“იური ვაზაგაშვილის აფეთქება ჩვეულებრვი მკვლელობა კი არა, პოლიტიკური ტერორია. ამიტომ, საქმე მკვლელობის კი არა, სისხლის სამართლის 323-ე მუხლით უნდა აღძრულიყო. სწორედ იმიტომ, რომ არასწორი კვალიფიკაცია მიეცა, მგონია, რომ ამ საქმის გახსნა გაჭიანურდება, რასაც ქვეყანაში დიდი არეულობა მოჰყვება. საერთოდ, არ გამოვრიცხავ, რომ ამ მკვლელობის შემკვეთთა მიზანიც სწორედ არეულობაა”, - აცხადებს “ქართულ სიტყვასთან” საუბრისას უშიშროების თადარიგის პოლკოვნიკი, უსაფრთხოების ექსპერტი კონსტანტინე ფორჩხიძე. ქართველი სპეცსამსახურელი “ქართული სიტყვის” ექსკლუზიური ინტერვიუების ციკლში რამდენიმე წლის წინ, აშშ-ის საელჩოსთან მომხდარ აფეთქებასაც იხსენებს, სადაც, ვაზაგაშვილის საქმის მსგავსად, სასაფლაო ფიგურირებდა და ეჭვობს, რომ ყველაფერი ეს ერთმანეთთან კავშირშია. ფორჩხიძე არც იმას გამორიცხავს, რომ რამდენიმე კვირის წინ, ირაკლი ალასანიას ბინაში ქურდის შესვლაც იმ ჯაჭვის ნაწილი იყოს, რომლის სათავეც შესაძლოა, “გე-რე-უ”-ს ეჭიროს. მაშ ასე, რატომ დაემთხვა იური ვაზაგაშვილის ცინიკური მკვლელობა სომხების მიერ 400-ზე მეტი ქართული ტაძრის სომხურად გამოცხადების მოთხოვნას და რას ნიშნავს პოლიტიკური ტერორი? - “ქართული სიტყვა” აგრძელებს სკანდალური ინტერვიუების ციკლს უშიშროების ყოფილ მაღალჩინოსანთან, რომელიც სამსახურიდან, მისივე სიტყვებით რომ ვთქვათ, შესაძლოა, იმიტომ გამოუშვეს, რომ “რუსული კავშირების” გამოაშკარავებას ცდილობდა.
კონსტანტინე ფორჩხიძე: - ალექსანდრე ჭიკაიძეს გადადგომა ან უკარნახეს, ან თვითონ მიხვდა, რომ ის მოვლენები, რაც შეიძლება, იური ვაზაგაშვილის მკვლელობას მოჰყვეს, საბოლოო ჯამში, შსს-ს დაარტყამს და გადადგომა, ადრე თუ გვიან, მაინც მოუწევდა, თან სხვა ფორმით. საერთოდ, იური ვაზაგაშვილის მკვლელობა ჩვეულებრივი კი არა, პოლიტიკური ტერაქტია, რომელიც პოლიტიკურად აქტიური პიროვნების წინააღმდეგ განხორციელდა და როცა ასეთ დროს მინისტრი მიდის, ეს, პრაქტიკულად, მთელი ძალოვანი უწყების კაპიტულაციას ნიშნავს, რაც ძალიან შემაშფოთებელია.
- ჭიკაიძის გადადგომასა და ე.წ. კასპის ტერაქტამდე, თანამდებობა ქალაქის პოლიციის უფროსმა დატოვა, რომელსაც ცხონებული იური ვაზაგაშვილი თავისი ვაჟის მკვლელობის თანამონაწილედ ასახელებდა. ახლახან, მირზოევიც გადადგა, რომელიც, ასევე, “კორტების სპეცოპერაციაშია” მხილებული. მაშასადამე, 9-წლიანი ლოდინის შემდეგ, ყველა იმ პირის პასუხისმგებლობის საკითხი დგება, ვისაც 2006 წლის 2 მაისის მოვლენებთან შეხება, პირდაპირ თუ ირიბად, ჰქონდა?
- წესით, ყველას პასუხისმგებლობის საკითხი უნდა დადგეს, მაგრამ იცით, რა არის საინტერესო? - იური ვაზაგაშვილის მკვლელობას განზრახ მკვლელობის კვალიფიკაცია მისცეს. არადა, ეს ტიპური პოლიტიკური ტერორისტული აქტია.
- მაპატიეთ, მაგრამ იური ვაზაგაშვილი პოლიტიკოსი არ ყოფილა...
- პოლიტიკოსი არა, მაგრამ პოლიტიკურად აქტიური ფიგურა იყო, რომელიც თავისი შვილის, ზურა ვაზაგაშვილის მოკვლის შემდეგ, თითქმის 9 წლის განმავლობაში, სამართლიანობისთვის ბრძოლის სიმბოლოდ ითვლებოდა!
