“მე აგენტი ვარ, საქართველოსთვის აგენტი და ჩემი ქვეყნისთვის ვმუშაობ!” - აცხადებს “ქართული სიტყვის” ექსკლუზიური ინტერვიუების ციკლში უშიშროების თადარიგის პოლკოვნიკი, უსაფრთხოების ექსპერტი კონსტანტინე ფორჩხიძე, რომელიც მორიგ სკანდალურ ინფორმაციას აჟღერებს და ამბობს, რომ უსახსრობით შეწუხებული ქართველი ვეტერანები უკრაინაში გარბიან და თუკი იქ ცხოვრებას აიწყობენ, იმაზეც თანახმანი არიან, რომ საქართველოს მოქალაქეობაზე უარი თქვან. ამასთან, ქართველი სპეცსამსახურელი აქცენტს კრემლის მორიგ “ნაღმზეც” აკეთებს და იმ სქემას შიფრავს, რომლითაც რუსეთი ოფიციალურ თბილისს ე.წ. სამხრეთ ოსეთისა და აფხაზეთის დე ფაქტო რესპუბლიკების დამოუკიდებლობის აღიარებას აიძულებს...
- ბატონო კოტე, თქვენი პროგნოზი, რომ შსს-დან გამოყოფილ უშიშროების სამსახურს სათავეში ვახტანგ გომელაური ჩაუდგებოდა, ახდა...
- დიახ, ეს ადვილად პროგნოზირებადი იყო და ამის მოლოდინი მხოლოდ მე არ მქონია...
- რატომ მაინც და მაინც გომელაური?
- იმიტომ, რომ გამოცდილია და უფრო მეტ ნდობას იმსახურებს, თან ახალი კადრია.
- ახალი კადრი როგორაა, როცა ძალოვან უწყებებში მუშაობის დიდი სტაჟი აქვს?
- ახალ კადრს იმ გაგებით ვამბობ, რომ თავის დროზე სისტემიდან კერძო სტრუქტურაში წავიდა. საერთოდ, ამ პოზიციაზე გომელაურის შერჩევა იმითაცაა კარგი, რომ გათქვეფილი არ არის.
- შსს-დან გამოყოფილ უშიშროებას რეალური ძალაუფლება ექნება?
- რა თქმა უნდა, ექნება. ყველაფერს თავი რომ დავანებოთ, არაერთი, მათ შორის, ძალოვანი სტრუქტურების ოპერატიული მომსახურება მოუწევს, რაც მის ხარისხობრივ მაჩვენებელს, სახელმწიფო კონტროლის თვალსაზრისით, გაზრდის. მხედველობაში ქვეყნის წინაშე ძირგამომთხრელი საქმიანობის დროულად გამოვლენა და აღკვეთა მაქვს.
- “ძირგამომთხრელ საქმიანობაში” უცხო ქვეყნების, მათ შორის, რუსეთის სპეცსამსახურთა აგენტურულ მუშაობას გულისხმობთ?
- დიახ...
- სუს-ი შსს-ში რჩება?
- ეს, წესით, შსს-ს ფუნქცია არაა.
- ესე იგი, სუს-ი გაუქმდება?
- არ ვიცი, მაგრამ სუს-ის მთავარი დანიშნულება სახელმწიფოს კონსტიტუციური უზრუნველყოფაა. ამ ფუნქციის შესრულება კი, კონტრდაზვერვასაც შეუძლია, რომელიც სახელმწიფო უშიშროების სააგენტოს დაქვემდებარებაში გადადის და ეს მისასალმებელია თუნდაც იმიტომ, რომ შსს-სა და უშიშროების გაყოფა “ოცნების” ერთ-ერთი დაპირება იყო. ამასაც თავი რომ დავანებოთ, ამ გაყოფით თვითონ ძალოვანი უწყებების კონკურენცია გაიზრდება. ვანო, ყველაფერ ამას იმ პრიზმაში რომ შევხედოთ, რაზეც ჩვენი ინტერვიუების ციკლია აგებული, რომელიც სახელმწიფო და საერთაშორისო დანაშაულის გამოვლენას გულისხმობს, წარმოგიდგენიათ, ორი თანაბარი სტრუქტურა, რომელსაც ინფორმაციის მოპოვების თანაბარი შესაძლებლობა ექნებოდა, თავის დროზე რომ ყოფილიყო, რა მოხდებოდა?
