რატომ აფრთხილებს ტელევიზიებს და რატომ აკავშირებს იური ვაზაგაშვილის აფეთქებას უკრაინაში მყოფ ნაციონალებთან ნუკრი ქანთარია
რეჟისორი და კულტურისა და განათლების კომიტეტის თავმჯდომარის მოადგილე, დეპუტატი ალექსანდრე ქანთარია პოლიციის ექსმაღალჩინოსნების დაჭერას ყბადაღებული ,,სამართლიანობის აღდგენის' დასაწყისად აცხადებს. ამბის გაგრძელებად, დაკითხვების შედეგად იური ვაზაგაშვილის მკვლელების ცხელ კვალზე გასვლას მიიჩნევს და აცხადებს, რომ ეს კვალი, შესაძლოა, უკრაინაში მყოფ ნაციონალ ლიდერებამდე მივიდეს. ასახელებს ე.წ. დანაშაულებრივ კვარტეტს ყოფილ ხელისუფლებაში, ,,გათამამებულ' ტელემედიას ურჩევს, თავისუფლება შეიფეროს და ვითარების განსამუხტად უარს არც ვადამდელ არჩევნებზე ამბობს.
- პოლიციის 11 დაკავებული ექსმაღალჩინოსანი ე.წ. კორტების სპეცოპერაციის მონაწილე იური ვაზაგაშვილის აფეთქებამდეც იყო. აქამდე რატომ არ დაიჭირეს?
- მაშინ ისიც უნდა გავიხსენოთ, რომ იური ვაზაგაშვილი, ბოლო პერიოდში, გამოძიების მუშაობით კმაყოფილი იყო. საქმე ბოლოსკენ მიდიოდა და მხოლოდ მისი მკვლელობის გამო არ დაჩქარებულა. ახლა იური ვაზაგაშვილის საქმეც სასწრაფოდ უნდა გამოიძიონ და ანტიტერორისტული, პრევენციული ღონისძიებები დაიწყოს. ამ 11 კაცის დაჭერის შემდეგ, საინტერესოა, სად მიგვიყვანს კვალი. ვფიქრობ, ჩვენი მხრიდან სერიოზული შტურმი უნდა დაიწყოს, ცხადია, კანონის ფარგლებში.
- შტურმი ვის წინააღმდეგ?
- ,,სამართლიანობის აღდგენის' შტურმს ვგულისხმობ და ეს შეუქცევადი პროცესი უნდა იყოს. არსებობს საფრთხე, ყველა დაპატიმრება ოპონენტებმა პოლიტიკურად შეაფასონ, მაგრამ მეორე მხრივ, ხალხმა სწორედ დამნაშავეების დასასჯელად აგვირჩია. ოღონდ ეს პროცესი ტელედაჭერებით, გამოძიების გარეშე არ უნდა გაგრძელდეს. ფაქტები უნდა შეიკრიბოს, დანაშაულს სწორი კვალიფიკაცია მიეცეს, სასამართლო სასამართლოს ჰგავდეს. ვაღიაროთ, პროკურატურა ასე მუშაობას მიჩვეული არაა და გამოწვრთნილი არასოდეს ყოფილა. ახლა ახალი დეპარტამენტიც იქმნება, რომელიც გახმაურებული საქმეებით დაკავდება და კვალიფიციური კადრებით შეივსება. დასასჯელი უნდა დაისაჯოს, წართმეული უნდა დაბრუნდეს!
- ომბუდსმენს პატიმარმა უამბო, კრიმინალური პოლიციის უფროსის ექსმოადგილემ, ფირცხალავამ მითხრა, ია მეტრეველს თუ მოკლავ, გაგიშვებო. თუკი ამ ისტორიას უნდა დავუჯეროთ, რატომ არ შეიძლება, ,,ოცნებაც' წინა ხელისუფლების ხელწერით მუშაობდეს და პატიმარი ცრუ მოწმედ მოიყვანოს, რათა საქმე სწრაფად ,,გახსნას'?