- გამოდის, რომ ხალხს ეს სიმბოლო, ანუ ბოლო იმედი მოუკლეს! ბატონო კოტე, იზიარებთ “ქართული სიტყვის” წინა ნომერში გამოქვეყნებულ ვერსიას, რომ ტერაქტის კვალი შეიძლება, რუსეთამდე, კონკრეტულად, რუსულ სპეცსამსახურებამდე მივიდეს?
- ამ ვერსიას არსებობის უფლება ბევრი გარემოების გამო აქვს: პირველ რიგში, ის, რომ აფეთქება რუსული წარმოების ასაფეთქებელი საშუალებით მოხდა.
- რა იცით, რომ ასაფეთქებელი საშუალება რუსული იყო?
- ითქვა...
- რუსულ წარმოებაზე აქცენტი არ გაკეთებულა. უბრალოდ, გავრცელდა ინფორმაცია, რომ აფეთქება ქარხნული წარმოების ნაღმით განხორციელდა...
- ასაფეთქებელ საშუალებებს საქართველო არ აწარმოებს, ვერც ქუჩაში იყიდი...
- ასაფეთქებელი საშუალება დისტანციურია?
- შეიძლება, დისტანციურიც იყოს. არ ვიცი, ვაზაგაშვილი კონკრეტულად რა ტიპის საშუალებით ააფეთქეს, მაგრამ ტელევიზიით რაღაც ნაგლეჯი აჩვენეს, რომელიც ჩვეულებრივ “ლიმონკას” არ ჰგავდა და რომლის შეძენაც სირთულეს არ წარმოადგენს. საერთოდ, სხვადასხვა ტიპისა და კლასიფიკაციის ნაღმი არსებობს. ამიტომ, საჭიროა, ექსპერტიზამ ამ ნაღმის წარმომავლობა დროზე დაადგინოს...
- შეიძლება, დაადგინა, მაგრამ არ ახმაურებს...
- ასეა თუ ისე, ნაღმი უკვე გარკვეული კვალია.
- რატომ?
- ნაღმები სპეცსამსახურებს აქვთ...
- ნაღმების სიმცირეს არც ტერორისტული ორგანიზაციები განიცდიან...
- დიახ, ასეა... სხვათა შორის, ნაღმებზე ხელი დამნაშავეთა სამყაროსაც მიუწვდება. ასევე, საგულისხმოა, რომ ნაღმები შეიარაღებულ ძალებშიცაა...
- პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილმა არ გამორიცხა, რომ აფეთქების კვალი, შესაძლოა, ჩვენგან არაკონტროლირებად ტერიტორიამდე მივიდეს. სხვათა შორის, სოფელი, სადაც იური ვაზაგაშვილი მოკლეს, რუსებისგან ოკუპირებულ ცხინვალის რეგიონს ესაზღვრება...
- ეს ვერსია რეალურად არ მიმაჩნია, თუმცა, ვინც ტერაქტი დაგეგმა, სასაფლაო, ალბათ, სწორედ ამიტომ შეარჩია, რომ ეს ვერსიაც გაჩენილიყო. საერთოდ, რაც ბევრი ვერსია იქნება, გამოძიება გართულდება, რადგან ყველა ვერსია უნდა გადამოწმდეს.
- ისე, უცნობია, გამოძიება რა ვერსიაზე მუშაობს... ყარაფილას მცხოვრებთა თქმით, სოფელში, 2008 წლის აგვისტოს მერე, სამართალდამცავები პატრულირებენ და ყველა უცხოს ამოწმებენ. ეს გამოძიებისთვის მნიშვნელოვანი დეტალი არაა?
- მხოლოდ ეს კი არა, ისიც დეტალია, რომ იმ დღეს დასაფლავებაზე უამრავი ხალხი იყო, ასეთ დროს კი, უცხო პირი ყურადღებას არ იქცევს...
- მესმის, მაგრამ ეჭვობთ, რომ ნაღმი აფეთქების დღეს დაამონტაჟეს?
- დიახ, რადგან ტერაქტამდე რამდენიმე, ან თუნდაც ერთი დღით ადრე მხოლოდ მართვად ნაღმს ამონტაჟებენ ხოლმე, თუმცა მუდმივი მეთვალყურეობა მართვად ასაფეთქებელსაც სჭირდება... დამდგარი შედეგიდან ჩანს, რომ მკვლელი ყველაფერს აკონტროლებდა და იმაშიც დარწმუნებული იყო, რომ მსხვერპლი სასაფლაოზე აუცილებლად მივიდოდა...
