მსოფლიოში ტერორიზმის აჩრდილი დაძრწის! საფრთხე ჩვენთვისაც რეალურია - სხვა თუ არაფერი, რამდენიმე დღის წინ, ფრანგული სუპერმარკეტების ქსელ “კარფურის” ქართულ საიტზე ხაკერული შეტევა განხორციელდა. უცნობებმა საიტზე ასეთი გზავნილი დატოვეს: “ჩვენ ვართ მუსლიმები. ყურანი ჩვენი წიგნია! ღმერთის გვწამს და ღმერთისთვის ვმუშაობთ! წყეულიმც იყოს “შარლი ებდო!” ისლამი და ისლამისტები მუდამ დომინანტები იქნებიან! ისლამი სიმართლეა! ამიტომ არის ის ყველაზე სწრაფად ზრდადი რელიგია!” პარიზის მოვლენებზე საუბრისას, უშიშროების თადარიგის პოლკოვნიკი, უსაფრთხოების ექსპერტი კონსტანტინე ფორჩხიძე აქცენტს სირიაში მებრძოლ საქართველოს მოქალაქეებზე აკეთებს და არც იმას გამორიცხავს, რომ მალე დიდი საბრძოლო ოპერაციების მოწმენი გავხდეთ. მართალია, ქართველი სპეცსამსახურელი “ქართულ სიტყვასთან” საუბრისას ტერმინის - “მესამე მსოფლიო ომი” ხსენებას ერიდება, მაგრამ მიანიშნებს, რომ სამყარო ახალი გამოწვევის წინაშე დგას და ყველაფერ ამის საბაბი კი, ალი ჰომეინის მოძღვრებაა. საერთოდ, ფორჩხიძე თვლის, რომ პოლიტიკურ ისლამს საფუძველი ირანის 1979 წლის რევოლუციის მერე ჩაეყარა და მას შემდეგ ირანმა “პოლიტიკური ისლამის” ექსპორტი არაერთ ქვეყანაში, მათ შორის, საქართველოშიც განახორციელა. “იმის მაგივრად, რომ ჩვენი ხელისუფლება საზღვრების დაცვის პრევენციას ახდენდეს, სისხლის სამართლის კოდექსში იდიოტური ცვლილება შეაქვს”, - ამბობს ფორჩხიძე და გედევან ფოფხაძის ინიციატივას, რომლითაც პოლიციას ადამიანის გაჩხრეკვა ორდერის გარეშე შეეძლება, ადამიანის უფლებების დარღვევად აფასებს. მაშ ასე, რატომ გვაბრუნებს გ. ფოფხაძე შოთა კვირაიას საქართველოში და როგორ შეცვლის მსოფლიოს პარიზის ტერაქტი? - “ქართული სიტყვა” აგრძელებს სკანდალური ინტერვიუების ციკლს უშიშროების ყოფილ თანამშრომელთან.
კონსტანტინე ფორჩხიძე: - საერთოდ, ვთვლი, რომ პარიზის ტერაქტი 2001 წლის 11 სექტემბრის გამოძახილია და მსოფლიო ტერორიზმის საფრთხის წინაშე კიდევ ერთხელ დადგა. სხვათა შორის, სწორედ ამ საფრთხეს, ანუ 11 სექტემბერს მოჰყვა ავღანეთში ე.წ. აი-სა-ფი-ს ოპერაცია. ახლო აღმოსავლეთში მოვლენები ახლაც, ალბათ, ანალოგიური სცენარით განვითარდება. ახლო აღმოსავლეთი კი, ავღანეთისგან განსხვავებით, ერთი სახელმწიფოს საზღვრებში არაა მოქცეული. ახლო აღმოსავლეთი თურქებით, არაბებით, ირანელებითა თუ ქურთებითაა დასახლებული, ანუ ჭრელია და ამიტომ, შესაძლოა, დიდი ომი დაიწყოს, რომელიც მხოლოდ იმ პრევენციული ღონისძიებებით არ შემოიფარგლება, რომელსაც აქამდე დასავლეთი ტერორიზმის წინააღმდეგ აწარმოებდა.