- მეეჭვება... თუმცა სტრუქტურებში, ალბათ, კიდევ არიან ნაციონალები, ვისაც მსგავსი ინტრიგების ხლართვა შეუძლია. ჩვენს ხელისუფლებაში ამის არც სურვილია, არც გამოცდილება. შესაძლოა, ეჭვი გაჩნდეს, რომ იური ვაზაგაშვილის მკვლელობის კვალი სხვა ქვეყანაში მიდის. აქ ოკუპანტების მიერ საფლავის დანაღმვას კი არა, იმას ვგულისხმობ, რომ უკრაინაში საკმაოდ ბევრი ექსხელისუფლების მაღალჩინოსანია, რომლებიც ჩვენს მიერ ძებნილები არიან. არ არის გამორიცხული, სწორედ ისინი ფანტაზიორობენ და რაღაცებს გეგმავენ.
- ეს მძიმე ბრალდებაა - ამბობთ, ტერაქტი ნაციონალური მოძრაობიდან უკრაინაში მიწვეულმა მაღალჩინოსნებმა დაგეგმეს?
- არ არის გამორიცხული. არსებობს კვარტეტი - ადეიშვილი, სააკაშვილი, კეზერაშვილი და კოდუა. მათ მსგავსი დანაშაულები უკვე ჩაუდენიათ. ბეტონმობმული, ზღვაში ჩაძირული ადამიანებიც გვინახავს. ეს მათი ხელწერაა, თუმცა ასეთ რამეს პირდაპირ არავის ვაბრალებ. მიზანი შესაძლოა, ქვეყნის არევა და მერე ამღვრეულ წყალში თევზის დაჭერა იყოს. მათ სურთ, საქართველოში განცდა გააჩინონ, ამ არეულობას ნაციონალები ხომ არ დაუშვებდნენო. ცოცხებს კი იყენებდნენ, მაგრამ ეტყობა, ამ ხალხს იმ ცოცხებით აჩერებდნენო. გათვლა იმაზე აქვთ, რომ ღირებულებებსა და დამოკიდებულებას ასე შეცვლიან. ხელს არავის ვადებ, უბრალოდ, ეს იდეები ციდან ხომ არ მოდის და არც ვაზაგაშვილის ასაფეთქებლად ჩამოსულან ეგვიპტიდან და მარსიდან. გამორიცხული არ არის, ეს ჩვენი ყოფილი თანამემამულეების ან აქაური ნაციონალების იდეა იყოს. თუმცა ეს მხოლოდ ვარაუდი და პოლიტიკური შეფასებებია.
- ჰოდა, მოდი, ახლა ვივარაუდოთ, რომ ცრუ მოწმეები, საქმის სწრაფად გასახსნელად და ერთი- ორი ნაციონალის დასაჭერად ხელისუფლებაში მყოფ რომელიღაც ჯგუფს მოჰყავს. ესეც ხომ ლოგიკურია?
- თუ ვინმე შეფარულად მოქმედებს, გამოსაძიებელია. სამართლიანობის აღდგენა შეუქცევადი პროცესი უნდა გახდეს. იური ვაზაგაშვილის საქმემ ბევრი რამ გააშიშვლა და ხელისუფლება მძიმე გამოწვევის წინაშე დააყენა. ამ გამოწვევებს ადეკვატურად უნდა ვუპასუხოთ. ამას მეც კატეგორიულად მოვითხოვ და ჩვენი მოსახლეობაც. სამართლიანობის აღდგენის კუთხით საქმე დაიძრა, სოცდაუცველთა მდგომარეობის შესამსუბუქებლადაც ბევრი რამ გაკეთდა, მესამე მოთხოვნა კი მედიის თავისუფლება იყო. დღეს ხელისუფლება არცერთ ტელევიზიას არ ფლობს. მედიას მოვუწოდებ, იმ ტოტს ნუ ჭრის, რომელზეც ზის. ეს თავისუფალი სივრცე შეირგონ, თორემ ამ თავისუფლების ალტერნატივა ისევ ტერორი და შევარდნებია! ჩვენ ამას არ ვიზამთ, მაგრამ პროცესი იქამდე მიდის, შესაძლოა, ხალხში მოთხოვნა გაჩნდეს, მკაცრი ხელია საჭირო და ტელევიზიებს მიხედეთო.
