"საპარლამენტო სივრცე სწორედ პარტიების თანამშრომლობისთვისაა და ქვეყნისთვის მნიშვნელოვან საკითხებზე განსხვავებული პოლიტიკური ხედვის პარტიებთან თანამშრომლობაც უნდა ვისწავლოთ - საპარლამენტო ცხოვრებაში ეს აბსოლუტურად დასაშვებად მიმაჩნია. პარტიულ თანამშრომლობას კი "ნაცმოძრაობასთან" არ ვგეგმავთ - ჩვენ შორის არის ფუნდამენტური სხვაობა. ჩვენი ხედვა ერთმანეთისგან აბსოლუტურად განსხვავებულია, მათ შორის დემოკრატიულ სახელმწიფო მოწყობაზე. სააკაშვილის ხელისუფლება იმიტომ დავტოვე და დავუპირისპირდი მას, რომ არადემოკრატიული იყო", - აცხადებს "თავისუფალი დემოკრატების" თავმჯდომარე ირაკლი ალასანია გაზეთ"რეზონანსისთვის" მიცემულ ინტერვიუში, სათაურით ირაკლი ალასანია: "ოცნება" და "ნაცმოძრაობა" წარსულია, ელექტორატს ახალი პოლიტიკური ძალა სურს და ჩვენ გვაქვს ეს პოტენციალი". 

"მიმაჩნია, რომ "ნაცმოძრაობაც" და "ქართული ოცნებაც" არის პოლიტიკური წარსული. სამომავლოდ ვინც ხელში უნდა აიღოს ქვეყნის მართვა, ეს არის "თავისუფალი დემოკრატები". "ენდიაის" ბოლო გამოკითხვის შედეგების დინამიკაც აჩვენებს, რომ მმართველ კოალიციას ორ წელიწადში 50%-ზე მეტი მხარდამჭერიდან რეიტინგი 24%-მდე შეუმცირდა. "ნაცმოძრაობა" კი 9 წელი იყო ხელისუფლებაში და დღეს მხოლოდ 14% აქვს. ეს ციფრები მე როგორც პოლიტიკოსს, ერთ რამეს მეუბნება - ელექტორატს მოსწყინდა ერთიც და მეორეც და ელექტორატს უნდა ახალი პოლიტიკური ძალა. ჩვენ გვაქვს ეს პოტენციალი. გვაქვს ჩვენი პოლიტიკური დღის წესრიგი. რა თქმა უნდა, საპარლამენტო არჩევნებზე დამოუკიდებლად გავალთ. ეს არაერთხელ გვითქვამს და დღესაც გიდასტურებთ", - აღნიშნავს გამოცემის კორესპონდენტთან საუბრისას ირაკლი ალასანია. 

"მნიშვნელოვანია არა ის, თუ რა ურთიერთობა გვექნება ამა თუ იმ პარტიასთან, არამედ ხალხისთვის მნიშვნელოვანია, თუ რას შევთავაზებთ ეკონომიკური გაჯანსაღების კუთხით. ყველაფერი უკავშირდება ეკონომიკურ წინსვლას. ამ ხელისუფლებამ ეკონომიკური წინსვლის კუთხით, სამწუხაროდ, ვერანაირი წვლილი ვერ შეიტანა. არის სავალუტო კრიზისი, ამას გარდა, ვერ შეიქმნა სამუშაო ადგილები და ვერც შეიქმნება ამ პირობებში, როდესაც განვითარების ტემპი არის ძალიან დაბალი. ჩვენ ამომრჩევლისთვის მთავარი შეთავაზება გვაქვს ეკონომიკური ზრდა, მთავარია შიდა პროდუქტის ზრდა. ამასთან დაკავშირებით უახლოეს 2 კვირაში წარვადგენთ ჩვენს ეკონომიკურ ხედვას, სადაც საზოგადოება ასევე დაინახავს შემომატებულ ეკონომიკურ ექსპერტებს, რომლებიც "თავისუფალ დემოკრატებს" უკვე ჰყავს. ჩვენი მთავარი ამოცანა იქნება, რაც შეიძლება მეტი სამუშაო ადგილი შევუქმნათ ჩვენს მოქალაქეებს, ქართველები არ არიან ზარმაცები, მაგრამ არ აქვთ შესაძლებლობა. ეს ადგილები უნდა შექმნას ბიზნესმა, რომელსაც დასჭირდება ბიზნესგარემოს შექმნა. ამაზე იქნება აწყობილი ჩვენი წინასაარჩევნო კამპანია", - განაგრძობს რესპონდენტი.