- რა?
- რა და, - კონკურენცია იქნებოდა და როცა კონკურენცია არსებობს, სამოხელეო დანაშაული ნაკლებია. ამასთან, სახელმწიფო უშიშროების სააგენტო გასამხედროებულ უწყებებს, მათ შორის, შინაგან ჯარსა და საზღვრის დაცვის დეპარტამენტსაც გააკონტროლებს, ანუ ოპერატიულად მოემსახურება.
- მაშასადამე, აწი, თუკი, მაგალითად, რუსი ოკუპანტები ე.წ. ადმინისტრაციულ საზღვარს კიდევ გადმოსწევენ, ამ საკითხით უშიშროება უნდა დაინტერესდეს, არა?
- რა თქმა უნდა. აქამდე კი, ამ თემაზე კონტრდაზვერვასა და სუს-ს უნდა ეზრუნათ.
- ის, რაც ხურვალეთთან მოხდა, საქართველოს კონსტიტუციური უსაფრთხოების დარღვევაა თუ არა?
- დიახ, ეს უცხო ქვეყნის მიერ საქართველოს სახელმწიფოებრიობის წინააღმდეგ მიმართული ძირგამომთხრელი საქმიანობაა, რომელსაც დესტრუქცია მოჰყვება. სხვათა შორის, კარგია, რომ შსს გააქტიურდა და კონფლიქტის ზონაში მუდმივი პატრულირება და მოსახლეობის დაცვაზე ზრუნვა გაიზარდა, თუმცა ეს აქამდეც უნდა გაეკეთებინათ. ყველაფერი ეს ყოველდღიური რუტინაა....
ისე, არ უნდა დაგვავიწყდეს, რომ იმ დროს, როცა საზღვრის გადმოწევა მოხდა, ე.წ. სამხრეთ ოსეთში რუსეთის 58-ე არმიის წვრთვნები ტარდება. ეს სწორედ ის 58-ე არმიაა, რომელიც 2008 წელს შემოიჭრა, საქართველოს ტერიტორიების ოკუპირება მოახდინა და დღემდე ამ ოკუპირებული ტერიტორიების ნაწილზეა ბაზირებული. სხვათა შორის, 58-ე არმიამ წვრთვნები 2012 წლის სექტემბერში, საპარლამენტო არჩევნების წინაც გამართა.
- ვატყობ, იმის თქმა გინდათ, რომ ყველაფერი ეს, უბრალოდ, დამთხვევა არაა. ისე, თუკი სიმბოლოებზე ვლაპარაკობთ, კიდევ ერთი სიმბოლოც არსებობს: 2008 წლის მსგავსად, წელსაც ოლიმპიადაა...
- დიახ, ესეც საინტერესო მინიშნებაა. საერთოდ, რუსები, როგორც წესი, ზაფხულობით აქტიურდებიან ხოლმე.
- რატომ?
- იმიტომ, რომ თუკი კრემლი საქართველოს დანარჩენი ტერიტორიების ოკუპაციასაც გადაწყვეტს, ზაფხულში შეუძლია, შეტევა ჰაერიდანაც განახორციელოს.
- და ზამთარში, საჰაერო შეტევის განხორციელებაში ხელს რა, ან ვინ შეუშლის?
- 2008 წელს, აგვისტოში, როგორც კი მოიღრუბლებოდა, რუსები ვეღარ გვბომბავდნენ, ანუ 58-ე არმიის საჰაერო ძალები ისე არაა შეიარაღებული, რომ საბრძოლო ამოცანები უამინდობის დროს განახორციელონ.
ოლიმპიადასა და ზაფხულსაც თავი რომ დავანებოთ, ახლახან თინა ხიდაშელმა საფრანგეთთან საჰაერო სისტემის გადაიარაღებაზე ხელშეკრულება გააფორმა. ამას ვაზიანში ნატო-ს სწავლებების დაწყებაც დაემთხვა, რომელიც ნატო-ს ეგიდით ტარდება და რომელშიც ლატვიელები, ბულგარელები, ამერიკელები და სხვები მონაწილეობენ. ოკუპანტების მიერ საზღვრის გადმოწევა კი, ჩემი აზრით, სწორედ ყველაფერ ამაზე პასუხია.
