მამუკა ღლონტმა და ჟურნალისტებმა „მაესტროს“ შენობა დატოვეს. თუმცა, საზოგადოებრივი მაუწყებლის პირდაპირ ეთერში ტელეკომპანიის დამფუძნებელმა განაცხადა, რომ ეთერს ჟურნალისტები არ დატოვებენ. „სიტუაცია ძალიან მალე განიმუხტება“, - ეს სიტყვები დაახლოებით გუშინ, დღის პირველი საათისთვის განუცხდა პრესაგე.ტვ-ის ეროსი კიწმარიშვილმა. თუმცა, ამხელა დაპირისპირების გადატანის შემდეგ რამდენად შეძლებენ ჟურნალისტები მუშაობის ჩვეულ რეჟიმში დაუბრუნდნენ, ან კიწმარიშვილი როგორ გამონახავს მათთან საერთო ენას, საკითხავი სწორედ ესაა.

ღლონტის განცხადებით, „მაესტროს“ ტერიტორიის დატოვების გადაწყვეტილება იმიტომ მიიღეს, რომ არ უნდათ სიტუაცია იქამდე მივიდეს, პროვოკაციებმა ან არხის რომელიმე სახე შეიწიროს, ანდა საქმე სამოქალაქო დაპირისპირებამდე მივიდეს. ასეა თუ ისე, ფაქტია, ამ ეტაპზე ტელეკომპანიის დამფუძნებლებმა მართვის კომპანიას დაუთმეს. სხვა გზა არც ჰქონდათ, რადგან მათ შორის დადებული ხელშეკრულების თანახმად, დამფუძნებლებმა ხელშეკრულების შეწყვეტის შესახებ მართვის კომპანიას 3 თვით ადრე უნდა შეატყობინონ და ამ კომპანიამ 90 დღეში უნდა დატოვოს ტელეკომპანია.

ასე რომ, კიწმარიშვილს ჯერ კიდევ დიდი დრო აქვს, რათა „მაესტროს“ მართვა განახორციელოს. სხვათაშორის, როცა ინტერვიუ ჩავწერეთ კიწმარიშვილთან და შემდეგ ტელეკომპანიის ეზოში შეკრებილ ადამიანებს გავესაუბრეთ, მათგან შევიტყვეთ, რომ დღის ბოლომდე მართვის კომპანია „მაესტროს“ დატოვებდა, რადგან კიწმარიშვილს რამდენიმე მილიონ გადაუხდიდნენ „გაჩერებაში“.

საინტერესო ისაა, რომ ყველაფერი პირიქით მოხდა და „მაესტროს“ შენობა დამფუძნებლების მხარემ დატოვა. არადა, კიწმარშვილმა ჩვენთან ინტერვიუში ხაზგასმით აღნიშნა, ჩემთვის ფული არ არის მთავარიო. როგორც ჩანს, მედიაინტრიგებში გამოცდილი მმართველი საზოგადოებას არც თუ ისე მარტივ თამაშს სთავაზობს და ფაქტია, იმდენად სწორ ტაქტიკურ სვლებს ახორციელებს, მისი „გადაგდება“ დაინტერესებულ პირებს არ გამოუვათ.     

თქვენ აცხადებთ, რომ 9 თვის განმავლობაში არ მონაწილეობდით „მაესტროს“ მართვაში. რატომ?

ეროსი კიწმარიშვილი: „არც დრო მქონდა, არც მაინტერესებდა და არც მეცალა მაგისთვის. ეს იყო ავტოპილოტზე დაყენებული საქმიანობა.

ილია კიკაბიძე იყო ავტოპილოტი...

-კიკაბიძე იყო ჩემს მიერ დანიშნული დირექტორი, დამფუძნებლებთან შეთანხმებით...

და  ყველაფერი კიკაბიძეზე იყო მინდობილი, რადგან თქვენ მას ენდობოდით..

- არა მარტო კიკაბიძეზე. მართვის კომპანიის უშუალო ყოველდღიურ საქმიანობაზე დირექტორი პაატა პაჭკორიაა პასუხისმგებელი. ეს ყველაფერი მიდიოდა ავტოპილოტზე და ჩვენ ერთმანეთთან დაძაბულობის მექანიზმი არ გვქონდა. იმ კახელი ბავშვისა არ იყოს, ხუთი თუ ექვსი წლის ასაკში რომ ალაპარაკდა და თქვა - ხაშლამას მარილი აკლიაო, თქვა იმიტომ რომ მარილი დააკლდა, მანამდე სათქმელი არაფერი ჰქონდა. ასევე ვარ მეც. აქამდე სათქმელი არ მქონდა და დღეს ჩემი გააქტიურება გამოიწვია იმან, რომ დამფუძნებლების მხრიდან წარმოიქმნა სერიოზული დაძაბულობა მართვის კომპანიის წინააღმდეგ და ამის შემდეგ გადავდგი ეს ნაბიჯი. როგორც მეპატრონემ, მივიღე გადაწყვეტილება, ჩავრთულიყავი ამ პროცესებში და განმემუხტა სიტუაცია. მარტივად რომ ვთქვათ, აქ არის ჩირქგროვა, რომელიც რაღაც ინფექციის მიზეზით წარმოიქმნა და მე ზემოდან „ნეიკაპის“ გაკეთებითა, თუ მაკიაჟით ვერ დავმალავდი

