიბღაშვილს ვეღარ დაესაბუთებინა თავისი სიმართლე. მაგრამ, საბედნიეროდ, სამართლიანი პოზიციის დაცვა ჯერ კიდევ შემიძლია და ნამდვილად არ ვაპირებ თივის ზვინში თავის დამალვას.

რატი მაისურაძის კომენტარი იყო ძალიან ნეიტრალური და რატომ გადაწყვიტეთ, რომ მისი კომენტარის შემდეგ მსგავსი რამ მოხდებოდა?

- რატი მაისურაძემ თქვა ასეთი რამ - მე ვერც დავადასტურებ და ვერც ვუარყოფ, მაგრამ ეჭვი მეპარება, ასეთი საუბარი შემდგარიყოო. დღეს კი მე ფოტომასალით ვადასტურებ, რომ ასე იყო და ლევან ვეფხვაძე ხომ ამბობს, რომ ეს მისთვის ხუმრობით ნათქვამიც მიუღებელია, დღეს დარწმუნდება. მაგრამ მთავარი ის არის, რომ ლევან ვეფხვაძე ტყუილს ამბობს. მან ძალიან კარგად იცოდა, რომ ეს საუბარი შედგა.

საიდან იცოდა, თქვენ ესაუბრეთ? როდის შედგა თქვენი საუბარი?

- ლევან ვეფხვაძესთან მე მქონდა საუბარი დეკემბერში. არ ვიცი, მანამდე ამის შესახებ რამე იცოდა თუ არა. შესაძლოა, ლალიაშვილის მხრიდან რაიმე იცოდა. მაგრამ პირადად ჩვენ მანამდე არ გვისაუბრია.

რა გითხრათ, როდესაც ეს ამბავი გაიგო?

- მსუბუქი საუბარი იყო და მხოლოდ ის მითხრა, რომ ეს ხუმრობით ნათქვამი იყო. ანუ, დღეს ამბობს, რომ ეს მისთვის ხუმრობით ნათქვამიც კი მიუღებელია, მაშინ რატომ მითხრა, რომ ეს ხუმრობით იყო ნათქვამი? 

თქვენ თქვით, რომ ამ ამბის შესახებ რვა თვის შემდეგ იმიტომ თქვით, რომ მანამდე სიმართლეს ეძებდით. გამოდის, რომ ამის შესახებ ვეფხვაძემ დეკემბრამდე არაფერი იცოდა, მაშინ ვიღასთან ეძებდით სიმართლეს?

- მანამდე მქონდა მიმოწერა და საუბარი თავად ლალიაშვილთან და მქონდა საუბარი რატი მაისურაძესთანაც.

ამ პარტიაში გააწყვეტილებას რატი მაისურაძე ხომ არ იღებს?

- არა, მაგრამ, ეს იყო ერთ-ერთი, ვისზეც მე გავიგე, რომ ამ მიმოწერის შესახებ იცოდა.

ანუ ისე წამოხვედით, რომ პარტიის ლიდერებმა ამის შესახებ არ იცოდნენ?

- დეკემბრის პირველ ნახევარში ჩემსა და ლალიაშვილს შორის პარლამენტის დერეფანში, გიორგი თარგამაძის მისაღებთან ხმამაღალი საუბარი შედგა. მაშინ ამის შესახებ შეიტყო ლევან ვეფხვაძემ და ვისაუბრე ჯერ ახვლედიანთან და შემდეგ ვეფხვაძესთან. რაც შეეხებ თარგამაძეს, არც მას გამოუჩენია ინიციატივა და არც მე.

ვეფხვაძე ამბობს, რომ თქვენ რამდენიმე პარტია გაქვთ დატოვებული...

- ესეც სრული სიცრუეა. მე ვიყავი მხოლოდ ერთი - „დემოკრატიული პარტიის“ წევრი, რომელიც 2009 წელს, აპრილის აქციების წინ დავტოვე გია ცაგარეიშვილთან ერთად. ნამდვილად არ ვუარყოფ, რომ ვეხმარებოდი ირაკლი ოქრუაშვილის პარტიას და ეს იყო ამ ადამიანების თხოვნით და, ალბათ, ჩემი და ირაკლი ოქრუაშვილის ძალიან ახალგაზრდობის დროინდელი მეგობრობის გათვალისწინებით. მაშინ სამუშაო რეჟიმის სპეციფიკაზე მოხდა ჩემსა და ეკა ბესელიას შორის უთანხმოება. მე არც ამას არ უარვყოფ, მაგრამ ცხოვრებაში,  „დემოკრატიული პარტიის“ გარდა, არც ერთი პარტიის წევრი არ ვყოფილვარ.    

ლალიაშვილთან დაკავშირებით განცხადების გაკეთებაში ივანიშვილის გუნდს რა წვლილი ჰქონდა?

- არანაირი. მანამდე სხვა გაზეთში ისიც წავიკითხე, რომ თინა ხიდაშელის და ზურა ჯიბღაშვილის ახლობლობა ეჭვს არ იწვევს, რადგან ჩვენ ერთად სოროსის ფონდით დაფინანსებული არაერთი პროექტი განგვიხორციელებია. არ ვიცი, აქ კიდევ ვისი კვალი დარჩა. არ უარვყოფ არც ერთი ადამიანის არც ნაცნობობას, არც რაიმე პერიოდში მუშაობას, არც გია ცაგარეიშვილთან მეგობრობას, მაგრამ გადაწყვეტილებებს ვიღებ მე. შესაძლოა, ამ თემაზე ჩემს მეგობრებთან, ან ოჯახის წევრებთან მისაუბრია, მაგრამ, ასახელებენ მხოლოდ ცაგარეიშვილის გვარს და რატომ - ვერაფერს ამბობენ მათთვის უცნობ ადამიანზე, ვისაც შეიძლებოდა ამის შესახებ ინფორმაცია ჰქონოდა?