ისე, 2005 წლიდან მოყოლებული, თავდაცვის ყველა მინისტრის პრიორიტეტი საჰაერო თავდაცვითი სისტემის გაძლიერება და მოდერნიზება იყო. ამ კუთხით, სახელმწიფო ბიუჯეტიდან, დაახლოებით, მილიარდნახევარი დოლარია დახარჯული, მაგრამ როგორც იტყვიან, ხელში არაფერი გვიჭირავს! ამ დროს, საფრანგეთთან, რომელიც ნატო-ს წევრი ქვეყანაა, საჰაერო თავდაცვის კუთხით ხელშეკრულებას ვაფორმებთ, რაც ბუნებრივია, რუსეთს გააღიზიანებდა.
- იმის თქმა გინდათ, ბატონო კოტე, საფრანგეთთან საჰაერო თავდაცვის კუთხით თანამშრომლობა არ უნდა დაგვეწყო?
- არა. ხელშეკრულება უნდა გაგვეფორმებინა, მაგრამ რუსეთისგან შესაბამის ნაბიჯებს უნდა ველოდოთ...
- სიმართლე გითხრათ მიკვირს, სიტყვა საჰაერო თავდაცვაზე რატომ ჩამოაგდეთ...
- აგიხსნით: თავდაცვის სამინისტრო, უმეტესად, საბჭოთადროინდელი ოფიცრებითაა დაკომპლექტებული. შეიძლება, ზოგმა თანამდებობა შეიცვალა და, მაგალითად, სამხედრო ატაშედ დანიშნეს, მაგრამ სარდლობაში, ანუ იმ რგოლში, რომელიც საჰაერო თავდაცვის სისტემას განაგებს, ისეთებიც არიან, ვინც კონტრსადაზვერვო უზრუნველყოფას ექვემდებარებიან.
- ანუ?
- არსებობს ინფორმაცია, რომ იმ ქვეყანასთან, რომლის წიაღშიც აღიზარდნენ, შესაძლოა, პირდაპირი ან ირიბი კავშირი ჰქონდეთ. ვანო, შეგახსენებთ, რომ იმ სქემებში, რომლებიც იარაღის ტრაფიკს უკავშირდება, ამ ოფიცრების უმეტესობა მეტ-ნაკლებად ფიგურირებს. ამიტომ, თინა ხიდაშელს საჰაერო თავდაცვაში ნოვაციების ამ შემადგენლობით დანერგვა გაუჭირდება. მთავარი საჰაერო თავდაცვის სისტემის ყიდვა კი არაა, ექსპლუატაციაც აუცილებელია. საამისოდ კი, შესაბამისი კადრებია საჭირო. ამ ოფიცრების ხელში კი, ეს ტექნიკა, შესაძლოა, არაბრძოლისუნარიანი გახდეს, ანუ მიზანმიმართული დანგრევა მოხდეს. ეს ძირგამომთხრელი საქმიანობის ყველაზე თვალშისაცემი ნიშანია...
მოკლედ, დღეს რუსეთი ჰიპერაქტიურია და ცდილობს, ძირგამომთხრელი საქმიანობა ყველა მიმართულებით აწარმოოს, მათ შორის, თავდაცვის სამინისტროში, ასევე, გადმოწიოს საზღვრები, მართული პატარ-პატარა ორგანიზაციებისგან აქციები მოაწყოს, ანუ ყველაფერი ეს ერთი ჰიპერაქტიული ჯაჭვის პატარ-პატარა რგოლებია, რომლებითაც საერთო სურათი იქმნება.
აბაშიძე-კარასინის შეხვედრებზე რუსეთის მხრიდან ერთი და იგივე გზავნილები ისმის - ისევ საუბარი რკინიგზაზე და საქართველოსა და ე.წ. სამხრეთ ოსეთთან პირდაპირი დიალოგის დაწყება, თითქოს ეს პრობლემა ქართველებსა და ოსებს შორისაა მოსაგვარებელი. ამასთან რუსეთი ისევ საბჭოთადროინდელ რუკებს ეყრდნობა და საქმე ისევ ბორდერიზაციამდე მიჰყავს.
- რუსეთი ერთი და იგივეს რატომ იმეორებს, ანუ ე.წ. ცხინვალის მთავრობასთან პირდაპირ დიალოგს რატომ გვაიძულებს?