- სხვათა შორის, როგორც ადგილობრივებს უთქვამთ, იური ვაზაგაშვილი საფლავზე მისვლას არ აპირებდა, მაგრამ შეუმჩნევია, რომ წინა დღეს დადებული ყვავილები არეული იყო და, ასე ვთქვათ, გასწორება გადაუწყვეტია. აფეთქებაც სწორედ ამ დროს მომხდარა... ისე, ადვოკატის თქმით, ვაზაგაშვილს უსმენდნენ...
- ყველაფერი ეს ლოგიკაა, ანუ თუკი იმას, რაც მოხდა, სწორად დავალაგებთ, გამოჩნდება, რომ ამას ერთი ადამიანი ვერ ჩაიდენდა. დამხმარეს თავი რომ დავანებოთ, მკვლელს გარკვეული რესურსი, ანუ საფარი სჭირდებოდა, რათა არავის შეემჩნია. სწორედ ამიტომ ჩნდება ვერსია, რომ ვაზაგაშვილს უსმენდნენ.
- მოდით, შეკითხვა ასე დავსვათ, კოტე ბატონო: “ოცნებას”, მიუხედავად იმისა, რომ შვილის მკვლელების მფარველობაში ამხელდა, ვაზაგაშვილის მოკვლა, აპრიორი, არ აწყობდა. იგივეს თქმა “ნაციონალებზეც” შეიძლება?
- დიახ.
- რატომ?
- იმიტომ, რომ ყველა შემთხვევაში, აქცენტი მათზე გაკეთდებოდა. “ნაციონალებს”, ლოგიკით, ვაზაგაშვილი კი არა, ის მოწმე უნდა მოეცილებინათ, რომელსაც ახალი გარემოებები ექნება და სასამართლოზე წარსდგება.
- სიტყვამ მოიტანა და, ერთ-ერთი ჟურნალისტი აცხადებს, რომ აფეთქებამდე ნახევარი საათით ადრე იური ვაზაგაშვილს, რომელსაც მნიშვნელოვანი მოწმე უნდა შეეხვედრებინა, იმის დასაზუსტებლად დაურეკა, საღამოს 8 საათისთვის დაგეგმილი აუდიენცია ხომ არ გადაიდო...
- კი ბატონო, მაგრამ მოწმე ცოცხალია...
- ზემოხსენებული ჟურნალისტი ხაზს უსვამს, რომ ამ მოწმის ვინაობას ვეღარასოდეს გავიგებთ, რადგან მხოლოდ იური ვაზაგაშვილმა იცოდა...
- ზაქარია ქუცნაშვილი აცხადებს, რომ ამ მოწმის ვინაობა მისთვისაც ცნობილია. იურის ჩემი მეგობრები ძალიან ახლოს იცნობდნენ და, როგორც მათგან ვიცი, სიტუაციას არ მალავდა, ანუ გამორიცხულია, რომ ამ მოწმის შესახებ არავინ არაფერი იცოდეს...
- თუკი მიზანი არც მოწმის მოცილება იყო, აბა, ვაზაგაშვილი რატომ მოკლეს?
- ვანო, გითხარით და კიდევ ვიმეორებ: ეს მკვლელობა პოლიტიკური ტერაქტია.
- ეს გავიგე, მაგრამ პოლიტიკური ტერორის სამიზნე მაინცდამაინც შვილმოკლული მამა რატომ გახდა?
- იური ვაზაგაშვილს ხალხი პატივს სცემდა და, როგორც ვიცი, მისმა რეიტინგმა სახიფათო ზღვარს მიაღწია.
- ანუ?
- მას წონა არასამთავრობო სექტორშიც ჰქონდა. სხვათა შორის, “ქართული ოცნების” ხელისუფლებაში მოყვანაში იური ვაზაგაშვილის, ბუტა რობაქიძის მამის, ჯამბულ გამცემლიძის, გირგვლიანის ოჯახისა და სხვათა აქტიურობამ დიდი როლი ითამაშა. ამიტომაც ვფიქრობ, რომ ის, რაც მოხდა, პოლიტიკურ შედეგზე გათვლილი აქტია.
- “პოლიტიკურ შედეგში” რას გულისხმობთ?
- პოლიტიკურ შედეგს უცებ ვერ დავინახავთ...
სხვათა შორის, გამოძიება ცხელ კვალზე არ მოხდა...
- არ თუ ვერ მოხდა?
- უფრო ვერ მოხდა, რაც ან არაპროფესიონალიზმის, ან მიზანმიმართული ქმედების ან კიდევ იმის ბრალია, რომ ვაზაგაშვილის აფეთქება მკაცრი კონსპირაციის პირობებში, მაღალ დონეზე შესრულებული ტერაქტია!
- მსგავსი ტერაქტები ვისი ხელწერაა?
- სპეცსამსახურებისა და მათ მიერ სპეციალურად მომზადებული აგენტურის. საერთოდ, ასეთი მკვლელობებისკენ მიდრეკილება “გე-რე-უ”-ს აქვს.