იმის დაშვებაც ხომ შეიძლება, რომ ვინმე მათთვის უცნობმა ადამიანმა გააკეთა ამ ყველაფრის ორგანიზება? ახლა უნდათ, რომ ხელი შეაწმინდონ გია ცაგარეიშვილს, მაგრამ ცაგარეიშვილის პოლიტიკურ კარიერასაც გადახედონ და თავიანთ დეკლარირებულ ფასეულობასაც.     

ვეფხვაძე თქვენზე იმასაც ამბობს, რომ თქვენ ფსიქიურად გაუწონასწორებელი ადამიანი ხართ. ეს საკმაოდ სერიოზული ბრალდებაა. ხომ არ აპირებთ, რომ უჩივლოთ?  

- მე ვერ გავხდები ვერც ლალიაშვილი და ვერც ვეფხვაძე. ჩემში საამისო რესურსი არ არსებობს. მე მხოლოდ იმას ვიტყვი, რომ აბსოლუტურად განსხვავებული ხასიათის და პოლიტიკური მრწამსის ადამიანები ყოფილან ჩემი ხელმძღვანელები საჯარო სამსახურში ჩემი ხანგრძლივი მუშაობის პერიოდში, მაგრამ მე ყოფილ ხელმძღვანელებზე არც საჯაროდ, არც პრივატულ საუბრებში არანაირი აუგი არ მითქვამს. თითოეულ მათგანს ჰქონდა ის ღირსება, რასაც ვაფასებდი და დღემდე ვაფასებ.

სხვათა შორის, ამ საკითხზე აზრთა თანხვედრა გქვონდა ვეფხვაძეს და მე, როდესაც ლალიაშვილის საკითხთან დაკავშირებით შედგა ჩვენს შორის საუბარი. ამიტომაც ჩემს ყოფილ უფროსზე, ლევან ვეფხვაძეზე ამ კონტექსტით საუბარი ნამდვილად არ არის კომფორტული. მაგრამ, სამწუხაროდ, ამას სათავე თავად ვეფხვაძემ დაუდო იმისთვის, რომ ნიკა ლალიაშვილის დაცვა განეხორციელებინა რაიმე მეთოდებით და ამისთვის გამოიყენა ჩემი ღირსების შელახვის გზა.

რაც შეეხება ჩივილს, დეპუტატი დაცულია იმუნიტეტით, რაც ნიშნავს იმას, რომ ის თავის უფლებამოსილების განხორციელებისას გამოთქმულ მოსაზრებებზე პასუხს არ აგებს. ვეფხვაძე ჩემი ხელმძღვანელი იყო და, ამ შემთხვევაში, ამ პოზიციიდან საუბრობს, ამიტომაც დაცული იქნება. წინააღმდეგ შემთხვევაში, მე მას სიამოვნებით შევხვდებოდი სასამართლოში.

ვეფხვაძის ასეთ განცხადებებს თქვენ რითი ხსნით?

- იმის შემდეგ, რაც მან ამ მიმოწერის ფაქტი უარყო და იმის მიუხედავად, რომ მან ამის შესახებ ნამდვილად იცოდა, რა შეიძლება თქვა? ეს ამ ადამიანების მორალური სახეა, რომლებმაც დაგეგმეს ის ტყუილი, რომლის ტირაჟირებაც მოახდინეს. ამიტომ ამ ადამიანებისგან არანაირი სიბინძურე არ მიკვირს დ მე ვერ „გავლევანვეფხვაძევდები“ და პიროვნულ შეურაცხყოფებზე ვერ გადავალ. ამით მხოლოდ და მხოლოდ ჩემს თავს მივაყენებ შეურაცხყოფას. თუ ჩემი ფსიქიკა ეჭვს იწვევდა, სამი წელი ვიმუშავე ამ ადამიანთან და ასეთი თანამშრომელი, მით უმეტეს სამდივნოს უფროსად რაში სჭირდებოდა? ამიტომაც ვამბობ, რომ ეს არის მხოლოდ და მხოლოდ გაკაპასებული მდედრის ხმა. უბრალოდ, როგორც ჩანს, მათ კარგად აქვთ შეთვისებული ის, რომ საუკეთესო თავდაცვა თავდასხმაა.

ასე რომ, მე მხოლოდ იმ ადამიანების შებრალებაღა შემიძლია, ვისაც ჯერ კიდევ აწამებს იმის ილუზია, რომ ლალიაშვილის, ან ვეფხვაძის ნათქვამი რაიმე ფრაზა რაიმე ასპექტით შეიძლება ჭეშმარიტებასთან იყოს წილნაყარი. 

ივანიშვილთან და მის პარტნიორებთან რამე კავშირი გაქვთ?

- ამ წუთის მდგომარეობით არანაირი ოფიციალური კავშირი არა მაქვს. ამ პოტენციურ კოალიციაში მყავს არაერთი ნაცნობი და მეგობარი, თუნდაც იგივე ცაგარეიშვილი. მათთან გარკვეული შეხება მქონდა და სამომავლო თანამშრომლობას არ გამოვრიცხავ, მაგრამ დღეის მდგომარეობით გადაწყვეტილი არაფერი არ არის.