აპირებდით თუ არა თანამშრომლების განთავისუფლებას, ხელფასების შემცირებას, როგორც მამუკა ღლონტმა განაცხადა „ობიექტივში“, ჩემს გადაცემაში?

- საუბარი მიდიოდა იმაზე, რომ ვიდრე არ გაირკვევეოდა დამფუძნებელთა მხრიდან... (კიწმარიშვილს ახასიათებს თემიდან თემაზე გადასვლა, ამიტომ, ინტერვიუს გარკვეულ ნაწილს, თითქმის ორიგინალთან მიახლოებულს გთავაზობთ - რ.მ) ჩვენ ჩვენი ვალდებულება შესრულებული  გვაქვს გადაჭარბებით, ვალდებულებაც არ ჰქვია მაგას. მარტო ფინანსურ ვალდებულებაზე არ ვლაპარაკობ. თუ დავუბრუნდებით ისტორიას, მე ამ ტელევიზიის კონცეფციის, გადაცემების, ხასიათის, მიმართულების, ტიტრების, ფერებისა თუ მუსიკის შექმნაში ვმონაწილეობდი.  ეს იყო პირველ ეტაპზე, როცა მართვის კომპანია დაფუძნდა და „მაესტროს“ მართვა გადაიბარა. ასევე აქტიურ მონაწილეობას ვიღებდი ფინანსების მოზიდვაში. ღიად მქონდა შეხვედრები ოპოზიციური პარტიების ლიდერებთან იმის გამო, რომ თუ ჰქონდათ სურვილი ტელეკომპანიის შექმნაში მიეღოთ მონაწილეობა, დაგვხმარებოდნენ. ღიად ვმუშაობდი საერთაშორისო ორგანიზაციებთან...

ოღონდ, არ უნდა ჩარეულიყვნენ სარედაქციო საქმიანობაში?

- ვერავინ  ჩაერეოდა „მაესტროს“ საქმიანობაში. მე მათ ვეუბნებოდი, მოდით, გავაკეთოთ საერთო სახლი. ჟანგბადი გვჭირდება ყველას, ეს ჟანგბადი არ შეიძლება იყოს მხოლოდ ეროსის, ან პეტრესი... 

ვის სთავაზობდით? მაგალითად, ნინო ბურჯანაძეს, ირაკლი ალასანიას...

- მე მაქვს ცნობილი შეხვედრა მოწყობილი ოპოზიციის ლიდერებთან,  2009 წლის ბოლოს, ან  2010 წლის დასაწყისში, ფალიაშვილის ქუჩაზე მდებარე კაფე „ბატონებში“, შეხვედრას ესწრებოდნენ:  სალომე ზურაბიშვილი, ნინო ბურჯანაძე, ალასანიასგან - თუ არ მეშლება, ზურაბ აბაშიძე, ლევან გაჩეჩილაძე და ა. შ. ძალიან ბევრი ადამიანი ესწრებოდა ამ შეხვედრას. მე ჩემი გეგმების პრეზენტაცია მოვახდინე. ვუთხარი მათ, ერთადერთი გზა გვაქვს, შევქმნათ, ყველას საერთო სახლი (მე მაშინ პოლიტიკაში არ ვიყავი ჩართული).

მახსოვს, მაშინ ყველაზე მოწესრიგებული იყო ზურაბიშვილი. მხარდაჭერის წერილი გააკეთა და აქტიურად გვეხმარებოდა საერთაშორისო ორგანიზაციებთან ურთიერთობაში. ისე, ყველამ თქვა სიტყვიერად - კიო. მაშინ იქ ლაპარაკი არ ყოფილა იმაზე, ჯიბიდან ამოეღოთ ფული, ერთობლივად უნდა მოგვეზიდა დაფინანსება. ეს ის პერიოდია, როდესაც ობამას ხელისუფლებაში მოსვლის შემდეგ გადატვირთვის თემა პიკშია ასული. ოპოზიციის ლიდერებს ვუთხარი მაშინ, შეხვედრაზე, თუ  ცვლილებები გვინდა, ერთადერთი მექანიზმი არის ის, რომ პოლიტიკურმა სპექტრმა მედიის გაჯანსაღებაზე იბრძოლოს, არა განცხადებებით, არამედ - აქტიური დახმარებით-თქო.