- იმიტომ, რომ ამით ჩიხში შეგვიყვანოს.
- დიალოგით ჩიხში როგორ შეგვიყვანს?
- ჩიხში შეყვანის შემდეგ კი, ერთადერთი გზაა, რომელიც არაღიარებული ე.წ. რესპუბლიკების დე ფაქტო სახელმწიფოებრიობასთან შეგუებამდე მიგვიყვანს, უფრო სწორად, აქამდე ეტაპობრივად მივალთ.
- მოდით, სათქმელი უფრო გაამარტივეთ...
- რუსეთი ისეთ პირობებს შეგვიქმნის, რომ იძულებულნი გავხდებით, ოსებსა და აფხაზებსაც პირისპირ დაველაპარაკოთ.
- როგორც მახსოვს, ადრე სწორედ ამ პირისპირ საუბრის მომხრე იყავით...
- ახლაც მომხრე ვართ, მაგრამ ამ საუბრის პირობები რუსეთმა არ უნდა გვიკარნახოს. აფხაზ და ოსურ მოსახლეობასთან პირდაპირი პოლიტიკის გატარება როგორ წარმოგიდგენიათ, როცა ეს ხალხი რუსული ჩექმის ქვეშ ცხოვრობს? - აღნიშნულ ტერიტორიებს “კა-გე-ბე”-ს მაიორები განაგებენ.
- ესე იგი, რუსული ჩექმისგან ჯერ აფხაზები და ოსები უნდა გათავისუფლდნენ და მათთან პირდაპირი დიალოგი ამის შემდეგ უნდა დავიწყოთ?
- რა თქმა უნდა... მოკლედ, ხელისუფლება უნდა შეეცადოს, რომ ოკუპირებულ რეგიონებში მოსახლეობის განწყობა საქართველოსკენ შემოატრიალოს...
- ზოგი ამბობს, რომ აგვისტოს ომის დროს სიტუაცია შემოტრიალებული იყო და ამის დასტურად სანაკოევის ადმინისტრაცია მოჰყავს, რომელიც სადემარკაციო ზოლის პირას ფუნქციონირებდა...
- აგვისტოს ომის კონტექსტში, სიტუაციის შემოტრიალებაზე ლაპარაკი ნაკლებად მნიშვნელოვანია, რადგან მაშინ რუსეთს განსაზღვრული გეოპოლიტიკური ინტერესი, გნებავთ, მიზანი ჰქონდა და მიუხედავად იმისა, საქმე მოგვარებისკენ მიდიოდა თუ არა, ეს ამოცანა უნდა შეესრულებინა.
- კრემლის ეს გეოპოლიტიკური ამოცანა დღეს, მგონი, უფრო მოცულობითია...
- დიახ, გეთანხმებით, თუმცა რუსეთი უკრაინაში სერიოზულ ომს აწარმოებს და საქართველოში ე.წ. მეორე ფრონტის გახსნა არაფრად უღირს. ამიტომ, ცდილობს, ხელისუფლება აიძულოს და გარკვეულ დათმობებზე წაიყვანის.
- მთელ ხელისუფლებაზე ვერ ვიტყვით, მაგრამ უმრავლესობის ცალკეული წევრები, მაგალითად, ტყემალაძე საქართველოს ევროატლანტიკური განწყობის გადასახედად რეფერენდუმის ჩატარებას ითხოვს...
- ამ თემაზე რეფერენდუმი უკვე ჩატარდა - საქართველოს ევროატლანტიკური არჩევანი სწორედ რეფერენდუმზე გადაწყდა. რეფერენდუმით მიღებული გადაწყვეტილების გაუქმება მხოლოდ რეფერენდუმითაა შესაძლებელი. ტყემალაძე რეფერენდუმს ამიტომაც ითხოვს, მაგრამ ტყემალაძე ერთ გარემოებას არ ითვალისწინებს: რეფერენდუმის დანიშვნა-არდანიშვნას პრეზიდენტი წყვეტს. ამ ვითარებაში რეფერენდუმზე ლაპარაკი “ქართული ოცნებისა” და “ნაცმოძრაობის” რუსულ ფრთებში ქულების დაწერაა და მეტი არაფერი. ესენი მეკავშირეები არიან და, ბუნებრივია, ერთ ინტერესს ემსახურებიან. ეს ინტერესი კი, რუსული ინტერესია! ტყემალაძის ეს განცხადება “ქართული ოცნებისთვის” სასარგებლო კი არა, უფრო ზიანის მომტანია!
