,,თავისუფალმა დემოკრატებმა” თბილისის საკრებულო დატოვეს, რის მიზეზადაც პარტიის სტრატეგიისა და ფრაქციის საქმიანობის შეუსაბამობა დასახელდა. ამასთან, ირაკლი ალასანიას გუნდი საქართველოს პარლამენტში ე.წ. საფრანგეთის სკანდალზე დროებითი საპარლამენტო კომისიის შექმნის საკითხს აყენებს. პარტია ,,თავისუფალი დემოკრატების” წევრს, დეპუტატ ნინო გოგუაძეს მიაჩნია, რომ სახელმწიფოსთვის მნიშვნელოვან საკითხზე კომისიის შექმნა თავად უმრავლესობის ინტერესში უნდა იყოს, რათა ეჭვი გაქარწყლდეს და თუ ამ იდეას უმრავლესობა მხარს არ დაუჭერს, დადასტურდება, რომ “ოცნებას” სიმართლის გარკვევა არ სურს და რაღაცას მალავს... ,,ქართული სიტყვა” ნინო გოგუაძეს ესაუბრა.
- ქალბატონო ნინო, ვთქვათ, კომისია მართლა შეიქმნა და დასკვნაც დადო. ამის მერე პრემიერ-მინისტრს უნდობლობას გამოუცხადებთ?
- დიდი ხანია, ვამბობთ, რომ ეს მთავრობა უნდა გადადგეს, რადგან იმ გამოწვევებს, რაც სახელმწიფოშია, ვერ პასუხობს. ამიტომ, პოლიტიკურ უნდობლობას ვუცხადებთ და მომავალშიც გამოვუცხადებთ, თუმცა არ ვაპირებთ, ,,ნაციონალების” მიერ ინიცირებულ მთავრობის გადადგომის მოთხოვნის ხელმოწერებს შევუერთდეთ, რადგან ვფიქრობთ, რომ საზოგადოებამ ეს გადაწყვეტილება არჩევნების გზით უნდა მიიღოს.
- რამდენიმე დღის წინ, ფილმ ,,კაბელების საქმის” პრეზენტაცია გამართეთ. ფილმი სრულყოფილია?
- ფილმი იმ ცნობილ მოვლენებს ასახავს, როცა ირაკლი ალასანია საფრანგეთში საქართველოს თავდაცვისუნარიანობის ამაღლების მიზნით იმყოფებოდა. არ მიგვაჩნია, რომ ფილმი ,,კაბელების საქმე” სრულყოფილია. ბევრი საიდუმლო მასალაა, რაზეც ჯერჯერობით ირაკლი ალასანია არ ლაპარაკობს. საზოგადოებისთვის ნათელი უნდა იყოს, თუ რას მოჰყვა ასეთი ხმაურიანი დაპატიმრება და მცდელობა, ყველზე წესიერი მინისტრი და კოალიციაში გამორჩეული პოლიტიკური ფიგურა კორუფციაში ,,ემხილებინათ” და ამ გზით მისი დისკრედიტაცია მოეხდინათ. დარწმუნებულნი ვართ, სრულიად უდანაშაულო ადამიანები დაიჭირეს და ციხეში პოლიტიკური ნიშნით გამოკეტეს.
- ბოლშევიკებმა ე.წ. მეგრელებისა და ექიმების საქმეები “შეკერეს”... ,,კაბელების საქმეს “ რა რეზონანსი ექნება?
- ,,კაბელების საქმე” აუცილებლად სიმართლის გამარჯვებით დამთავრდება! სამწუხაროდ, ხელისუფალნი მოდიან და მიდიან, მათი ხასიათი კი, არ იცვლება და ვერც საკუთარ შეცდომებზე სწავლობენ და ვერც - სხვისი. ძალაუფლებით მოხიბლულმა არ შეიძლება, საზოგადოებას ასეთი ტონით ელაპარაკო, ან პროცესები ისე წარმართო, რომ პოლიტიკურ ოპონენტს ანგარიში დისკრედიტაციითა და დაპატიმრებით გაუსწორო. ეს ის საკითხებია, რომლებიც ხელისუფლების სიძლიერეს აუცილებლად არყევს და დღევანდელიც ისევე ცუდად დაამთავრებს, როგორც კომუნისტების და ,,ნაციონალების” ხელისუფლებებმა დაამთავრეს.