ისიც ვთქვი, ვარ ადამიანი, ვისაც ცოდნაც აქვს, გამოცდილებაც ამ სფეროში და მე გავაკეთებ საერთო სახლს, რომელიც ყველა პოლიტიკურ ძალას მისცემს იქ მისვლის საშუალებას. ისეთი სახლი უნდა შექმნილიყო, როგორიც ჰქონდა ფიროსმანს ქალაქშის ცენტრში,  ჩაის დასალევად, ოღონდ დიდი სერიოზული საზოგადოებრივი ინტერესით. ეს იყო ამ ტელევიზიის და ამდენი წვალების მიზანი, და არა ფულის შოვნის, ან გამდიდრების, გნებავთ - ამბიციის დაკმაყოფილების. მე ტელევიზიაში ამბიცია აღარა მაქვს...

საინტერესო განაცხადია ყოფილი მედიამფლობელისგან, რომელმაც დათმო თავისივე შექმნილი ტელეკომპანია...

- აღარ მაქვს ამბიცია. დიდი ხნის წინათ, 2004 წელს გავხდი სერიოზული პრიზის მფლობელი, რომელიც ”რუსთავი 2“-ში დავტოვე. ეს არის უდიდესი პრიზი - სატელევიზიო მენეჯმენტისთვის. ამდაგვარი პრიზი საბჭოთა კავშირიდან არავის აუღია მანამდე. ტელევიზიაში, თუ ვინმეს რამე უნდა გაეკეთებინა საქართველოში, მე გავაკეთე... დიდი ხნის წინ დავკარგე ამბიცია, რომ ვინმეს შევეჯიბრო...

ახლა რა საფრთხე იგრძენით?  ივანიშვილია ეს პირდაპირ საფრთხე?

- ახლა დავბრუნდეთ უკან. მე დავიწყე საქმიანობა ამ მიზნით და დღემდე ვრჩები ამ ჩემს პოზიციაზე - ტელევიზიას უნდა მივცეთ თავისუფლება. მხოლოდ თავისუფალი ჟურნალისტია ჭეშრმატების გარანტი. ტელევიზიის პროდუქტიც, საბოლოო ჯამში, არის ის თავისუფალი ჟურნალისტი, რომელიც გაძლევს მთავარ გასაყიდ ფასეულობას და ფასეულობა არის აუდიტორია. და აუდიტორიას გაძლევს თავისუფალი სიტყვა. ეს არის ჩემი კონცეფცია. დღეს რა პრობლემაცაა „მაესტროში“ დამფუძნებლების მხრიდან, ყველაფერი რამდენიმე თვის წინ დაიწყო რაღაც პროცესებით, რომელსაც თავიდან არ მივაქციე ყურადღება. ჯერ რაღაც გარკვეული პრეტენზიები იყო სიტყვიერ დონეზე, არა ჩემი - არამედ მართვის კომპანიასთა. შემდეგ უკვე სისტემატიურად ხდებოდა გარკვეული პრეტენზიების ფიქსაცია.

ვისგან მოდიოდა ეს პრეტენზიები, მამუკა ღლონტისგან?

- დამფუძნებლებისაგან. მე არ ვაკონკრეტებ. ეს არის ერთი ჰომოგენური ჯგუფი. პრეტენზიები იყო პირველი სიგნალი, მაგრამ მე არ ჩავრეულვარ. თუმცა, როცა ბოლო სამი კვირის განმავლობაში მე დავინახე უკვე პრეტენზიების ნიაღვარი, იძულებული გავხდი, მიმეღო სიტუაციაში პირდაპირი ჩართვის გადაწყვეტილება.

 ეს მოხდა შალვა რამიშვილისა და ნათია მიქიაშვილის გადაცემაში?

- არა. ეს ცალკე ისტორიაა, ეს არ ეხება დამფუძნებლებს. რაც იქ ვთქვი, ეს პრეტენზიები შეიძლება, მქონდეს თქვენთანაც. მე, გუშინწინდელ ბერიძის  გადაცემის გამო, როგორც მაყურებელს, გამიჩნდა უკმარისობის გრძნობა, იმიტომ, რომ ჩემთვის ცოტა უცნაურია, როცა ორი დღით ადრე ნინო ბურჯანაძეს პირიდან აგლეჯ სიტყვებს, არ ათქმევინებ არაფერს, მეორე დღეს გყავს სტუმრად ადამიანი, რომელსაც ოსანას არ უმღერი, მაგრამ ცოტა გაკლია. მე დავინახე განსხვავება და ეს განსხვავება მე დისკომფორტს მიქმნის. გუშინ ვუყურე ”რუსთავი-2”-სა და  ”იმედს”, სადაც პირდაპირ ეთერში, 20 წუთიანი უწყვეტი  რეჟიმით გადის ეკა ბერიძესთან ივანიშვილის სტუმრობის სიუჟეტი. მოდით რა, არავის სჯერა, რომ ამით ბიძინა ივანიშვილის პროპაგანდა მოხდა ამ არხებზე. ჩვენ თუ გვინდა მომავალ პოლიტიკოსს შეუქმნათ ბრძოლის უნარიანი გარემო...