- ამ ომში რომელი სახელმწიფოები ჩაერთვებიან?
- რომელი და, - გერმანიის გამოკლებით, მთელი დასავლეთი.
- ორივე მსოფლიო ომი გერმანიამ დაიწყო და ახლა ომისგან თავს რატომღა შეიკავებს?
- გერმანელები პრაგმატულები არიან, თან გერმანიაში 10 მილიონზე მეტი თურქული წარმოშობის ადამიანი ცხოვრობს...
- ესე იგი, მსოფლიო მესამე ომის საშიშროების წინაშე დგას?
- ასე ვერ ვიტყვი. ეს უფრო ტერორიზმის წინააღმდეგ განხორციელებული სახმელეთო ოპერაციები იქნება, რომელიც ძირითადად, ახლო აღმოსავლეთში გაიშლება.
- ამ სახმელეთო ოპერაციების ლოკომოტივი, ცხადია, აშშ იქნება, არა?
- დიახ. სხვათა შორის, არ მგონია, რომ რუსეთი ამ ოპერაციების მიღმა დარჩეს, მით უმეტეს, არსებობს ინფორმაცია, რომ რუსებმა, პარიზის ტერაქტის მერე, სომხეთში, გიუმრის ბაზა სამხედრო მზადყოფნაში მოიყვანეს. უნდა გავითვალისწინოთ, რომ ეს ბაზა კონფლიქტის ზონასთან ძალიან ახლოსაა - სომხეთიდან სირია არცთუ შორსაა, თან რუსებს ერთი ბაზა სირიაშიც აქვთ, რომელიც ბაშარ ასადის რეჟიმის დამცველად ითვლება.
- ბატონო კოტე, სიტყვამ მოიტანა და, რუსეთს სირიაზე გავლენა რისთვის სჭირდება?
- იმისთვის, რომ ახლო აღმოსავლეთში თავისი პოლიტიკა გაატაროს. სირია საკვანძო ქვეყანაა და ამიტომ აქამდე საფრანგეთიც ფრთხილად ეკიდებოდა - სირიაში სახმელეთო ოპერაციის წინააღმდეგი იყო, მაგრამ პარიზის მოვლენების მერე, ვფიქრობ, ყველაფერი შეიცვლება. ყოველ შემთხვევაში, საფრანგეთი დარწმუნდა, რომ ის ბოროტება, რომელმაც ამ დღეებში ევროპაში იფეთქა, დაუსჯელი არ უნდა დარჩეს და პარიზში მოწყობილი ე.წ. ერთიანობის მარშიც სწორედ ამაზე მიანიშნებს.
- ყველაფერი ეს გასაგებია, მაგრამ ზოგი თვლის, რომ ტერაქტი პროვოცირებული იყო, ანუ “შარლი ებდოს” შეურაცხმყოფელი კარიკატურები რომ არ გამოექვეყნებინა, სისხლი არ დაიღვრებოდა...
- ამ ჟურნალში მხოლოდ მუჰამედის კი არა, რომის პაპის და სხვა რელიგიური თუ პოლიტიკური მოღვაწეების კარიკატურებიც იბეჭდება, ანუ პარიზის ტერაქტი, ერთი შეხედვით, თავისუფალი სიტყვის წინააღმდეგ მიმართული სისხლიანი აქციაა, მაგრამ თუ პრობლემის სიღრმეებში ჩავალთ და ყველაფერს გლობალურ კონტექსტში განვიხილავთ, მაშინ შეიძლება, ვთქვათ, რომ პარიზის მოვლენებმა ბიძგი დიდი პროცესების დასაწყისს მისცეს. სწორედ ამიტომაა სიფრთხილე საჭირო და ყველა ღონისძიება, მათ შორის, პრევენციულიც სიფრთხილით უნდა გატარდეს, რადგან ყველაფერი შეიძლება, გლობალურ კატასტროფამდე მივიდეს!