- ქალბატონო ნინო, ძალადობრივი ხელისუფლება ახლახან გავაცილეთ. ,,თავისუფალ დემოკრატებს” ახალი ხელისუფლებისადმი მიდგომები მეტისმეტად სწრაფად შეგეცვალათ...
- ,,თავისუფალი დემოკრატები” ჯერ ალიანსთან ერთად, მერე კი კოალიციაში, აქტიურად ვიბრძოდით ძალადობის, უსამართლობის, შეურიგებლობისა და შურის წინააღმდეგ, რაც ამ ქვეყანაში მეფობდა და გვინდოდოა, ერთხელ და საბოლოოდ დამთავრებულიყო. ამ ბრძოლაში არავისზე ნაკლები როლი არ გვითამაშია, არ ვგულისხმობ ბატონ ბიძინას. სამწუხაროდ, ღირებულებებს მას მერე იცვლიან, რაც ხელისუფლებაში მოვლენ და ის, რაც ოპოზიციაში ყოფნისას არ მოსწონდათ, თავად ამკვიდრებენ! ყველას ერთნაირი ფიქრი უჩნდება, ცუდები ,,ისინი” იყვნენ, ჩვენი განზრახვა კი, კეთილიაო. ასე დაემართა ამ ხელისუფლებას და წინას დაემსგავსა. ხელისუფლებას არც პრინციპები შეუცვლია, არც ინსტიტუტები განუვითარებია, პირიქით, დააკნინა და საზოგადოების თვალშიც პატივისცემა დაკარგა.
როცა არჩევნებში გავიმარჯვეთ, ვიცოდი, ყველაფერი იდეალისტურად ვერ იქნებოდა, მაგრამ ასე სწრაფად თუ მოხდებოდა, არ მეგონა!
- არადა, კოალიციაში შემავალ პარტიებს ოპოზიციაში ყოფნის დიდი გამოცდილება აქვთ: ქუჩას თავს კარგად ართმევდნენ, ხელისუფლებაში მოსვლის მერე კი, მათ მიმართ ბევრი პრეტენზია გაჩნდა.
- ძალაუფლების ხიბლს ყველა ვერ უძლებს.
- საზოგადოების ნაწილი ყველაფერს კოჰაბიტაციას აბრალებს. ისიც ფაქტია, სტრუქტურებში ჩარჩენილი ,,ნაციონალები” ცდილობენ, ხელისუფლების შტოებზე ზეგავლენა მოახდინონ.
- იმას, რაც მოხდა, კოჰაბიტაციას ვერ დააბრალებენ. ეს კონკრეტული ადამიანების ბრალია.
- გსაყვედურობენ, ირაკლი ალასანია და ,,თავისუფალი დემოკრატები” ხელისუფლებაში ბიძინა ივანიშვილის მეშვეობით მოხვედითო...
- არასოდეს დაგვვიწყებია, რომ ხელისუფლებაში სწორედ ბატონი ბიძინას დიდი დამსახურებით მოვედით, მასთან ერთად ვიბრძოდით და მივაღწიეთ შანსს, რომ დემოკრატია დაგვემკვიდრებინა, სამართლიანი სახელმწიფოს მშენებლობა დაგვეწყო. ახლა, როცა ვხედავთ, რომ პროცესები აქეთ არ მიდის - ამ ხელისუფლების პირობებში ვერ ხერხდება, უფლება არ გვაქვს, გავჩერდეთ. კოალიციის დანაპირებს ჩვენ შევასრულებთ!
- ქალბატონო ნინო, პარლამენტში ძალიან საინტერესო გამოსვლა გქონდათ - ყურადღება საზოგადოების თითოეულ წევრზე გაამახვილეთ. რას ფიქრობთ, მოქალაქემ დაუსრულებელი პოლიტიკური ცვლილებების პროცესები როგორ აღიქვას?
- სამწუხაროდ, კონკრეტული პიროვნებისთვის იმის აღქმა, რაც ხდება, ძალიან ძნელია, მაგრამ უფალმა ადამიანს იმის უნარი დაანათლა, რომ კარგი და ცუდი, ღირებულებები და კონფორმიზმი განასხვავოს.
- მოქალაქემ ეს არჩევანი 2012 წლის პირველ ოქტომბერს გააკეთა, მაგრამ შედეგი მაინც არ დადგა...
- ცხოვრება ასეთია: სულ არჩევანის წინაშე ვდგავართ. ყოველი არჩევანის მერე ახლად იბადები. თუ ცხოვრებაში უღირსი არჩევანი ერთხელ გააკეთე, ამ არჩევანის ტყვე ხდები...