თქვენ იმ ივანიშვილს გინდათ, შეუქმნათ ბრძოლისუნარიანი გარემო, რომელმაც „მაესტროსთვის“ ბრძოლა პირადად თქვენი გამიჯვნით დაიწყო?

- მე გელაპარაკებით, როგორც საინფორმაციო საშუალება... საერთოდ კი, მე მაქვს ჩემს წყენებზე დიდი მოთმინების ვალდებულება. ეს არის პოლიტიკოსისთვის აუცილებელი პირობა...

და დღემდე თვლით, რომ ივანიშვილის გამოჩენა დადებითი მომენტი იყო ქართული პოლიტიკისთვის?

- ძალიან დიდი პოზიტივი, მაგრამ მეორეს მხრივ შემიძლია, ვთქვა, რომ მან დაიწყო 100-ით ნული, მაგრამ დღეს შემიძლია ვთქვა, რომ ბერიძესთან ინტერვიუს შემდეგ ჩამოსულია ძალიან დაბლა.

და თქვენი ბრძოლა „მაესტროსთვის“, საერთოდ არ უკავშირდება მესამე ცენტრის შექმნის პროცესს? ყველა პოლიტიკურ ძალას სჭირდება მედიამხარდაჭერა...

- მესამე ცენტრის შექმნა? თუ ვლაპარაკობთ კოალიციის პერსპექტივაზე, მას არ უკავშირდება ეს კონფრონტაცია. თუმცა, ეს მედიის გავლენა ყველას სჭირდება, რომ ჩვენი სიტყვა მიივიტანოთ საზოგადოებასთან. ეს აუცილებელი ნაწილია. ივანიშვილის ინტერესებშიც არის და ყველას ინტერესებშიც არსებობდეს მედია საშუალებით საზოგადოებამდე შენი სიტყვის მიტანის მექანიზმი. რაც შეეხება კოალიციის შექმნის პერსპექტივას, თუ არსებობს ეს პერსპექტივა და ალბათ არსებობს,  ამ კოალიციის შექმნის იდეა არ არის კონფრონტაცია ოპოზიციასთან. აქ მთავარი იდეაა, ჩვენ შევქმნათ ენერგია მომავალი წარმატების მისაღწევად.

ტელევიზიას არ ვგულისხმობ ამ ყველაფერში, მხოლოდ პოლიტიკაზე ვლაპარაკობ. ტელევიზიას რაც შეეხება, არანაირი თანაბარი დრო არ უნდა ეთმობოდეს პოლიტიკურ ძალებს. რაც უფრო ძლიერი და  აქტიური „ნიუსმეიკერი“ ხარ, მით უფრო კარგად ხვდები ტელევიზიაში. რაც შეეხება ივანიშვილის თემას, ეს არ არის კონფრონტაციის რეჟიმი. ის ხარვეზი, რაც მე  დავინახე, როგორც სატელევიზიო მენეჯერმა, მაქვს უფლება, ჩემი პრეტენზია ვუთხრა იმ კომპანიას, რომლის შექმნა ჩემი უშუალო ვალდებულებაა. ვალდებულება მაქვს ვუთხრა, ასე არ შეიძლება, ცოტა გაგიგრძელდათ პოზიტივი.

ჩვენი ამოცანა არ არის ივანიშვილის ხიბლიდან გამოვიყვანოთ საზოგადოება. ჩვენ ვალდებულები ვართ, ივანიშვილი ვაიძულოთ საზოგადოებისთვის მნიშვნელოვან კითხვებზე გასცეს სწორი პასუხი, მოვასმენინოთ ხალხს, რას სთავაზობს ისეთს, რის გამოც უნდა დაუჭირონ მხარი მომავალში, თუ აქვს მას ეს რესურსი. არ ვიცი, ვისთვის არის მნიშვნელოვანი ნიჭიერების ან ინტელექტის დეფინიცია, ან პარაფსიქოლოგია, ანდა ფსიქოანალიზი და რამდენად ეს ყველაფერი არის დომინანტი მოთხოვნა ქართულ საზოგადოებაში, რომლის 80%-ი ქვეყნიდან წასვლაზე ფიქრობს. ეს, ჩემი აზრით, არასწორი მესიჯებია და ამ მესიჯებს ჟურნალისტი არ უნდა მიყვებოდეს ასე ღრმად.  მოკლედ, ჩემი სუბიექტური აზრი მოგახსენეთ კონკრეტულ გადაცემაზე და ამ აზრის განვითარება აღარც მაინტერესებს, მათ შორის - არც ჟურნალისტთან. ამის გამო მე ჟურნალისტს ვერაფერს ვეტყვი...