ერთი სიტყვით, არ გამოვრიცხავ, რომ რუსეთმა საქართველოს ხელისუფლება, ეტაპობრივი იძულების გზით, სამხრეთ ოსეთის დამოუკიდებლობის აღიარებამდე მიიყვანოს. სწორედ ამ კონტექსტში უნდა განვიხილოთ შვეიცარული მხარის მიერ საბაჟო კონტროლის დაწესებაზე გამოთქმული ინიციატივა, რომელიც რუსეთის მიერ ნაკისრი ვალდებულებაცაა - როცა მსოფლიო სავაჭრო ორგანიზაციაში შედიოდა, საქართველომ, ე.წ. მონიტორინგის საკითხის სანაცვლოდ, რუსეთს ამ ორგანიზაციაში შესვლას მხარი დაუჭირა, ანუ მაშინ შვეიცარიულმა მხარემ განაცხადა, რომ საქართველო-რუსეთის საზღვარზე საბაჟო კონტროლს განახორციელებდა.
- ეს თემა მხოლოდ ახლა გააქტიურდა. კარგია თუ ცუდი?
- გააჩნია, საბაჟო კონტროლი სად განხორციელდება - ფსოუზე, ენგურზე, როკის გვირაბის გაღმა თუ ე.წ. სამხრეთ ოსეთის ადმინისტრაციულ საზღვართან.
- ბატონო კოტე, თქვენი აზრით, სად უნდა განხორციელდეს?
- რა თქმა უნდა, - ფსოუსა და როკის გვირაბის გაღმა.
- შვეიცარია რას ამბობს?
- ყველაფერი საქართველოს ხელისუფლების პრინციპულ პოზიციაზეა დამოკიდებული. იმ შემთხვევაში, თუკი წავუყრუეთ და საბაჟო კონტროლი ენგურსა და ე.წ. სამხრეთ ოსეთის ადმინისტრაციულ საზღვარზე განგვითავსეს, იცით, რას მივიღებთ?
- რას?
- შვეიცარიული მხარე ვალდებული არ იქნება, რომ იმ ტვირთებზე, მათ შორის, სამხედრო ტვირთებზე, რომლებიც ცხინვალისა და სოხუმის ტერიტორიაზე შევა, ინფორმაცია მოგვაწოდოს, ანუ ეს იმის ნიშანი, იქნება, რომ დე ფაქტო ე.წ. რესპუბლიკების დამოუკიდებლობას არაპირდაპირ შვეიცარიული მხარეც აღიარებს, რაც შვეიცარიის მხრიდან საქართველოს მიმართ, რბილად რომ ვთქვათ, არამეგობრული ნაბიჯი იქნება. ამიტომ, საქართველოს ხელისუფლებამ პრინციპულად უნდა განაცხადოს, რომ საბაჟო კონტროლი ან საერთოდ არ გვჭირდება, ან როკის გვირაბის გაღმა და ფსოუზე უნდა განხორციელდეს. თუ ასე მოხდა, ცუდ მდგომარეობაში თავად რუსეთი აღმოჩნდება - იმ საზღვრების გადასინჯვის წინაშე დადგება, რომელიც თავად დააწესა.
- ერთი სიტყვით, ბატონო კონსტანტინე, სახეზე ახალი პოლიტიკური თამაში და გადანაწილებაა?
- ასეა და ახლა ყველაფერი საგარეო საქმეთა მინისტრსა და მის გუნდზეა დამოკიდებული, თუ როგორ პრინციპულ პოზიციას გამოიჩენენ.
- მთავარია, საგარეო საქმეთა მინისტრი ისევ ემოციურ გაუგებრობაში არ აღმოჩნდეს...
- ისე, საბაჟო კონტროლის თემით მხოლოდ ხელისუფლება კი არა, ყველა პოლიტიკური და საექსპერტო ჯგუფი უნდა დაინტერესდეს, რადგან ძალიან მნიშვნელოვანია..