"როდესაც ხელისუფლებაში ვიყავით, პასუხისმგებლობა აღებული გვქონდა საგარეო პოლიტიკაზე და თავდაცვაზე. ეს არის ის ორი სფერო, რომლითაც საქართველომ წარმატებას მიაღწია. ნატოს უელსის სამიტზე მიღწეული წარმატება, ასოცირების ხელშეკრულება, ჩვენი ტერიტორიების, აფხაზეთისა და ოსეთის აღიარების რიცხვი შემცირდა, გაიზარდა ჩვენი რეზოლუციის რიცხვი შვიდით. ანუ ხელისუფლების ყველა წარმატება, რაც ხელშესახები იყო, სწორედ საგარეო პოლიტიკურ ფრონტს უკავშირდება. მე ვიყავი თავდაცვის მინისტრი და ამაზე ვიყავი კონცენტრირებული. არ შეიძლება ერთმა კაცმა ცხრა საქმე აკეთოს. ინსტიტუციურად არ შეიძლება. დღეს ჩვენი ერთ-ერთი მთავარი პრობლემაა, რომ არაფორმალური პირები იღებენ გადაწყვეტილებას. ბიძინა ივანიშვილმა არაფორმალური მართვის სქემა შექმნა. ეს არასწორია, ყველა ინსტიტუტმა უნდა აკეთოს ის, რაც აქვს ჩაბარებული - ხელისუფლებაში მოსვლის შემდეგ ასე ვაპირებთ ქვეყნის მართვას, რომ დელეგირება გავუკეთო ყველა ინსტიტუტს და საერთო ჩანაფიქრით მათ მიიღონ გადაწყვეტილება. არ შეიძლება, რომ მთავარი პროკურორი ერეოდეს ბიზნესის გადაწყვეტის საკითხებში, როგორც ეს სააკაშვილის დროს ხდებოდა. ეს რომ ხდებოდა და ხდება, ამიტომ იყო წარუმატებელი წინა ხელისუფლებაც და ახლანდელიც.", - თვლის "თავისუფალი დემოკრატების" ლიდერი.

"როდესაც ბიძინა ივანიშვილმა დატოვა პრემიერ-მინისტრის თანამდებობა, მასთან მე აღარ მქონია ურთიერთობა. ერთადერთხელ შევხვდი. არც სატელეფონო საუბრები არ გვქონია. იმ დროს უკვე ჩვენი ურთიერთობა არ იყო იმ დონეზე, რომ ამ სახის ურთიერთობა გაგვეგრძელებინა. მაგრამ ბუნებრივია, ის ჩემს საქმეებში ერეოდა თავის მიერ შერჩეული პრემიერის სახით და გარკვეულ პროცესებს აფერხებდა. საჰაერო თავდაცვის ხელშეკრულების გარდა, ჩარევა სხვა საკითხებზეც ყოფილა, მაგრამ ის იყო ყველაზე ხელშესახები საკითხი. გარდა ამისა, ყველა პრინციპულ საკითხზე, როდესაც პრემიერს მივმართავდი, მისგან უპასუხოდ რჩებოდა. იგრძნობოდა, რომ მას არ ჰქონდა დელეგირებული უფლება, რომ აეღო ამ ინიციატივაზე პასუხისმგებლობა, ამიტომ ყველაფერზე მე ვიღებდი პასუხისმგებლობას", - განმარტავს ირაკლი ალასანია.

"მინდია ჯანელიძის ზარის მიუხედავად, მე საჰაერო თავდაცვის შესახებ ხელშეკრულება მაინც გავაფორმე. დიდი იმედი მაქვს, რომ თავდაცვის ახლანდელი მინისტრი საქმეს ბოლომდე მიიყვანს. ეს უზრუნველყოფს იმას, რომ საჭიროების შემთხვევაში ქვეყანა ეფექტურად დავიცვათ, ეს არის მთავარი. რაც შეეხება იმას, თუ რატომ არ ვისაუბრე ამაზე მაშინვე, ეს გავაკეთე იმიტომ, რომ დარჩენილი იყო პერიოდი, როცა უკვე უნდა შესრულებულიყო ხელშეკრულების პირობები. მარტის ბოლომდე უნდა ამოქმედებულიყო. არ ვისაუბრე იმიტომ, რომ ამ გახმოვანებით ვინმესთვის შეფერხების მიზეზი არ მიმეცა. მაშინდელ მინისტრს დავუტოვე შესაძლებლობა, რომ სწორი და სახელმწიფოებრივი გადაწყვეტილება მიეღო. ჩვენმა შემდგომმა ბრიფინგებმა და ზეწოლამ, მგონი, უკვალოდ არ ჩაიარა და იმედი მაქვს, ეს შეთანხმება შესრულდება თინა ხიდაშელის მინისტრობის პერიოდში", - მიიჩნევს ირაკლი ალასანია. 