- თუკი ამ გლობალურ სახმელეთო ოპერაციაში, რომელიც ტერორიზმის აღმოფხვრის საბაბით დაიწყება, მონაწილეობას რუსეთიც მიიღებს, ჩვენ რა საფრთხის წინაშე დავდგებით?
- საქართველოს ტერიტორიაზე, კერძოდ, ცხინვალსა და სოხუმში რუსეთის ორი სამხედრო ბაზაა, ამას დავამატოთ წეღან ნახსენები გიუმრის ბაზაც. ასევე, უნდა გავითვალისწინოთ, რომ ე.წ. ისლამური სახელმწიფოს არმიის 50 პროცენტი ჩრდილოეთ კავკასიელებითაა დაკომპლექტებული და იმ შემთხვევაში, თუკი ახლო აღმოსავლეთში სახმელეთო ოპერაციები დაიწყება, ეს მებრძოლები საქართველოსკენ დაიძვრებიან.
- რატომ?
- რატომ და, - ჩრდილოეთ კავკასიაში საქართველოს გავლით დაბრუნდებიან.
- ეს სცენარი კრემლის ინტერესშია?
- არ გამოვრიცხავ, რომ კრემლს ამ კატეგორიის ხალხის გამოჩენა აწყობდეს, რადგან შემდეგ, ტერორიზმთან ბრძოლის საბაბით, საქართველოში გარკვეული ოპერატიული ღონისძიებები გაატაროს.
- ანუ, სავსებით რეალურია, რომ ე.წ. ლაფანყურის მოვლენები განმეორდეს?
- დიახ, დაახლოებით, ასეთ ოპერაციას უნდა ველოდოთ...
ვანო, ყველაფერი, რაც დღეს მსოფლიოში ტერორიზმის კუთხით ხდება, ჩემი აზრით, იმ სახელმწიფოსგან იმართება, სადაც მე-20 საუკუნის 70-იან წლებში ისლამის ფუნდამენტალურმა ფრთამ, ანუ პოლიტიკურმა ისლამმა გაიმარჯვა.
- რას გულისხმობთ?
- რას და, - 1979 წლის ირანის რევოლუციას, როცა სახელმწიფო სათავეში ფუნდამენტალისტები მოვიდნენ. ირანულ სახელმწიფოს ლაიტმოტივად ალი ჰომეინის სიტყვები გასდევს.
- ჰომეინმა ასეთი რა თქვა?
- “ისლამური სწავლება ძირითადად ადამიანის ცხოვრების პოლიტიკურ მხარეს გულისხმობს, რელიგიურს კი, - ნაკლებად”, - ამბობდა ჰომეინი და ამით საფუძველი პოლიტიკურ ისლამს თუ არა, მის ერთ-ერთ მიმდინარეობას ჩაუყარა.
- პოლიტიკური ისლამი რა არის?
- პოლიტიკაში რელიგიის ჩარევა და ძალდატანება.
- ვერ გავიგე, რა თქვით...
- რელიგიურ მრწამსს, ანუ შიიტურ ფუნდამენტალიზმს ირანელებსაც ახვევენ - 1979 წლის რევოლუციის შემდეგ, ირანში ისეთი რიტუალები დამკვიდრდა, რაც ადრე ისლამისთვის უცხო იყო და ყველაფერ ამას ისლამური მოსახლეობა “დეჯბარს” ეძახის. “დეჯბარი” კი, ძალდატანებას ნიშნავს.
- “დეჯბარი” რას ემსახურება, ანუ ყველაფერ ამის, ასე ვთქვათ, შლეიფი დიდი ფული ხომ არაა?