ვანო, თუ გახსოვთ, რამდენიმე თვის წინ, აშშ-ის საელჩოსთან მომხდარ აფეთქებაზე ვისაუბრეთ, სადაც, ასევე, სასაფლაო ფიგურირებს. მაშინ ისიც გითხარით, რომ სპეცსამსახურის თანამშრომლებმა, როგორც ექსპერტს, ერთ-ერთი აუფეთქებელი ნაღმი მანახეს და საინტერესოა, ვაზაგაშვილიც ისეთივე ტიპის ნაღმით ხომ არ ააფეთქეს.
- დადგინდა, რომ აშშ-ის საელჩოსთან მომხდარი აფეთქების უკან “გე-რე-უ” იდგა?
- “გე-რე-უ”-ს აგენტების მოწყობილის შთაბეჭდილებას ტოვებდა, მაგრამ “ნაციონალებმა” “კოჭოას” და სხვებს აღიარებინეს, თუმცა მე თუ მკითხავთ, ბოლომდე გახსნილი არც ეგ საქმეა...
- ბატონო კოტე, რატომ ეჭვობთ, რომ პიროვნება, რომელმაც იური ვაზაგაშვილი ააფეთქა, საქართველოს დატოვებდა?
- მკვლელი საქართველოს ტერიტორიას მაშინ თუ არა, ცოტა ხნის მერე მაინც დატოვებდა...
- ასეთ შემთხვევებში, გამოძიება რითი იწყება?
- ნებისმიერი დანაშაულის დროს, გამოძიება შემთხვევის ადგილის დათვალიერებით იწყება, თუმცა შემთხვევის ადგილი მხოლოდ სასაფლაოს არ ნიშნავს. პანორამული, ანუ ერთკილომეტრიან რადიუსში მთელი პერიმეტრის დათვალიერება უნდა მომხდარიყო. ამასთან, ისეთი ობიექტებიც უნდა შემოწმებულიყო, საიდანაც შემთხვევის ადგილი კარგად ჩანს.
- ხელჩასაჭიდი რა შეიძლება გახდეს?
- ვთქვათ, ფეხის კვალი, სიგარეტის ნამწვი...
- სასაფლაოზე, როგორც წესი, უამრავი ადამიანი ირევა და, შესაბამისად, ფეხის კვალიც მრავლად იქნება და სიგარეტის ნამწვიც...
- კი ბატონო, მაგრამ ახლა მხოლოდ სასაფლაოზე არ ვლაპარაკობ... იმ პერიმეტრზე შეიძლება, მიტოვებული სახლიცაა. საერთოდ, ასეთი დანაშაულის დროს, დამნაშავეები ე.წ. სამეთვალყურეო სტაციონალურ პუნქტს არჩევენ, საიდანაც ვიზუალურ კონტროლს ანხორციელებენ... მოკლედ, ყველაფერი სპეცსამსახურების ხელწერაზე მიანიშნებს. ნაღმის დამონტაჟება ჩვეულებრივ დამნაშავეს არ შეუძლია და საამისოდ მას სპეციალური მომზადება უნდა ჰქონდეს გავლილი.
- მსგავსი ტერაქტების დროს კონტროლი იმიტომაა საჭირო, რომ შემსრულებელმა დამკვეთს სრული ინფორმაცია მიაწოდოს?
- კონტროლი იმისთვისაცაა საჭირო, რომ დამნაშავე დარწმუნდეს, კვალი ხომ არ დატოვა.
- ბატონო კონსტანტინე, ყველაფერი, ასე თუ ისე, გასაგებია, მაგრამ თუნდაც სპეცსამსახურებს იური ვაზაგაშვილის აფეთქება სხვაგანაც შეეძლოთ. რატომ მაინცდამაინც სასაფლაო?
- იმიტომ, რომ ეს აღვირახსნილი, თავზეხელაღებული ვანდალური აქტია, რასაც თავისი პოლიტიკური ნიშანი აქვს, ანუ ხალხი უნდა გაღიზიანდეს და ქუჩაში გამოვიდეს.
- დღეს ხალხის ქუჩაში გამოყვანა, როგორც ამბობენ, ხელს “ნაციონალებს” აძლევს. ამ კონტექსტში მიხეილ სააკაშვილის განცხადებაც საგულისხმოა, 2015 წელს საქართველოში დავბრუნდებიო...
- ამ ვერსიას არსებობის უფლება, რა თქმა უნდა, აქვს, მაგრამ არც ის უნდა გამოვრიცხოთ, რომ ყველაფერი იმ პოლიტიკური წრეებისგან მოდიოდეს, რომელთაც ხელისუფლებაში მოსვლის განზრახვა აქვთ. ასევე, იმ უცხო ქვეყნებისგან, რომელთაც საქართველოში პოლიტიკური დესტაბილიზაციის შექმნა აწყობთ.