- პირველი ოპოზიციური განაცხადის მერე, კოალიციიდან ვინმემ კომპრომისი თუ შემოგთავაზათ?
- ახლა ამაზე ლაპარაკი არ მინდა... დავამტკიცეთ, რომ ჩვენთვის მთავარი სახელმწიფოებრივი, სამართლიანი დემოკრატიაა და არა - თანამდებობები.
- ქალბატონო ნინო, რა მოხდა სინამდვილეში, რატომ გაირიყა ირაკლი ალასანია?
- ასე ვთქვათ, ბევრი ფაქტორის ერთობლიობაა... ალასანია გამორჩეული პოლიტიკური ფიგურა, ყველაზე მაღალი რეიტინგით, როგორც თანამდებობის პირი, შესაბამის გადაწყვეტილებებს იღებს, მაგრამ ჩემი აზრით, ყველაფრის მიზეზი ისაა, რომ ჩვენში ინერტული ადამიანები არიან წახალისებულნი.
- მთავრობის წარმომადგენლები აცხადებენ, რომ ირაკლი ალასანიამ დაუმორჩილებლობა გამოიჩინა.
- ირაკლი ერთადერთი მინისტრი იყო, რომელიც ქვეყნისთვის უმნიშვნელოვანეს თავდაცვის სფეროში თავის უფლება-მოვალეობას პირნათლად ახორციელებდა და უფლება არავის ჰქონდა, მოეთხოვა, წინასწარ შეთანხმებულ და ქვეყნისთვის საჭირო დოკუმენტზე ხელი არ მოაწეროო. ირაკლი ალასანიამ დაუმორჩილებლობა კი არა, ღირსება გამოაჩინა, ისე იმოქმედა, როგორც ქვეყნის სახემ და ღირსეულმა მინისტრმა. და საერთოდ, ქვეყნის საწინააღმდეგო გადაწყვეტილების მიღების დროს მორჩილება ვის წინაშე უნდა გამოეჩინა?
- ამბობთ, საფრანგეთში განხორციელებული ზარი, რომელიც წინასწარ შეთანხმებული ხელმოწერის გაუქმებას ითვალისწინებდა, ირაკლი ალასანიას საწინააღმდეგო კამპანია იყო, ყველაფერი ეს წამებში მოხდა?
- არ მგონია... ვფიქრობ, ირაკლის სამთავრობო გუნდიდან გაშვება ძალიან დიდი ხანი იგეგმებოდა.
- ამ ფორმით?
- ფორმა იმ მომენტში გამოინახა, ეს თუ არა, სხვა გამოჩნდებოდა. ირაკლი ალასანიას დისკრედიტაცია კორუფციით მოინდომეს, მაგრამ არ გამოუვათ.
- კორუფციაში დადანაშაულება მაინცდამაინც ქვეყნისთვის ასეთ საჭირო დროს უნდა მომხდარიყო?
- ირაკლი ალასანიას გზიდან ჩამოშორება უნდოდათ, მათ გეგმებში არც ირაკლის თავდაცვისუნარიანობის მისეული სტრატეგია შედიოდა.
- რატომ?
- ჯერ ამას ხმამაღლა ვერ ვიტყვით, როცა ოპოზიციაში მივდიოდით, განვაცხადეთ, რომ ქვეყნის ევროატლანტიკურ კურსს საფრთხე დაემუქრა, ჩვენთვის ასეა და ამ პროცესის მიმდინარეობას თვალს დღესაც გულისყურით ვადევნებთ.
- რას ატყობთ, თქვენი ეჭვი დასტურდება?
- ვერ ვიტყვი, რომ დასტურდება, თუმცა ძალიან ბევრი უცნაური განცხადება კეთდება, რაც ეჭვის საფუძველს იძლევა.
- ხელშეკრულებაზე ხელის მოწერის შეშლა თქვენი ეჭვების ბოლო წვეთი იყო?
- ეჭვები გვქონდა, მაგრამ ხელმოსაკიდი არ იყო. ამ ხნის განმავლობაში, დასავლეთისკენ მნიშვნელოვანი ნაბიჯები გადაიდგა. თითქოს ყველაფერი სწორად მიდიოდა, თუმცა რაღაცები ფრთხილ კითხვის ნიშნებს იწვევდა.