- საგულისხმოა, რომ ირანში ორგანიზაცია “ისლამური რესპუბლიკის კორპუსის მცველები” არსებობს. სწორედ ეს ორგანიზაციაა დღევანდელი ირანის ხელისუფლების საყრდენი და მთელი ფინანსური ბერკეტი, დაახლოებით, 55 მილიარდი დოლარი მთლიანად ამ კორპუსის წევრების ხელშია. ამ თანხის 20 პროცენტი ირანის გარეთ სხვადასხვა ენერგეტიკული პროექტის განხორციელებას ხმარდება. ამის ნათელი მაგალითია ყაზახეთში სანტუდინსკის ჰესი, რომლის მშენებლობაშიც ძალიან დიდი ირანული ინვესტიცია ჩაიდო. მოკლედ, იმის თქმა მინდა, რომ ასეთი ინვესტიციებით ირანი, მსოფლიო მასშტაბით, პოლიტიკური ისლამის ექსპორტს ანხორციელებს.
- პოლიტიკური ისლამის ექსპორტის მთავარი მიზანი რა არის?
- ირანი ცდილობს, რეგიონში ზესახელმწიფო და მუსულმანური რელიგიის ცენტრი გახდეს...
სხვათა შორის, ჩვენმა მეზობელმა ქვეყანამ, აზერბაიჯანმა ეს საფრთხე თავიდანვე იგრძნო და იქ ფუნდამენტალიზმი, პრაქტიკულად, არ არსებობს, რასაც ვერ ვიტყვით საქართველოს მუსულმანებით დასახლებულ რეგიონებზე, თუნდაც, აჭარასა და პანკისზე. მოკლედ, აზერბაიჯანმა, ირანის პოლიტიკური ექსპანსიისგან თავი რომ დაეცვა, შესაბამისი საკანონმდებლო ბაზა მიიღო - თუ სულიერი მოღვაწე აზერბაიჯანელი არაა, უფლება არ აქვს, ქვეყნის ტერიტორიაზე იქადაგოს და რელიგიური მოღვაწეობა აწარმოოს.
- ბატონო კოტე, იმის თქმა გინდათ, რომ მსგავსი კანონი საქართველომაც უნდა მიიღოს?
- არ ვიცი....
- ისე, საგულისხმოა, რომ მიხეილ სააკაშვილმა, თუ არ ვცდები, 2010 წელს, ირანთან უვიზო მიმოსვლა შემოიღო...
- დიახ. წინა ინტერვიუებში უკვე ვისაუბრეთ, ამაზე ამერიკელებმა რამხელა აჟიოტაჟიც ატეხეს. ვანო, თუ გახსოვს, ირანელები საქართველოს ინვესტიციებს ძირითადად საბანკო და ენერგოსფეროში სთავაზობდნენ...
- “ნაციონალებს” თავი პროამერიკელებად მოაქვთ. აშშ-ს ირანი, რბილად რომ ვთქვათ, გულზე არ ეხატება. ამ ფონზე, საქართველოს ყოფილი ხელისუფლება ირანთან უვიზო მიმოსვლას იწყებს. ეს რაზე მეტყველებს?
- სწორედ ეს აჩენს შეკითხვებს და თავის დროზე სააკაშვილის ამ ნაბიჯის გამო აშშ-ის სახელმწიფო დეპარტამენტმაც შეშფოთება გამოთქვა.
- თქვენი ვარაუდით, სააკაშვილმა ეს ნაბიჯი რატომ გადადგა?
- მიშა გრძნობდა, რომ ხელისუფლებას კარგავდა და ამით ამერიკელებთან ვაჭრობა დაიწყო...
- მაშასადამე, საზღვრის გახსნას საქართველოში ტერორიზმის ფარული დასაყრდენის გაჩენა მოჰყვა?
- გამორიცხული არაფერია და თუკი ასეთი ფარული ორგანიზაციები არსებობს, არავინ იცის, ისინი როდის ამოქმედდებიან.