- ეს უცხო ქვეყანა რომელია?
- რა თქმა უნდა, - რუსეთი.
- ბატონო კონსტანტინე, მუდმივად ამტკიცებთ, რომ სააკაშვილი რუსული პროექტია...
- დიახ...
- ესე იგი, რა გამოდის? - კრემლი საქართველოში საკუთარი ძალაუფლების აღდგენას ცდილობს, თუმცა ამბობენ, რომ უკვე აღიდგინა... მოკლედ, რუსეთი, სააკაშვილის ზემოხსენებული განცხადება, იური ვაზაგაშვილის აფეთქება - ყველაფერი ეს ერთი კონტექსტია?
- ამ ლოგიკას რომ გავყვეთ, გამოვა, რომ ყველაფრის უკან მიშა დგას.
- ამერიკელებს საქართველოში არეულობა აწყობთ?
- არც ამერიკელებს აწყობთ და არც - ევროპელებს... საერთოდ, როცა დანაშაული ხდება, მაშინვე ჩნდება შეკითხვა: ვის აწყობდა? თუკი იური ვაზაგაშვილის მკვლელობის საქმე გაიხსნა, ბუნებრივია, გამოჩნდება, ვისაც აწყობდა, მაგრამ ახლა ყველა ნიშანი არსებობს, რომ სპეცსამსახურში ამ საქმის გამხსნელი კაციშვილი არაა.
- მაშასადამე, ალექსანდრე ჭიკაიძე ყველაფერ ამას მიხვდა და ამიტომ გადადგა?
- მიხვდა, ან მიახვედრეს.
- ვის უნდა მიეხვედრებინა, ბიძინა ივანიშვილს?
- აბა, სხვა ვის უნდა მიეხვედრებინა? ყველაფერი ეს, პირველ რიგში, მის იმიჯს ურტყამს - ადამიანს ივანიშვილთან შეხვედრიდან 3-4 დღის შემდეგ, ასეთი ვანდალური ფორმით კლავენ. იცით, ეს რას ნიშნავს?
- პოლიტიკური მკვლელობები, როგორც წესი, არ იხსნება...
- ვაზაგაშვილის საქმის გახსნა ძალიან რთულია, მაგრამ შეუძლებელი არაა...
- თქვენ რომ იყოთ, გამოძიებას საიდან დაიწყებდით?
- მაგალითად, ძალიან მნიშვნელოვანი დეტალია ასაფეთქებელი საშუალების წარმომავლობა.
- ვთქვათ, დადგინდა, რომ ეს რუსული წარმოების ნაღმი იყო, ამით რა შეიცვლება? - რა, არ შეიძლება, რუსული ნაღმი ევროპის რომელიმე ქვეყანაში იყიდებოდეს?
- ასაფეთქებელი საშუალებები მაღაზიებში არ იყიდება. ნაღმის საზღვარზე შემოტანაც გამორიცხულია...
- შეიძლება, დილეტანტურ შეკითხვას ვსვამ, მაგრამ აფეთქებულ ნაღმზე ანაბეჭდები რჩება?
- როგორ ფიქრობთ, პროფესიონალი ანაბეჭდს დატოვებს?
ვანო, ედუარდ შევარდნაძეზე 1995 წლის ტერაქტის გამოძიება იცით, როგორ დაიწყეს?
- როგორ?
- პირველ რიგში, ნაღმის კლასიფიკაცია დადგინდა, ანუ მაშინ შევარდნაძე, სინამდვილეში, “მონ 100”, ანუ მიზანმიმართული მოქმედებების ნაღმით ააფეთქეს, მაგრამ გამოძიებამ საქმეში “მონ 90”, ასე ვთქვათ, გააჩინა.
- რატომ?
- იმიტომ, რომ გამოძიება იქით წაეყვანა, საითაც სურდა - მაშინ “მონ 90” მხოლოდ უშიშროების ორგანოებს ჰქონდათ, “მონ 100” კი, - თავდაცვის სამინისტროს. მოკლედ, დამნაშავეს სწორედ ნაღმის კვალით მიაგნეს.
- ესე იგი, თვლით, რომ გამოძიება დღესაც ნაღმის კვალს უნდა ჩაეჭიდოს?
- დიახ, უნდა დადგინდეს, ანალოგიური ასაფეთქებელი საშუალება ჩვენს შეიარაღებულ ძალებში არსებობს თუ არა. თუ არსებობს, მაშინ გაირკვეს, თავდაცვის სამინისტროს გარეთ როგორ მოხვდა - ვინ ჩამოწერა, როგორც პოლიგონზე გამოყენებული და ასე შემდეგ. ყველაფერ ამის დადგენაში მთელი შსს უნდა ჩართულიყო...