"რესპუბლიკური პარტია" ჩვენთან ძალიან ახლოს მდგომი პარტიაა თავისი ლიბერალური ღირებულებებით. იმის მიუხედავად, რომ ისინი ხელისუფლებაში არიან და ჩვენ ოპოზიციაში, ეს ჩვენს ურთიერთობაში არ აისახება. პარლამენტის თავმჯდომარე დავით უსუფაშვილს ახლა აქვს მთავარი ამოცანა, რომ შეცვალოს საარჩევნო სისტემა და დაინერგოს სამართლიანი სისტემა, ისეთი, როგორიცაა რეგიონულ-პროპორციული. იმედი მაქვს, რომ რაზეც ჩვენ სააკაშვილს ერთად ვებრძოდით, იმას ახლა შეასრულებს. ახლა მას აქვს ყველა ის ინსტრუმენტი, რომელიც მას სჭირდება ამ დიდი ამოცანის შესასრულებლად. ყველა შესაძლებლობა არსებობს, რომ ეს არჩევნებამდე მოესწროს, თუ, რა თქმა უნდა, პოლიტიკური ნება იქნება და კონკრეტულად "რესპუბლიკელების" პოლიტიკური ნება, როგორც კოალიციის წევრის. ჩვენ ვსაუბრობთ იმაზე, რომ საკონსტიტუციო კომისიამ უნდა იმუშაოს ამ საკითხზე, რომლის თავმჯდომარეც დავით უსუფაშვილია. ველოდებით კომისიისგან კანონპროექტის მომზადებას", - ამბობს ალასანია.

"ძალიან გული მწყდება, რომ მთავრობას და დე-ფაქტო მმართველს პრეზიდენტის როლის დაკნინება უნდათ. პრეზიდენტი უმაღლესი ლეგიტიმაციით არჩეული უმაღლესი თანამდებობის პირია. პრეზიდენტს ძალიან სწორი პოზიცია აქვს და არ ჰყვება ამ წაქეზებას. "დემოკრატებს" მიგვაჩნია, რომ დაჩეხილი კონსტიტუცია არაადეკვატურია. დღეს რომ საგანგებო მდგომარეობა შეიქმნას, ძალიან რთულ ვითარებაში აღმოვჩნდებით. არ არსებობს მექანიზმები, რომელიც სამართალდაცვით და უსაფრთხოების კოორდინაციას სჭირდება. ჩვენს ქვეყანას სჭირდება ძლიერი პრეზიდენტი ძლიერი საპარლამენტო ზედამხედველობით. ხელისუფლებაში ჩვენი მოსვლის შემთხვევაში საპრეზიდენტო მმართველობის შემოღება იქნება თემა, რომელიც საზოგადოების დიდმა ნაწილმა რეფერენდუმის საშუალებით უნდა გადაწყვიტოს", - დასძენს რესპონდენტი და შეკითხვას - "პოლიტოლოგები პრეზიდენტის როლის დაკნინებაში თქვენს როლსაც ხედავენ. გვახსოვს, უშიშროების საბჭოს სხდომაზე არ მიხვედით. გვახსოვს პრეზიდენტის ადმინისტრაციისა და საგარეო საქმეთა სამინისტროს მწვავე დისკუსიაც..." - პასუხობს:

"მე ვიყავი უშიშროების საბჭოს პირველივე სხდომაზე. იმ სხდომაზე ვერ წავედი იმის გამო, რომ საზღვარგარეთ დაგეგმილი მქონდა მნიშვნელოვანი ვიზიტი და იმის გადადება ვერ მოხერხდებოდა. ეს არ ყოფილა გამოწვეული პროტესტის ნიშნად. უფრო მეტსაც გეტყვით, პრემიერის მხრიდან მოდიოდა პოლიტიკური მესიჯები, რომ ურთიერთობა არ გვქონოდა პრეზიდენტთან, მაგრამ მე მას ვხვდებოდი და ვესაუბრებოდი. დავით ზალკალიანის და პრეზიდენტის ადმინისტრაციის დისკუსია ეხებოდა გაეროს გენერალურ ასამბლეას. მე ახლაც ვთვლი, რომ ამ სამიტზე პრემიერი უნდა წასულიყო, მაგრამ ეს უნდა ყოფილიყო ცივილიზებული ფორმით დარეგულირებული პრემიერისა და პრეზიდენტის აპარატებს შორის. ეს იყო საქმიანი არგუმენტების წამოწევა და არა დაპირისპირება პრეზიდენტის ინსტიტუტთან".

interpressnews.ge