- მეუბნებით, რომ ხალხი მოითხოვს, რომელიმე ტელევიზიაში შეხვიდეთ?
- ზოგადად ვამბობ, ხალხში მოთხოვნა გაჩნდება - ხელისუფლება ხართ, ადექით და იმოქმედეთ, რომ ეს კამპანია შეაჩეროთო. ეს იმის საფუძველი იქნება, ამ ტალღაზე ახალი ჯგუფი მოვიდეს, რომელიც ამ მოთხოვნებს თავისასაც დაუმატებს და ტელევიზიებში შევარდება. ზუსტად ესაა ტოტალიტარიზმი და დიქტატურა.
- კარგად ვერ გავიგე - მედიას როგორ აფრთხილებთ?
- ვაფრთხილებ, შეირგოს ეს თავისუფალი სივრცე! ახლა ამ თავისუფლებისგან ისტერიკაში არიან.
- ნაციონალებმაც ასე მიიჩნიეს 2007 წელს და ,,იმედი' დაარბიეს.
- ახლა ყველა ერთად, ხმაშეწყობილად მხოლოდ ნეგატივს აშუქებს. სურთ, ქვეყანაში ქაოტური მდგომარეობა შეიქმნას. ალბათ, ყველაზე უკეთ ნეგატიური ინფორმაცია ,,იყიდება'. თუმცა ბალანსიც ხომ უნდა დაიცვან?!
- ამ ფრაზას ისე გაიგებენ, რომ ტელევიზიების დაწიოკებას აპირებთ!
- არა, უბრალოდ, ვამბობ, რომ ეს თავისუფლება უნდა შეიფერონ, რადგან ამის ალტერნატივა სწორედ ქაოსია. ხალხს თუ მათი გაჩერების მოთხოვნილება გაუჩნდება, შემდგომი ხელისუფლება ამ მოთხოვნას შეასრულებს!
- შემდეგიც თქვენ რომ იყოთ?
- მარადიულად ჩვენ ხომ არ ვიქნებით ხელისუფლებაში. აქ მეორე ვადა არ იგულისხმება. თუმცა არ მოგატყუებთ, ვინც პოლიტიკაშია, უნდა, მეორე ვადითაც აირჩიონ. ეს არ ნიშნავს, რომ სკამებს ჩავებღაუჭებით. ხელისუფლებამ აქაც ბეწვის ხიდზე უნდა გაიაროს.
- ფაქტია, ამას ვერ ახერხებთ, რადგან პატრიოტთა ალიანსი მარტიდან პერმანენტული აქციებით იმუქრება.
- საერთოდ, ჯობდა, ეს აქცია პარტიას კი არა, რომელიმე აპოლიტიკურ ორგანიზაციას გაეკეთებინა, მეტი ხალხი მივიდოდა. როგორც ვიცი, ეს ხელისუფლების წინააღმდეგ მიმართული აქცია არც ყოფილა. მოთხოვნებიცა და ტერაქტზე რეაქციაც აბსოლუტურად ადეკვატური იყო.
- თუ მარტიდან პროცესი უფრო მასშტაბური გახდა, რატომაა გამორიცხული, ვადამდელი არჩევნების ჩატარების აუცილებლობა დადგეს? ითქვა, ,,ოცნება' რიგგარეშე არჩევნების ჩასატარებლად მიზეზს ეძებსო.
- მიზეზს რომ ვეძებდეთ, აქამდეც ვიპოვიდით. არც ვადამდელი არჩევნების ჩატარებას გამოვრიცხავთ, ამაზეც წავალთ, თუ საზოგადოების მოთხოვნა იქნება და ვითარებას განმუხტავს. თუმცა სჯობს, საარჩევნო ციკლი ბოლომდე მივიყვანოთ და თან, არ მგონია, პარტიები მზად იყვნენ. ამის გაკეთება 2012 წლის არჩევნებიდან რამდენიმე თვეშიც შეიძლებოდა, თუმცა ამას დასავლეთი ვერ გაიგებდა.