- ოფიციალური ინფორმაციით, ჩაერთო კიდეც...
- კარგი, რა?! ვიცი, როგორც ჩაერთო!..
- ვიღაცამ, სოციალურ ქსელში დაწერა, ძაღლი მაინც არ ჰყავდათ, კვალს დროზე რომ დასდგომოდნენო?..
- სწორედ ამიტომ ვამბობ, რომ დანაშაულისთვის კვალიფიკაციის მინიჭებას ძალიან დიდი მნიშვნელობა აქვს - როგორც კი გამოჩნდა, რომ ეს პოლიტიკური ტერორის აქტი იყო, მაშინვე გამოძიებაში სპეცსამსახური უნდა ჩართულიყო.
- გამოძიება ჯერჯერობით დამამძიმებელ გარემოებებში ჩადენილი განზრახ მკვლელობის მუხლით მიმდინარეობს...
- სწორედ ამიტომაა პროკურატურა დამნაშავე...
- თუ შეცდომა პროკურატურამ დაუშვა, წესით, შს მინისტრი კი არა, მთავარი პროკურორი უნდა გადამდგარიყო.
- დიახ, მთავარი პროკურორი უნდა გადადგეს! გეტყვით, შსს-ს რა უნდა განეხორციელებინა: შეემოწმებინა სამხედრო ნაწილებში აღრიცხული ასაფეთქებელი საშუალებები სამხედრო კონტრდაზვერვისა და სამხედრო პოლიციის ჩართვით ასევე, დაედგინა, იმ დღეებში საზღვრები ვინ გადალახ-გადმოლახა და მათ შორის ხომ არ იყვნენ სამხედროები, რუსეთის მოქალაქეები და ასე შემდეგ. ამასთან, უნდა დადგენილიყო, ვინ, როდის და რისთვის დაურეკა იური ვაზაგაშვილს. ადგილობრივი მოსახლეობაც უნდა გამოკითხულიყო...
- გავრცელებული ინფორმაციით, 30 ადგილობრივი დაკითხეს... ისე, თეორიულად რომ ვიმსჯელოთ, ის, ვინც ვაზაგაშვილს ბოლოს დაურეკა, შესაძლოა, დამნაშავეების მეკავშირე იყოს?
- თეორიულად გამორიცხული არაფერია და ამით მისი ადგილმდებარეობის განსაზღვრა მოხდა...
- მსგავს ტერაქტებში ახლობლები გარეულები არიან ხოლმე?
- შეიძლება, გარეული არ იყოს, მაგრამ ახლობლისგან მნიშვნელოვანი ინფორმაციის ამოღებაა შესაძლებელი!..
- ბატონო კონსტანტინე, წეღან აღნიშნეთ, რომ ვაზაგაშვილის აფეთქებასა და ირაკლი ალასანიას ბინაში ქურდის შესვლას შორის, შესაძლოა, კავშირი არსებობდეს. რას გულისხმობდით?
- ხელაღებით არაფერს ვამბობ, მაგრამ ხომ შეიძლება გაჩნდეს ვერსია, რომ ალასანიას ბინაშიც რამის დასადებად შევიდნენ, მაგრამ ხელი იმან შეუშალათ, რომ ოჯახის ერთ-ერთი წევრი შინ დაბრუნდა...
- ისე, ვრცელდება ინფორმაცია, რომ მკვლელობები კიდევ მოხდება...
- პიროვნება, ვისაც ეს ინფორმაცია აქვს, სასწრაფოდ უნდა დაიკითხოს. წინააღმდეგ შემთხვევაში, ეს დანაშაულის დაფარვა იქნება და მათ, ვინც მოსალოდნელ მკვლელობებზე რამე იციან, სისხლის სამართლის პასუხისმგებლობა უნდა დაეკისროთ.
- ჭიკაიძის პასუხისმგებლობა გადადგომით შემოიფარგლება თუ ისიც უნდა ახსნას, ადამიანები, რომლებსაც იური ვაზაგაშვილი ასახელებდა, შსს-ში რატომ მუშაობდნენ?
- კარგად გამიგეთ: ამ შემთხვევაში, პასუხისმგებლობა მხოლოდ ჭიკაიძეს კი არა, მთელ მთავრობას ეკისრება!
- იური ვაზაგაშვილის აფეთქება “ოცნებისთვის” “გირგვლიანი 2” ხომ არ გახდება?
- უკვე გამხდარია და ეგ არის! ვანო, რა, გგონიათ, რომ ეს საქმე უცებ გაიხსნება?
- გამოძიებაში, ვთქვათ, “ეფ-ბი-აი” ხომ არ უნდა ჩაერთოს?