- სხვათა შორის, გავრცელდა ინფორმაცია, რომ საზღვარი სომხეთმაც გადმოსწია, თუმცა ეს ოფიციალურად არ დადასტურდა...
- ვანო, არაერთხელ მითქვამს, რომ საზღვრების გადაწევა-გადმოწევა მოხდება, რამეთუ საქართველოს საზღვრები დემარკირებული და დემილიტირებული არაა. კარგი, მიშას დროს არაფერი გაკეთდა, მაგრამ 2012 წლის პირველი ოქტომბრიდან ლამის უკვე სამი წელი გავიდა და რა გაუხდა საგარეო საქმეთა სამინისტროს, რომ ეს ამოცანა გადაწყვიტოს და იგივე ჩვენს მეგობარ აზერბაიჯანსა თუ სომხეთთან საზღვრები დაადგინოს?!
- ინტერნეტში ჰეიდარ ალიევის განცხადებაც გავრცელდა, ევროპა არ გვინდა, ისეც კარგად ვართო და ქართველმა რუსეთუმეებმაც ყიჟინა დასცეს...
- ამაზეც ვთქვი, რომ რუსეთი აზერბაიჯანის ევრაზიულ კავშირში მოქცევაზე მუშაობს და ამით საქართველოს საკითხი გადაწყდება, თან ძალიან მარტივად,
აღმოსავლეთ პარტნიორობის სამიტზე აზერბაიჯანმა ღიად განაცხადა, რომ ევროკავშირში გაერთიანებას არ ცდილობს, რამაც თურქეთის გაღიზიანება გამოიწვია...
- ჩვენთვის რომ ვთქვათ, აზერბაიჯანს, ნავთობის გამო, ვაჭრობა რუსეთთანაც შეუძლია და დასავლეთთანაც...
- დიახ, ოფიციალურ ბაქოს ჩვენზე უკეთესი პოზიცია თუნდაც იმიტომა აქვს, რომ ჩვენზე ოთხჯერ, თუ მეტჯერ არა, მდიდარია.
მოკლედ, აზერბაიჯანის საკითხის გადაწყვეტით, საქართველოს, პრაქტიკულად, მარწუხებში მოაქცევს, რასაც შიდაპოლიტიკური რყევები მოჰყვება, ანუ მკვეთრად პრორუსული ძალები მტკიცებას დაიწყებენ, სადაც მთელი კავკასიაა, ჩვენც იქ უნდა ვიყოთო...
- პრორუსული ძალების გააქტიურება ახლაც თვალშისაცემია... ხურვალეთთან გამართულ არასამთავრობოთა აქციების ორგანიზება, პირდაპირ თუ ირიბად, “ნაციონალებს” ბრალდებათ... წეღან, ბატონო კოტე, ვიდრე დიქტოფონს ჩავრთავდი, უკრაინაში წასული ქართველი ვეტერანები ახსენეთ. რატომ?
- მიხეილ სააკაშვილი რუსეთის ინტერესების ფარული გამტარებელია.
- ეს “ძველი სიმღერაა”, თან უკრაინაში წასულ ქართველ ვეტერანებზე გკითხეთ...
- საქართველოში ვეტერანების მობილიზაცია და უკრაინაში რეკრუტირება მიმდინარეობს.
- ვეტერანები უკრაინაში ძალით მიჰყავთ?
- არა...
- უკრაინაში წასვლა თქვენც შემოგთავაზეს?
- ჩემთან კონტაქტი არ ჰქონიათ. უკრაინაში წასვლას, ძირითადად, მათ სთავაზობენ, ვისაც პოლიტიკური სტატუსი არ აქვთ და ისეთ მდგომარეობაში არიან ჩავარდნილნი, რომ ოჯახის შენახვა უჭირთ. ეს ადამიანები ფიქრობენ, თუ უკრიანაში ცხოვრების აწყობის პერსპექტივა გაუჩნდათ, თანახმანი არიან, რომ საქართველოს მოქალაქეობაზე უარი თქვან, ანუ ჩვენ ვეტერანების მასას ვკარგავთ, რომელიც რთულ პირობებში, შესაძლოა, გამოვიყენოთ.
- ყველაფერი ეს ცუდია, მაგრამ სააკაშვილი რა შუაშია?
- ისინი პირდაპირ მიშას ემისრები ხდებიან!