სხვათა შორის, ამ თემატიკასთან შეხება, ჩემი სამსახურეობრივი მდგომარეობიდან გამომდინარე, თავის დროზე მქონდა, მაგრამ არც მაშინ და, ალბათ, არც ახლა, ყურადღებას არავინ აქცევს, რომ საქართველოს აზერბაიჯანელი მოსახლეობა გარკვეულ მომზადებას ქალაქ ყუმში გადის, მერე კი, საქართველოში ბრუნდება და რელიგიურ მოღვაწეობას ეწევა.
ვანო, ადრე ისიც გითხარით, რომ თბილისის ჯუმა მეჩეთში, მესამე სართულზე, სუნიტური მედრესე ფუნქციონირებდა, სარდაფში კი, - შიიტური, რაც წარმოუდგენელია. ყველაფერ ამან კი, საქართველოში პოლიტიკური ისლამი შემოიტანა.
- ესე იგი, საქართველოში ტერორიზმის ექსპორტის საფრთხე რეალურია?
- რა თქმა უნდა. თუკი სირიაში სახმელეთო ოპერაცია დაიწყება, იმ 20 თუ 30 ათასმა ადამიანმა, რომელიც, ძირითადად, საბჭოთა იარაღითაა აღჭურვილი, არ მგონია, წინააღმდეგობის გაწევა დიდხანს მოახერხოს. საბოლოოდ, ყველაფერი იმით დამთავრდება, რომ ეს ხალხი გაიბნევა. ომისგან ტრამვირებული ადამიანები კი, ტერორიზმის კუთხით, საშიშები არიან, თან იმასაც გააჩნია, სირიიდან წასვლას სად გადაწყვეტენ. უნდა ვივარაუდოთ, რომ სამშობლოში დაბრუნდებიან, რაც ცუდი მხოლოდ საქართველოსთვის კი არა, რუსეთისთვისაც იქნება, რადგან როგორც აღვნიშნე, ე.წ. ისლამური სახელმწიფოს მებრძოლთა 40 პროცენტი ჩრდილოკავკასიელია...
- სხვათა შორის, რამდენიმე თვის წინ, პანკისელი თარხან ბათირაშვილი, რომელიც, სხვათა შორის, ქისტი კი არა, ქართველია და დღეს “ისლამური სახელმწიფოს” ერთ-ერთ ლიდერად ითვლება, რუსეთს დაემუქრა. მაშინ ისიც ითქვა, რომ ბათირაშვილმა მამამისს თითქოს ტელეფონით აცნობა, რომ თანამებრძოლებთან ერთად, საქართველოში დაბრუნებას აპირებს. ბათირაშვილის ეს განცხადება, ბატონო კოტე, მგონი, თქვენს ანალიზში ჯდება...
- ყველაფერი, რა თქმა უნდა, ერთმანეთთან კავშირშია. საერთოდ, ტერორიზმი ძალიან გლობალური საკითხია და მის გაანალიზებას სრული სურათის წარმოდგენა სჭირდება, თუმცა იმის სრული აღწერა, რაც დღეს ახლო აღმოსავლეთში ხდება, მხოლოდ მე კი არა, ერთ სპეცსამსახურსაც არ შეუძლია. ჩვენ, ყველანი, ფრაგმენტულად ვმსჯელობთ... საქართველო დიდი აღმოსავლეთის ნაწილია და თუკი იქ სერიოზული ჯახი დაიწყება, ეს გვერდს ჩვენც არ აგვივლის.
- ესე იგი, ერთ დღეს თბილისი და საქართველოს სხვა დიდი ქალაქები შესაძლოა, ტერაქტების ალში გაეხვიოს?
- შესაძლებელია... ვანო, მოდით, ამას სხვა კუთხით შევხედოთ.
- რომელი კუთხით?