- გამოძიებაში უდიდესი მნიშვნელობა ცხელ კვალს აქვს და ახლა, “ეფ-ბი-აი”-ს კი არა, საქმის გახსნა იმასაც გაუჭირდება, ვინმე მარსიდან რომ ჩამოვიყვანოთ!
- ერთი სიტყვით, ქვეყანაში კრიმინალი კარგად კი არა, ძალიან კარგადაა, არა?
- დიახ, ასე გამოდის...
- წინა ინტერვიუში, ბატონო კოტე, სომხეთში გამართულ “ქურდულ სხადნიაკზე” ვისაუბრეთ და მაშინ თქვით, რომ ქურდებმა საქართველოში სიტუაციის არევის დავალება მიიღეს. ვაზაგაშვილის აფეთქება ამ დავალების ნაწილი ხომ არაა?
- შეიძლება და ამის ნიშნებიც გამოჩნდება. ამიტომ ციხეების მართვა დღეს უმნიშვნელოვანესია და ძალოვანი უწყებები მოწოდების სიმაღლეზე უნდა იყვნენ...
ისე, ამ პოლიტიკურ ტერორში სიჩქარის მომენტებიც იკვეთება.
- სახელდობრ?
- ვფიქრობ, ვაზაგაშვილის ბოლო განცხადებებმა ტერაქტი დააჩქარა. საერთოდ, არ არსებობს დანაშაული, რომელიც კვალს არ ტოვებს. მთავარია, ძაფი სწორად “გამოიქაჩოს”...
- შესაძლოა, ისე მოხდეს, რომ გამოძიებამ 2006 წლის 2 მაისის სპეცოპერაციის დამგეგმავ-შემსრულებლებიდან ვინმე დაიჭიროს და თქვას, იური ვაზაგაშვილის აფეთქება გაიხსნაო?
- ამას საზოგადოების უმეტესობა არ დაიჯერებს.
- რატომ?
- იმიტომ, რომ პროკურატურამ არგუმენტირებული მტკიცებულებები უნდა წარმოადგინოს და თუ ასე არ მოხდება, ყველაფერი შეიძლება, უკან მიუტრიალდეს.
- სხვათა შორის, აცხადებდით, 2015 წლის თებერვლიდან ქვეყანაში დიდი ამბები დაიწყებაო. ეს ინფორმაცია საიდან გქონდათ?
- ყველაფერი ხელისგულზე დევს...
- თქვენ თუ დაინახეთ, სპეცსამსახური რას აკეთებდა?
- კარგი, რა?! სპეცსამსახურში ისეთები არიან, რომელთაც წარმოდგენა არ აქვთ, ტერორიზმი და კონტრდაზვერვა რა არის. სხვათა შორის, ამ უწყებაში სააკაშვილის საახლობლო ისევ მუშაობს, მაგალითად, ოთარ ქველიძის ახლობელი, ოთარ კუპრაშვილი კონტრდაზვერვის უფროსია. ქველიძე კი, მოგეხსენებათ, მიშას დაცვის უფროსი და ნდობით აღჭურვილი იყო... მირზოევი კი, რომელზეც ვაზაგაშვილი ლაპარაკობდა, კრიმინალური პოლიციის უფროსის მოადგილე გახლდათ და შემთხვევის ადგილას, წესით, პირველი სწორედ ადგილობრივი კრიმინალური პოლიცია უნდა მისულიყო. როცა კრიმინალურ პოლიციაში ისეთი ხალხია, რომელსაც ვაზაგაშვილი გულზე არ ეხატებოდა, წარმოგიდგენიათ, როგორ საგამოძიებო მოქმედებებს ჩაატარებდა...
- ასეა თუ ისე, მიზანმა საშუალება გაამართლა. ყოველ შემთხვევაში, იური ვაზაგაშვილის აფეთქებამ რამდენიმე მნიშვნელოვანი თემა გადაფარა, მაგალითად, ის, რომ სომხეთი საქართველოში 400-ზე მეტი ტაძრის სომხურად აღიარებას ითხოვს, თუმცა სომხეთის სამოციქულო ეკლესია განმარტავს, რომ ამ მოთხოვნის საქმის კურსში არაა...
- მდგომარეობა ყველა მიმართულებით იძაბება...