არად, ისე მიგყავთ საუბარი, თითქოს, ეკა ბერიძის გამო მოხდა ყველაფერი...

- ღმერთმა დამიფაროს, ეკა ჩემთან ერთად მუშაობს დიდი ხანია.

„ობიექტივში“, ჩემს გადაცემში, თქვენმა ჟურნალისტმა გიორგი ფოფხაძემ განაცხადა, რომ  ორი კვირა ცდილობდით კოლექტივთან შეხვედრას, სამაგიეროდ, მამუკა ღლონტმა თქვა, რომ  ჟურნალისტების გათავისუფლება გინდოდათ სამსახურიდან. პარალელურად, თქვენ და ღლონტი ერთმანეთს ფინანსურ ბრალდებებს უყენებთ, საუბარია - 4,5  მილიონზე, სად არის აქ სიმართლე, მაინც რამ წარმოშვა ასეთი ტიპის გაღიზიანება, რასაც ჩემი კოლეგების დაზარალება მოჰყვა შედეგად?

- ფული არ არის გაღიზიანების მომენტი, ჩემი მხრიდან, თუ იმათი მხრიდან არის, არ ვიცი. მე უბრალოდ, გუშინ გამოვთქვი საკმაოდ მძიმე პრეტენზიები ამასთან დაკავშირებით, ძალიან გაღიზიანებული ვიყავი.

მამუკა ღლონტმა განაცხადა, რომ 4,5 მილიონიანი ინვესტიცია არის მაკა ასათიანის თანხა...

- არის თემები, რომლებიც არ არის საზოგადოებაში ღია დისკუსიის საფუძველი, არა იმიტომ, რომ უნდა დამალო, არა- უბრალოდ კომერციული საიდუმლოებაა, რომელსაც აქვს გარკვეული  წინა პირობა. მეორეს მხრივ, არსებობს თემები, რომელთაც საზოგადოებას როგორი კუთხითაც მიაწოდებ, იმის მიხედვით მიიღებს.

მამუკა რასაც ამბობს, არის ტყუილი. ეს არის ”მაესტროს” მართვის კომპანიის მიერ შემოტანილი თანხა.

ვისგან? მაკა ასათიანისგან არა?

- არა. ყველასგან. მათ შორის, ჩემგან, იმ ორგანიზაციებისგან, რომლებმაც მიიღეს მონაწილეობა „მაესტროს“ ჩამოყალიბებაში. საერთაშორისო დონორებისგან... მე მოვიზიდე ეს პროდუქტი.

თქვენს მიერ შეტანილი კონკრეტული თანხა რამდენია?

- ძალიან ბევრი-თქო, ვერ ვიტყვი. ეს მე მგონი, არაკორექტული შეკითხვაა. ჩემგან „მაესტროში“ შეტანილი არის 4,5 მილიონი დოლარი, როგორც მართვის კომპანიის დამფუძნებლის მხრიდან კონკრეტულად ნაკისრი ვალდებულება.

და ეს არ არის მაკა ასათიანის თანხა...

- მაკა ასათიანის, როგორც დამფუძნებლის მიერ „მაესტროში“ შეტანილი თანხა, მამუკა ღლონტს შეუძლია, გამოაკლოს საერთო თანხას და ეს არ არის ის თანხა, რაზეც არის ახლა ლაპარაკი. მაკა ასათიანის, ან სხვა ადამიანის მიერ ლეგალური შენატანი პირდაპირ „მაესტროში“ მანამდე განხორციელებული, ან მერე, ეს არ არის ჩემი კალკულაციის საგანი. ჩემი კალკულაციის საგანია ჩემი, როგორც მართვის კომპანიის დამფუძნებლის მიერ შეტანილი თანხები „მაესტროში“.

ღლონტის კიდევ  ერთ ბრალდებაზე მინდა თქვენი კომენტარი, ის აცხადებს, რომ კიწმარიშვილი „მაესტროში“ შემოსული თანხებით  ”ქართულ პარტიას” აფინანსებდაო.