- ჯერ ერთი, ცალსახად არ უნდა ვთქვათ, რომ ეს საფრთხე ისლამისგან მოდის და ამას რამდენიმე წლის წინ ნორვეგიაში მომხდარი ტერაქტიც ადასტურებს - ბრეივიკი მუსულმანი არაა. მეორეც, ტერორიზმისგან ისეთი ქვეყნებიც არ არიან დაცულნი, მაგალითად, როგორიც აშშ და თუნდაც საფრანგეთია. ამ ფონზე რა გარანტია გვაქვს, რომ ჩვენთან არაფერი მოხდება.
სხვათა შორის, ირანს პოტენციურ მოწინააღმდეგედ მხოლოდ აშშ კი არა, ისრაელიც თვლის. მეტიც, ებრაელები ღიად ამბობენ, რომ ბოროტების სათავე ირანია...
- ტერორისტების სამიზნე, როგორც წესი, ხალხმრავალი ადგილებია. საქართველოში კი, ასეთი ადგილი საზოგადოებრივი ტრანსპორტია, მაგალითად, მეტრო. მაშასადამე, მეტროთი მგზავრობას ვერიდოთ?
- ასე ვერ ვიტყვით, რადგან ტერორიზმის სამიზნე შეიძლება, სტრატეგიული ობიექტები და ამერიკელების გაკეთებული ლუგარის ლაბორატორიაც გახდეს.
- ტერორისტებმა იერიში შეიძლება, იმ ქართველ პოლიტიკოსზეც მიიტანონ, რომელიც საქართველოს ნატო-სა და ევროკავშირში ინტეგრაციას აქტიურად ითხოვს?
- ადვილი შესაძლებელია, თუმცა ყველაფერი იმაზეა დამოკიდებული, საქართველო ამ სიტუაციაში ჩათრეული რამდენად აღმოჩნდება. ისე, თარხან ბათირაშვილის მომენტიდან გამომდინარე, ამ პროცესში, გვინდა თუ არა, უკვე ჩართულები ვართ - ბათირაშვილი საქართველოს მოქალაქეა და ამან ქვეყანას შესაძლოა, დიდი ზიანი მიაყენოს. ამიტომ, სახელმწიფო სტრუქტურებმა პრევენციაზე ფიქრი დღესვე უნდა დაიწყონ.
- პრევენციაში რას გულისხმობთ?
- პირველ რიგში, სასაზღვრო ზოლის კონტროლსა და იმ ადამიანთა ოჯახების ოპერატიულ მეთვალყურეობას, რომლებიც სირიაში იბრძვიან, თუმცა ეს იმას როდი ნიშნავს, რომ ვინმეს უფლებები შეიზღუდება.
ცვლილებები, ალბათ, ეროვნული უსაფრთხოების კონცეფციაშიც უნდა შევიდეს, რომელიც კრიზისულ სიტუაციებში ქვეყნის ძირითადი დოქტრინაა, თუმცა ხელისუფლება აბსოლუტურად არაადექვატურად იქცევა და ცვლილებები, მაგალითად, სისხლის სამართლის კოდექსში შეაქვს, ანუ მარტივად რომ ვთქვა, ხელისუფლება ადამიანის უფლებების დაცვის კი არა, შეზღუდვისკენ მიდის.
- ამას რატომ ამბობთ?
- უფლების შეზღუდვაა, აბა, რა არის, როცა სამართალდამცავს, თუკი სახეზე არ მოვეწონები, უფლება ეძლევა, გამჩხრიკოს?!
- გედევან ფოფხაძის ინიციატივას გულისხმობთ, რომლის თანახმადაც, პოლიციას, გადაუდებელი აუცილებლობის დროს, ჩხრეკის ჩატარება ორდერის გარეშე შეეძლება?
- დიახ. საერთოდ, ჩხრეკა სამძებრო-ოპერატიული ღონისძიებების ერთ-ერთი ხერხია და ვინმემ მითხრას, ამაზე იურიდიული დოკუმენტი რატომ არ უნდა შედგეს?