- ახლა შეიძლება, თქვენ გამოგყარონ ხელისუფლებიდან.
- პარლამენტიდან გამოსაყრელი არაფერი გვჭირს, არც სკამებს ვეჭიდებით და არც ვადამდელ არჩევნებზე ვამბობთ უარს. პირიქით, ეს შეიძლება, კარგიც იყოს: ბევრი რამე გაიწმინდება, ხალხი ხმას ეიფორიის გარეშე მისცემს. არჩევნების დროზე ჩატარებას ერთადერთი პლუსი აქვს - საარჩევნო ციკლი დასრულება.
- ამასწინ, ჯონდი ბაღათურიამ თქვა, მალე, კაბინეტებში შევალთ და საყვარლებიანად გამოვათრევთო.
- მოვიდეს და სცადოს, აბა! ჩვენი თანამებრძოლი იყო, შემოვიდეს, ნახოს, რას ვაკეთებთ. ჩვენ კი, ბუნებრივია, კანონის ფარგლებში ვიმოქმედებთ.
- სამართლიანობის აღდგენის კონტექსტში ერთსაც გკითხავთ: თუმანიშვილის თეატრიდან ექსდეპუტატი გია როინიშვილის ქეთი დოლიძის მიერ გამოგდება სამართლიანობის აღდგენა და ღირსების დაბრუნება იყო?
- ქეთი დოლიძე თეატრის სამხატვრო ხელმძღვანელია და მან გია როინიშვილთან ხელშეკრულება აღარ გააგრძელა. იურიდიულად, ამის უფლება ჰქონდა. ითქვა, რომ ბოლო ხანებში იგი სპექტაკლებშიც აღარ თამაშობდა, მიწვევებზეც უარს ამბობდა, თუმცა დეტალები მათი საქმეა. გიას პირველ კურსზე მეც ვასწავლიდი. ნიჭიერი ბიჭია. ახლა რომ ვდგამდე სპექტაკლს, აუცილებლად დავაკავებდი და პოლიტიკური სიმპათიის გამო არანაირი პრობლემა არ მექნებოდა. თუმცა არ ვიცი, თეატრში რა ვითარებაა.
- ზესტაფონის თეატრშია საინტერესო ვითარება - კამეჩი დადის და ამის ამსახველი ფოტოებიც ვრცელდება. ამ დროს, ზესტაფონის მაჟორიტარი გოგი ქავთარაძეა... ,,დაჭერებს' კულტურაც უნდა გადავაყოლოთ, თუ რაიმე სასიკეთო ძვრები ამ სფეროშიცაა? მინისტრ მიშა გიორგაძის დაბარებას როდის აპირებს თქვენი კომიტეტი?
- ეს გოგი ქავთარაძის კი არა, მუნიციპალიტეტის პრობლემაა. გოგი ქავთარაძე მეხრედ ხომ არ აურჩევიათ, კამეჩს დაუდარაჯდეს და გამოაგდოს! ვერავის მოქმედებას ან უმოქმედობას რევიზიას ვერ გავუკეთებ. ყველა თავის საქმეს აკეთებს. მთავარია, რა ხდება თეატრის შიგნით. როგორც ვიცი, რეჟისორი ნინო ლიპარტელიანია, რომელიც ჩემი ასისტენტი იყო და ვიცი, მშრომელი და თავდაუზოგავი ადამიანია. არც მიშა გიორგაძის პარლამენტში დაბარებაა პრობლემა. ამის უფლება გვაქვს და მასაც აქვს პარლამენტისთვის ანგარიშის ჩაბარების ვალდებულება. სხვათა შორის, ახლახან ,,მარიოტში' კულტურის სამინისტროს სტრატეგიის პრეზენტაციაც შედგა. მინისტრი პასუხისმგებლობას არცერთ თემაზე არ გაექცა და ცდილობს, თანმიმდევრული პოლიტიკა გაატაროს.