- შემიძლია, პირდაპირ გიპასუხოთ, ეს არასერიოზული განცხადებაა. ტყუილია. შეუძლებელია ეს ხდებოდეს. მაშინ რა გამოდის - მამუკა ღლონტი იჯდა და უყურებდა როგორ გადიოდა თანხა ჩემს მიერ „მაესტოდან“ პარტიაში? ასეთ შემთხვევაში, საქმე გვაქვს კლასიკურ კრიმინალთან, რადგან ტელეკომპანიაში შემსული თანხები მიდიოდა პარტიის დასაფინანსებლად. არაკორექტული და სამართლებრივად აბსურდული, შინაარსობრივად კრიმინალური მოცემულობის შემცველია ეს განცხადება. კიდევ ერთხელ ვამბობ, ასეთი უპასუხისმგებლო განცხადებები ხდება კონფლიქტის შემდგომი ესკალაციის საფუძველი.

ეს  არაპროფესიონალური განცხადებაა. და ამას ამბობს დაპირისპირების შემდეგ, მანამდე არავის შეატყობინა და დაფარა? ეს არის არაკვალიფიციური, არაპროფესიონალური განაცხადი. ასეთი რამ ბუნებაში არ შეიძლება არსებობდეს, რომ ტელევიზია აფინანსებდეს პარტიას, ამას ამბობდეს ტელევიზიის დამფუძნებელი და თანაც მას შემდეგ, როცა დაპირისპირება წარმოიქმნება, მაშინ აქ რაღაცა მოტივაციაზე უნდა ვილაპარაკოთ. დაფარა, ე.ი. კრიმინალს სჩადიოდა. რა გამოდის, მე ვარ კრიმინალი და ის ჩემი თანამონაწილეა?

კარგით, დავაზუსტოთ სხვა დეტალებიც.  ღლონტი ასევე საუბრობს იმაზე,  რომ ილია კიკაბიძის  განთავისუფლების უფლება თქვენ არ გაქვთ.

- კიკაბიძის განთავისუფლება და კიდე სხვა დეტალიც ერთ პასუხში შეიძლება, ჩაეტიოს - ყველაფერი არის იურიდიული დისკუსიის საგანი.

დამიკონკრეტეთ, გქონდათ უფლება?

- მე მქონდა უფლება ილია კიკაბიძე გამეთავისუფლებინა თანამდებობიდან და განვახორციელე კიდეც ჩემი უფლებამოსილება...

დამფუძნებლებსაც ჰქონდათ უფლება, ეროსი კიწმარიშვილის მართვის კომპანიასთან გაეწყვიტათ ხელშეკრულება, რაც გააკეთეს კიდეც..

- კი, ბატონო. ამიტომ მე მომეწონა (დღეს წავიკითხე) საიას პოზიცია, დასხდნენ, გაარკვიონ  ვინ მართალია და ვინ - არაო. მთავარი, რუსიკო აქ არის ის, ახლა, ჩვენ არ უნდა გავხადოთ მძევლებად ჟურნალისტები, რომლებსაც საერთოდ არ უნდა აინტერესებდეს ეს დისკუსია.

კი, გეთანხმებით, მე ეს პროცესი გადატანილი მაქვს „რეზონანსში“, როცა დამფუძნებლებს შორის იყო ასეთივე დაპირისპირება. თუმცა, ამ პროცესის მიმართ გულგრილი იქ მომუშავე არცერთი ჟურნალისტი არ იყო...

-ჩვენ საქმე გვაქვს აბრამოვიჩისა და ბერეზოვსკის მსგავს დავასთან, რომელიც თვეობით, შეიძლება - წლობითაც კი არ მთავრდება....

თქვენ გქონდათ მცდელობა ღლონტს ამ თემებზე დალაპარაკებოდით?

-რა თქმა უნდა, მქონდა ძალიან ბევრი მცდელობა და ვერ მივიღე ჩემთვის დამაკმაყოფილებელი პასუხი მისგან.

ამიტომ გადაძვერით ღობეზე დაცვასთან ერთად?

-არა, არა რუსიკო, თქვენ თუ მიზეზ-შედეგობრივ კავშირში რაიმე გამოტოვეთ, ისე გამოგივათ, როგრც მსჯელობს ხოლმე ცნობილი იურისტი ეკა ბესელია. ყევლაფერში ახსოვს მხოლოდ დასაწყისი, და დასასრული... იმის მერე, როცა ვერაფერს მივაღწიე... გარკვეული პრობლემები რომ არ შექმნილიყო, დავიწყე ტელევიზიის შიგნით, დეპარტამენტებთან მოლაპარაკება, თან 29 ნოემბერს ორი წელი გვისრულდებოდა, რაც მართვა გადავიბარეთ და იუბილის აღსანიშნავად, მინდოდა, დაველაპარაკებოდი ჟურნალისტებს. მივედი დეპარტამენტის ხელმძღვანელებთან ვთხოვე, როცა საშუალება გექნებათ, დავჯდეთ, ვილაპარაკოთ იმ პრობლემებზე, რომლებიც  გვქონდა, გვაქვს და გვექნება-თქო.