- ირაკლი ალასანია ამბობს, რომ მის წინააღმდეგ ბრძოლა ,,ჩრდილოკორეული სცენარით” მიმდინარეობს. ეს რას ნიშნავს?
- ირაკლი ალასანიას დიქტატორული ქვეყანა ებრძვის, სადაც პროკურატურა პოლიტიზირებულია - ხელისუფლების ნებას ასრულებს.
- პროკურატურა ექსპერტზეც ძალადობს? დავით უსუფაშვილი ამბობდა, ექსპერტი მოწმე არაა, რომლის შეცვლაც შეუძლებელიაო.
- აქ მთავარი ის კი არაა, ექსპერტი გამოიცვლება თუ არა. მთავარია, რომ მასზე ზეწოლა მოხდა და სწორედ ესაა ,,ჩრდილოკორეული სცენარი”. Pვინ ვინ და პარლამენტის თავმჯდომარეს კარგად ესმის, რომ ექსპერტზე ზეწოლა უკანონობაა და მოწინააღმდეგის მიმართ ასეთი მეთოდების გამოყენება სამართლიანი ქვეყნისთვის მიუღებელია.
- უსუფაშვილმა იკითხა: ვინ დგას ყველაფერ ამის უკან?
- ბატონი დავითი, თანამდებობრივად, ჩემზე გაცილებით მაღლა დგას, მიმაჩნია, რომ სწორედ მას უნდა ჰქონდეს პასუხი შეკითხვაზე: ვინ დგას ყველაფრის უკან?
- რეალობა ასეთია: “თავისუფალი დემოკრატები” ოპოზიციაში ხართ, ბრძოლას როგორ გააგრძელებთ?
- ჩვენთვის ოპოზიციური ბრძოლა სიახლე არაა.
- კი ბატონო, მაგრამ ახლა სხვა რეალობაა...
- არ უნდა დავიზაროთ, საზოგადოებას, ამომრჩეველს ავუხსნათ, ასე რატომ ვიქცევით. ეს ადვილია, როცა საკუთარ თავთან მართალი ხარ. პარლამენტში ყველა კონსტიტუციურ მეთოდს გამოვიყენებთ, რეგიონებში, ხალხთან კონტაქტისას კი, ჩვენი მთავარი იარაღი ახსნა-განმარტება იქნება.
-,,თავისუფალი დემოკრატების” უკან ვინ დგას?
- “თავისუფალი დემოკრატები”!
- ქალბატონო ნინო, ვინ იქნება საქართველოს მომავალი პრეზიდენტი?
- ჩვენ ვიცით, რომ საპარლამენტო არჩევნებში გავიმარჯვებთ. დღეს ქვეყანას ღირსეული პრეზიდენტი ჰყავს და დარწმუნებულნი ვართ, ქვეყანას მომავალ არჩევნებამდე სტაბილურად და გაწონასწორებულად მიიყვანს! მომავალზე არ ვლაპარაკობთ, ვადა რომ ამოიწურება, მერე დავიწყებთ ფიქრს, ეყოლება თუ არა ,,თავისუფალ დემოკრატებს” საპრეზიდენტო არჩევნებში საკუთარი კანდიდატი.
- მას შემდეგ, რაც აფხაზეთი დავკარგეთ, უამრავი პარტიის, მოძრაობის საარჩევნო სლოგანი დაკარგული ტერიტორიების დაბრუნებაა. ირაკლი ალასანია ის ადამიანია, რომელსაც აფხაზებთნ ლაპარაკი რეალურად შეუძლია, - აფხაზებში დიდი ნდობა ჰქონდა. ოპოზიციაში გადასვლის მერე, აფხაზეთის დე ფაქტო ხელისუფლებისგან გამოხმაურება ხომ არ გქონიათ?
- ეს შეკითხვა ირაკლის დაუსვით, მე ვერაფერს გეტყვით.
- ოპოზიციურ ბრძოლაში სავარაუდო თანამებრძოლები და პარტიები უკვე გამოიკვეთნენ?
- ჩვენ გახსნილები ვართ, მაგრამ დღეს ვინმესთან კოალიციაში შესვლაზე არ ვფიქრობთ. კონსულტაციები ყველასთან გვექნება, ვისთვისაც ჩვენი პრინციპები ღირებულია,
- ,,ნაცმოძრაობასთანაც”?