- მიშას ემისრები რომ არ გახდნენ, მაშინ სახელმწიფომ მიხედოს!
- ვანო, სიმართლეს ამბობთ. სახელმწიფო რომ ხარ, პასიური არ უნდა იყო და როცა გესმის, რომ ვეტერანები უკრაინაში მიდიან, რას აკეთებ, რომ არ წავიდნენ? შესაბამის სოციალურ პირობებს რატომ არ უქმნი? სხვათა შორის, უკრაინაში ძირითადად, ისინი მიდიან, ვინც თავის დროზე რუსეთთანაც იყვნენ ასოცირებულნი.
- ბატონო კოტე, ეს თქვენი ვარაუდია თუ კონკრეტული ინფორმაცია გაქვთ?
- ინფორმაცია მაქვს და შემიძლია, მაგალითიც დავასახელო: ძალიან საინტერესო პიროვნებაა ვიცე პოლკოვნიკი თ. თ-შვილი, რომელიც გოგი თათუხაშვილის მეგობარი და შოთა კვირაიას “კამანდის” ყოფილი წევრია. შოთა კვირაია ვისთანაც იყო ასოცირებული, ყველამ იცის. ეს ადამიანი, რომელიც თავის დროზე სამხედრო კონტრდაზვერვაში მუშაობდა და კობა ოთანაძის მეგობარიცაა.
- ბატონო კოტე, კონტრდაზვერვაში თქვენც მუშაობდით!
- დიახ, მაგრამ არც სამშობლო მიმიტოვებია და არც სხვის ომში მიმიღია მონაწილეობა! მე საქართველოს აგენტი ვარ და საქართველოსთვის ვმუშაობ! მათგან სწორედ ამით განვსხვავდები!
- ამ თ. თ-შვილმა რა ჩაიდინა, რომ თქვენი ინტერესის არეალში მოხვდა?
- პირდაპირ რუსულ ინტერესებთანაა ასოცირებული და დონეცკის მიმართულებაში მსახურობს, რომელიც ირაკლი ქურასბედიანს აბარია. სხვათა შორის, ქურასბედიანზე ადრე ვისაუბრეთ და ვარდიკო ნადიბაიძესთან მის რუსულ კავშირებზეც გითხარით. ესე იგი, გამოდის, რომ ოპერატიულად საინტერესო “ტიპები”, უკრაინაში, “ნაცმოძრაობის” ეგიდით, ფრონტის წინა ხაზზე აღმოჩნდნენ და ეს რუსული სპეცსამსახურებისთვის ერთ-ერთი კარგი საშუალებაა, რომ ინფორმაცია მიიღონ, თუ რა ხდება უკრაინის შეიარაღებულ ძალებში.
- კოტე ბატონო, რაკი ამბობთ, რომ საქართველოს აგენტი ხართ, უშიშროების ახალ სამსახურთან თანამშრომლობას ხომ არ გეგმავთ?
- შემოთავაზება არ ყოფილა.
- თანამშრომლობა თქვენ შესთავაზეთ...
- ურთიერთობას და ჩემს ხელთარსებულ ინფორმაციას ყველას ვთავაზობ, მათ შორის, თავდაცვის სამინისტროსაც, კონტრდაზვერვასაც, მაგრამ ყველა ამბობს, საინტერესოა და ამის იქით საქმე არ მიდის. ეს ან გარკვეული არაპროფესიონალიზმია, ან...
ყველაფერს კადრები წყვეტენ. კადრები სამი ნიშნით - პროფესიონალიზმით, სამშობლოს ერთგულებითა და არაკორუმპირებულობით უნდა შეარჩიონ.
- თქვენ სამივეს აკმაყოფილებთ?
- რა თქმა უნდა, სამშობლოს სიყვარულიც დამიმტკიცებია...
- მაპატიეთ, მაგრამ სამშობლოს სიყვარული ყველას თავისებურად ესმის...
- კი ბატონო, მაგრამ ჩემი მხრიდან, უკან არაფერზე დამიხევია. ვერავინ თითს ვერ გამოიშვერს, კორუმპირებულიაო. კორუმპირებული რომ ვყოფილიყავი, ვანო მერაბიშვილი პირველი მე “ჩამაყუდებდა”. პროფესიონალიზმი თანამდებობაზე დანიშვნით კი არა, შესაბამისი თეორიული ცოდნითა და პრაქტიკით იბადება. ამიტომ, მხოლოდ მე კი არა, ჩემს მეგობრებსაც ნებისმიერი შეგვეჯიბროს!