ამის შემდეგ მივიღე დამფუძნებლების მრისხანე ტიპის განცხადებები, რომ ვერევი სარედაქციო საქმიანობაში. მთელი დღე გრძელდებოდა ამაზე საუბარი. იმის გამო რომ ივანიშვილის ინტერვიუ იყო დაგეგმილი, არ ვუპასუხე მათ. არ მივედი კომპანიაში, რადგან ამას შეიძლებოდა, სერიოზული დაძაბულობა გამოეწვია, მაგალითად - ჩაშლილიყო ეთერი. მერე ხომ იცით, ენას ძვალი არ აქვს და დაიწყებოდა აურზაური, ეროსიმ ეს იმიტომ გააკეთა, რომ ივანიშვილისთვის შეეშალა ხელი და ა.შ.. ეს რომ არ ყოფილიყო, ის დღე ჩავატარე ურეაქციოდ. მეორე დღეს, დილით მოვედი, ვიდრე ჟურნალისტები მოვიდოდნენ, რომ მომემზადებინა ყველაფერი... ეს ჩემი ლეგალური უფლება იყო და აქ შემოსვლაში მე შემექმნა პრობლემები.

ძალიან მაინტერესებს სადამდე გაგრძელდება ეს ყველაფერი, ერთმანეთის მიმართ „მაესტროს“ ტერიტორიიდან გაძევების მუქარის ფონზე?

-ძალიან მალე დამთავრდება. არავითარ გაძევებაზე მუქარა არ არის. წუხელ მქონდა საშუალება აღმედგინა სრულად მაუწყებლობა, მქონდა რესურსი გადამეყვანა პროცესი საქმიან ფორმატში, დამერეგულირებინა შიდადაპირისპირების ტექნიკური ასპექტები, რათა მაუწყებლობა სრული ფორმით აღდგენილიყო,მაგრამ არ გავაკეთე ეს ყველაფერი, ზუსტად იმიტომ, რომ ეს ჟურნალისტები, რომლებიც დღეს აქ არიან, ისევ აღმოჩნდებოდნენ გარკვეული დილემისა და არჩევანის წინაშე.

პირიქით, დილით, 10 საათზე შეთავაზება გაუკეთე ღლონტსაც და სხვა დამფუძნებლებსაც მოდით, მოვუსმინოთ საზოგადოებას, დავსხდეთ და ვიპოვოთ კომპრომისი. ჩემი წინადადებაა ასევე, დატოვოს მამუკამ ბლოკირებული ზონა, მისცეს ჟურნალისტებს მშვიდად მუშაობის საშუალება, დაუბრუნდნენ ისინი სამუშაო რეჟიმს და ჩვენ ჩვენი დავა გავაგრძელოთ ან დახურულ ფორმატში, ან, კი ბატონო, მედიატორი მოვიყვანოთ და დავაყენოთ შუაში.

ღლონტს თავისუფალი გადაადგილების საშუალება ექნება „მაესტროს“ ტერიტორიაზე?

-ეს ყველაფერი არის დაკავშირებული ჩვენ მოლაპარაკებასთან. მოლაპარაკება რომ დაიწყოს, მე უნდა  დამიბრუნდეს ჩემი კანონიერი უფლებამოსილება. არ არსებობს ასეთი მექანიზმები, ასე თავისუფლად გამათავისუფლონ. აქედან გამომდინარე, მე ვარ მართვაში და ვიქნები, დარწმუნებული ვარ 2012 წლის ნოემბრის ჩათვლით. ხოლო „მაესტროს“, როგორც ერთ-ერთ ყველაზე წარმატებულ პროექტს, დიდ როლს ვათამაშებინებ იმაში, რომ საქართველოში პროცესები გამოჯანსაღებისა და პროგრესისკენ წავიდეს. ამას ვითამაშებთ არა მანიპულირებით, როგორც ეს შეთქმულების თეორიით შეპყრობილ ადამიანებს აქვთ წარმოდგენილი, არამედ -თავისუფალი ჟურნალისტების ტექნიკური, ინტელექტუალური თუ მატერიალური „ნოუ ჰაუების“ გაძლიერების გზით, ტელევიზია გახდება ბევრად უფრო ცქერადი, ვიდრე დღეს არის და იქნება საზოგადოების პოლიტიკური  განწყობების განმსაზღვრელი.

მედიის საკითხთან დაკავშირებით ძალიან საინტერესო მიდგომის დეკლალირება მოახდინეთ, სხვათაშორის, ამდენი ხანია ამგვარი ქმედების განხორციელება ვერ დავინახე ვერცერთი მედიამფლობელის მხრიდან. სწორედ ამიტომ, მინდა, გთხოვოთ, საშუალება მომცეთ და შემიშვათ მამუკა ღლონტთან ინტერვიუს ასღებად. როგორც მითხრეს, აქ ეზოში გადადგილებას თქვენ აკონტროლებთ...