- რა თქმა უნდა, - არა! ,,ნაცმოძრაობას”, რომელმაც ჩვენთვის მთავარი - დასავლური ღირებულებების დევალვაცია მოახდინა და დემოკრატიის სახელით ბევრი არადემოკრატიული ნაბიჯი გადადგა, ჩვენ ცხრა წელი ვებრძოდით. კარგად გვაქვს გაცნობიერებული, როგორ იქცეოდნენ ხელისუფლებაში ყოფნის დროს, ამიტომ მათთან კოალიციაში ვერ ვიქნებით, თუმცა პარლამენტში ზოგ საკითხზე თანამშრომლობა გვექნება.
- მაგალითად?
- მაგალითად, საყდრისთან დაკავშირებით და ამაში ხალხმა შეთქმულება არ უნდა დაინახოს.
- ,,პატრიოტთა ალიანსთან” ითანამშრომლებთ?
- ღირებულებითი თანხვედრა არ გვაქვს, არც შემოთავაზება გვქონია და არც ვგეგმავთ.
- დროებითი საგამოძიებო კომისიის შესახებ რას იტყვით, რომელიც ე.წ. “კაბელების საქმეს” გამოიკვლევს?
- კანონით, პარლამენტმა უარი არ უნდა თქვას, რადგან რეგლამენტის მიხედვით, როცა საქმე ქვეყნის თავდაცვისუნარიანობას ეხება, დროებით საგამოძიებო კომისიის შექმნას წინ არაფერი უნდა დაუდგეს. ყველა პროცედურას გავივლით და საკითხს პარლამენტის წინაშე დავაყენებთ. კომისია, თავისი კომპეტენციის ფარგლებში, ყველაფერს გამოიკვლევს.
- პრემიერ-მინისტრმა ალასანიას ვაჟკაცობა დაუწუნა.
- ამ განცხადებას ცოტა იუმორით უნდა შევხედოთ, არ გავნაწყენდეთ. Mმინისტრი უდანაშაულო თანამშრომლებს გადაეფარა - თანამდებობა დატოვა, რასაც მთელი მისი გუნდის გადადგომა მოჰყვა. საზოგადოებამ თავად განსაჯოს, ვაჟკაცია თუ არა. მგონია, რომ საქმე ღირებულებითი ტერმინების, განათლებისა და კულტურის აღრევასთან გვაქვს.
- თქვენი აზრით, თავდაცვის მინისტრად მაინცდამაინც მინდია ჯანელიძე რატომ დანიშნეს?
- ალბათ, მორჩილების ფასად... არ მინდა, მასზე ცუდი ვთქვა, წარმატებებს ვუსურვებ. დღევანდელ პოლიტიკურ რეალობაში თანამდებობის პირს, ვფიქრობ, სწორედ მორჩილება სჭირდება.
- ანუ, ირაკლი ალასანია მორჩილი არ იყო?
- დიახ, ამიტომაც არაა დღეს ქვეყნის თავდაცვის მინისტრი.
- საზოგადოება დღემდე გაურკვევლობაშია: საფრანგეთში ჯანელიძემ დარეკა თუ არა, ხელშეკრულება ფორმდებოდა თუ განზრახულობათა ოქმი...
- გული მწყდება, რომ ბატონი ჯანელიძე თავის გამოსვლებში ფაქტებს სხვადასხვანაირად წარმოადგენს. ჩემი აზრით, მინისტრს თავისი ალოგიკური განცხადებებით ცოტა სერიოზულობა დააკლდა.
- ბიძინა ივანიშვილისგან რა გამოხმაურებები გქონდათ?
- არ ვარ საქმის კურსში, მგონი, - არანაირი.
- ასე დასრულდა ,,თავისუფალი დემოკრატების” კოალიციური ისტორია?
- არასოდეს დამავიწყდება ბატონი ბიძინას წვლილი კოალიცია ,,ქართული ოცნების” გამარჯვებაში. ბიძინა ივანიშვილი განსაკუთრებული ადამიანია, მასთან მჭიდრო თანამშრომლობა დაუვიწყარია და შეუფასებელია მისი როლიც. ყველაფერი კი ისე დამთავრდა, როგორც დამთავრდა. მეჩვენება, რომ ჩვენთან ერთად, დიდი ბრძოლით მოპოვებული შანსი ყველამ ხელიდან გავუშვით!
- ალექსი პეტრიაშვილი ამბობდა, ხელისუფლება სირაქლემას პოზაშიაო. თქვენი აზრით, ეს პოზა რამდენ ხანს გასტანს?
- რამდენსაც საზოგადოება დააცლის.