ვანო, ნუ გგონიათ, რომ რუსეთის ჩვენდამი მტრული დამოკიდებულება მხოლოდ პირდაპირი შეიარაღებული აგრესიაა. რუსულ სპეცსამსახურებს აგრესიისა და ძირგამომთხრელი საქმიანობის სხვადასხვა ფორმა აქვთ. მაგალითად, სტრატეგიული ობიექტების მითვისება, სხვადასხვა, მათ შორის, რელიგიურ და ძალოვან სექტორში თავიანთი აგენტურული ქსელის ამოქმედება. ვინც იცის, ქვეყანაში ოპერატიული ვითარება რას ნიშნავს, მიხვდება, თუ რაზე ვლაპარაკობ. ოპერატიული ვითარება რისკების განსაზღვრის საშუალებას იძლევა. როცა რისკები იცი, თავდაცვის მექანიზმებსაც შეიმუშავებ, მაგრამ ამ კუთხით სპეცსამსახური არც ადრე მუშაობდა და არც ახლა მუშაობს. ჩვენმა სპეცსამსახურმა, ელემენტარულად, უნდა იკითხოს, თუკი სომხური სამოციქულო ეკლესია ამბობს, რომ ზემოხსენებული მოთხოვნის შესახებ საქმის კურსში არაა, მაშინ მისი სახელით იუნესკო-ს ვინ მიმართავს? წესით, ჩვენს საპატრიარქოს სომხურ ეკლესიასთან კომუნიკაცია აქამდე უნდა დაემყარებინა და გაერკვია, რა ხდება... მოკლედ, ჩნდება შეკითხვა: ამ ეკლესიების მოთხოვნის უკან სხვა რამ ხომ არ დგას, მაგალითად, ეთნიკური სომხებით დასახლებულ რეგიონებში უკმაყოფილების გამოწვევა...
- თუკი ყველაფერ ამის უკან რუსული სპეცსამსახურები დგანან, ვაზაგაშვილის მკვლელობას და სომხური ეკლესიების მოთხოვნას ერთდროულად რატომ დაგეგმავდნენ? არეულობისთვის, რა, ერთი მოვლენა არაა საკმარისი?
- ყველა ბერკეტის ერთობლივი ამუშავება იმ შედეგს იძლევა, რომელიც რუსეთს უნდა!
- ყველაფერ ამის ბოლო რუსის ჯარის შემოსვლა იქნება?
- დღეს რუსეთის ჯარის შემოსვლა გამორიცხულია! რუსეთს ერთი მიზანი აქვს - საქართველოს ხელისუფლებაში თავისი ყურმოჭრილი მონების მოყვანის, რომლებიც მის ყველა სურვილს დააკმაყოფილებენ! მართალია, რუსულ ელემენტებს “ოცნებაც” შეიცავს, მაგრამ “ოცნება” რუსეთის ინტერესებს არ გაატარებს! არეულობა რომ დაიწყება, ახლადშექმნილი პოლიტიკური ჯგუფები და საზოგადოებისთვის ე.წ. ცნობადი სახეებიც გამოჩნდებიან, რომლებიც ახლა “მიყუჩებულნი” არიან. ისინი შესაბამის დაფინანსებასაც მიიღებენ...
- ქვეყანაში “ბეზპრედელი” დაიწყება?
- არა. უბრალოდ, პოლიტიკური დესტაბილიზაცია ხელისუფლებას აიძულებს, რომ ვადამდელი საპარლამენტო არჩევნები დანიშნოს. ისე, სიმართლე რომ ვთქვათ, ხელისუფლება დღეს პარალიზებულია და ყველაფერი, რაც ხდება, ბიძინა ივანიშვილის წინააღმდეგაა მიმართული!
დღევანდელ ხელისუფლებას სამგვარი უნიათობა სჭირს: არაფრის ცოდნა, იმის ცუდად ცოდნა, რაც იცის და ცოდნა იმისი, რაც არ უნდა იცოდეს!
- ბატონო კოტე, ისეთი პირი უჩანს, რომ ჩრდილოელ დათვთან პირისპირ მარტო დავრჩებით - აშშ-ს ჩვენთვის არ სცალია...
- აშშ-მ უკვე მიანიშნა, რომ სირიაში, ე.წ. ისლამური რესპუბლიკის წინააღმდეგ სახმელეთო ოპერაციას დაიწყებს. ვანო, ალბათ, გახსოვთ, “შარლი ებდოზე” მომხდარი ტერაქტის შემდეგ გითხარით, ეს ტრაგედია სახმელეთო ოპერაციის დაწყების საბაბი გახდება-მეთქი და ჩემი პროგნოზი ახდა. ეს ოპერაცია ახალ თავსატეხს გაგვიჩენს, რადგან “ისლამური სახელმწიფოს” მებრძოლები, იძულებულნი გახდებიან, სამშობლოში, ამ შემთხვევაში, საქართველოში დაბრუნდნენ...
- ბოლოს, კოტე ბატონო, ორი დღეა, ქვეყანას შს ახალი მინისტრი ჰყავს. ვახტანგ გომელაურზე რას ფიქრობთ?
- სხვათა შორის, თუ გახსოვთ, ჯერ კიდევ რამდენიმე თვის წინ ვთქვი, რომ ჭიკაიძეს ვახტანგ გომელაური შეცვლიდა და ეს პროგნოზიც ახდა... გომელაური პროფესიონალი და პატიოსანი კადრია...