ბოლოს და ბოლოს, ახლა სტრუქტურა - ვეტერანთა სახელმწიფო სამსახური არსებობს და იმაზე, რაზეც ვლაპარაკობ, თავში ხელს შიხიაშვილი უნდა ირტყამდეს. თუ ეს სამსახური ვეტერანებისთვისაა შექმნილი და საკანონმდებლო ბაზაში ცვლილებების ინიციატივით არ გამოდიხარ...
- როგორც ვიცი, ამ კუთხით ინიციატივები არსებობს...
- ყველა თავისი ინტერესებიდან გამოდის, არადა, პირველ რიგში, ვეტერანთა ინტერესებიდან უნდა გამოვიდნენ. ძალოვანი უწყებების ვეტერანებს, ვინც თავის დროზე სამსახურებიდან გაყარეს, ათ წელზე მეტი ნამსახურები არ აქვთ, კალენდარული ოცი წელი მხოლოდ საბჭოთა ოფიცრებს აქვთ. ამიტომ, ამ ხალხს 10 წელი გადაყრილი აქვს. შეუძლიათ, ყველაფერი მარტივად მოაგვარონ: “ნაციონალების” ათი წელი ნამსახურევ ათს დაუმატონ, ანუ კალენდარული 20 შეასრულონ, ამ ხალხს პენსია მისცენ და თავს თვითონ მიხედავენ, მაგრამ ამას არ აკეთებენ და ვეტერანებს აბოროტებენ!
მეორე, რაც უნდა გაკეთდეს: შე მამაცხონებულო, ვეტერანის სამსახურიდან დათხოვა, თუ სისხლის სამართლის დანაშაული არ ჩაიდინა და ზღვრული ასაკისთვის არ მიუღწევია, არ შეიძლება.
- ითხოვთ, რომ “ნაციონალების” დროს სამსახურიდან გაყრილი ვეტერანები უკან დააბრუნონ?
- ვისაც ამის სურვილი და შესაძლებლობა ექნება, რატომაც არა?!
ეს ხალხი იხოცება. მაგალითად, გუშინ კიდევ ერთი ვეტერანი გარდაიცვალა...
- ვეტერანთა სახლმწიფო სამსახურის ხელმძღვანელობას რატომ არ ხვდებით?
- შეხვედრის სურვილი ჰქონდათ, მაგრამ გადაიფიქრეს...
სხვათა შორის, თავდაცვის სამინისტრო ფრაბგებთა საჰაერო თავდაცვის სისტემებზე ხელშეკრულება რომ გააფორმა, ეს საკითხი ნდობის ჯგუფში გივი თარგამაძესთან ერთად განიხილეს და ეს როგორ მოგწონთ?
- თარგამაძე ნდობის ჯგუფის წევრია...
- და ხალხი თარგამაძეს ენდობა? ასეთი ნდობის ჯგუფი არ მჭირდება!
- ნდობის ჯგუფში ოპოზიციის წარმომადგენელიც უნდა იყოს, გივი თარგამაძე ოპოზიციონერია...
- არ შეიძლებოდა, იგივე “ნაცმოძრაობიდან” ნდობის ჯგუფში სხვა, ანუ ის შეეყვანათ, ვინც იარაღით ვაჭრობის შავბნელ სქემებში გარეული არაა? ამ შავბნელ სქემებზე პასუხისმგებლობა, პირველ რიგში, ნდობის ჯგუფს ეკისრება, რომლის თავმჯდომარეც ბატონი გივი გახლდათ და მას საიდუმლო ხელშეკრულებას აცნობ? რა გარანტია არსებობს, რომ ინფორმაცია არ გაჟონავს, თუმცა არ ვიცი, ამ შეხვედრაზე მხოლოდ გეგმებზე ისაუბრეს, სქემებზე თუ კომპანიებზეც. საერთოდ, როცა ასეთ ნაბიჯს დგამ, ყველა გარემოება, მათ შორის, ისეთიც უნდა გაითვალისწინო, რომელიც პიროვნებებსაც უკავშირდება.