-საქმე ისაა, თქვენ რომ შიგნით შეხვიდეთ, თან შემოგყვებათ დაცვაც. ამაზე ღლონტი არ წამოვა. ერთადერთი რამ შემიძლია შემოგთავაზოთ, ტელეფონით ჩაწეროთ.

რა პრობლემაა? ნუ გამომყვება დაცვა უკან. გააკეთეთ კორიდორი.

-არა, გამორიცხულია. ის არ წამოვა ამაზე.

დავურეკავ, ღლონტი გააღებს კარებს...

-თუ გააღებს, ჩვენი დაცვა, აღარ დააკეტინებს. ბრძანება აქვს მიცემული. მაშინ მოხდება თქვენი მიზეზით ჩვენს შეთანხმებამდე რაღაცა პროცესი, რომლის გაკეთება არ მინდა მე.

კარგით, ჩემი მიზეზით ნამდვილად არ მინდა, რამე მოხდეს, ისევ დასაზუსტებელ საკითხებს დავუბრუნდეთ. რატომ არ გაგაძევათ პოლიციამ გარეთ, მაშინ, როცა ისინი მეორე მხარემ გამოიძახა?

-ლევან ჩიკვაიძემ, რომელიც აქ დამხვდა დილით, შეატყობინა პოლიციას, რომ მოხდა თავდასხმა. ასეთივე განაცხადი გააკეთა კიკაბიძემაც. პოლიცია როცა მოვიდა, მეც და აქ მყოფი ყველა პირი დაგვკითხა. მეც, პაატასაც და ლევან ჩიკვაიძესაც გვესაუბრა. შეადგინეს ოქმი. თუ ლევან ჩიკვაიძე იტყოდა, კიწმარიშვილი შემოიჭრა ტერიტორიაზე და არ ჰქონდა ამის უფლებაო, მაშინ პოლიციამ უთხრა მას, რომ მე დამაპატიმრებდა და განახორციელებდა სისხლის სამართლის საპროცესო მოქმედებებს. ამაზე ლევან ჩიკვაიძემ უთხრა, რომ არა, ეროსის ჰქონდა შემოსვლის უფლება,. როცა მასთან მყოფი ხალხი ვერ ვიცანი, კარები არ გავუღე, ვინერვიულე ძალიანო და ამიტომ გამოგიძახეთო. მოკლედ, ლევანს არ დაუყენებია მოთხოვნა ჩემს დაპატიმრებაზე და არ უთქვამს, რომ ჩვენი მხრიდან მოხდა თავდასხმა. როგორც კი ეს საკითხი მოიხსნა დღის წესრიგიდან, პოლიციამ ორი საათის განმავლობაში ახორციელა საპროცესო მოქმედებები. ჩემი თხოვნის მიუხედავად, რომ შემოეშვათ ჟურნალისტები შენობაში, უარი გვითხრეს, რომ ვიდრე არ დამთავრდება ეს ინციდენტი, ტერიტორიაზე ვერავინ შემოვაო.

პოლიციამ როცა დაამთავრა თავის საქმე, მერე შემოუშვეს შიგნით ჟურნალისტები. სხვათაშორის, ძალიან კორექტულად იმუშავეს. ეს ნასწავლი აქვთ უკვე. ძალიან ხაზგასმულად კორექტულები არიან ასეთ შემთხვევებში. არაფერი დაურღვევიათ საერთოდ. რასაც ვერ არკვევდნენ, თავიანთ უფროსებს უკავშირდებოდნენ და იღებდნენ დამატებით ინსტრუქციებს... მათ თქვეს, რომ ეს არის თქვენი სამოქალაქო დავის საგანი და ერთმანეთში გაარკვიეთ ყველაფერიო. ამ დროს ხან შალვა რამიშვილი მომვარდებოდა ხოლმე, რატომ დგანან აქო და ხან ვინ და ხან ვინ. მე არ მომიყვანია ის პოლიცია, არც შემიტყობინებია მათთთვის, შესაბამისად, ვერც მათ გამო ვაგებ პასუხს. მერაბიშვილმა აგოს მათ ქმედებებზე პასუხი.

არ ფიქრობთ, რომ რასაც დღეს აკეთებთ, სწორედ ხელისუფლების წისქვილზე ასხამთ წყალს?

-აბსოლუტურად გეთანხმებით. ასეა. ზუსტად ესაა ჩემი ნერვიულობისა და გულისტკივილის მთავარი მიზეზი. ჩვენ უნდა გამოვიდეთ ამ სიტუაციიდან, რაც შეიძლება სწრაფად“.