- ფოფხაძის თქმით, დოკუმენტის შედგენა სამართალდამცავებს დროს დააკარგვინებთ...
- ფოფხაძე სპეცსამსახურის წარმომადგენელი არ არის...
- სამაგიეროდ, პარლამენტის ადამიანის უფლებათა დაცვის კომიტეტის თავმჯდომარის მოადგილეა...
- ფოფხაძე კი არა, ჯობია, ის გამოვიდეს და ილაპარაკოს, ვის ტვინშიც ყველაფერი ეს დაიბადა. მსგავსი იდეა “ნაცმოძრაობასაც” არ მოსვლია. კი ბატონო, ადამიანებს მაშინაც ჩხრეკდნენ, მაგრამ იურიდიული დოკუმენტის შედგენას კანონი მაინც ითხოვდა...
- ისე, ბატონო კოტე, უცნაურია: თქვენ, ყოფილი სპეცსამსახურელი ძალოვანებისთვის უფლებების გაზრდას აპროტესტებთ, უფლებადამცველი ფოფხაძე კი, ვენებს იხსნის, ჩხრეკის ოქმის შედგენა რა საჭიროაო...
- სპეცსამსახურის უპირველესი მოვალეობა მოქალაქეების უსაფრთხოების დაცვაა, თან ეს უსაფრთხოება ისე უნდა მოხდეს, რომ ადამიანის უფლებები არ დაირღვეს. სწორედ ეს წერია ადამიანის უფლებების ევროპულ ქარტიაში. ფოფხაძის ინიციატივას კი, შეიძლება, ის მოჰყვეს, რომ აბსოლუტურად უდანაშაულო ადამიანი ქუჩაში გააჩერონ და ჯიბეში “გრანატამიოტი” უპოვონ, თან ისე, რომ ამაზე ჩხრეკის ოქმიც არ შეადგინონ. არასამთავრობო სექტორმა, რომელიც მოსმენებზე წიკვინებდა, ერთი ამბავი სწორედ ამაზე უნდა ატეხოს, მაგრამ ხმას არ იღებს.
- ხელისუფლებას მსგავსი ცვლილებები რისთვის სჭირდება?
- არ ვიცი, ეს ხელისუფლებას ჰკითხეთ... ისიც საკითხავია, ყველაფერი ეს ხელისუფლებას სჭირდება თუ ვინმე სხვას?
- ეს “ვინმე სხვა” ვინაა?
- არც ეგ ვიცი, მაგრამ დამიჯერეთ, ამ ცვლილების დაკანონებას ხალხის უკმაყოფილება და ერთი ვაი-ვიში მოჰყვება. ასეთი კანონები იმიტომ ხომ არ იწერება, რომ ვიღაცას ხალხის ქუჩაში გამოყვანა უნდა? ისეთი პარლამენტი და ხელისუფლება არ მჭირდება, რომელიც ხალხის საწინააღმდეგო ნაბიჯებს დგამს და ადამიანის უფლებებს ზღუდავს!
აშშ-ის კონსტიტუციაში პირდაპირ წერია, რომ თუკი საკანონმდებლო ორგანო ისეთ კანონს მიიღებს, რომელიც ადამიანის უფლებებს ზღუდავს, ამერიკელ ხალხს აჯანყებისა და რევოლუციური გამოსვლის უფლება აქვს! ხალხს რევოლუციისკენ რატომ უბიძგებენ? რას ჰქვია, ვიღაც ოპერმუშაკმა იურიდიული დოკუმენტის შედგენაში დრო არ უნდა დაკარგოს? თუ ამას იმიტომ აკეთებენ, რომ წერა-კითხვა არ იციან, მაშინ გაყარონ და ისინი მიიღონ, ვინც მხოლოდ წერა-კითხვა კი არა, მუშაობაც იცის! თუ ადამიანზე არ არსებობს კონკრეტული ინფორმაცია, რომ კანონდარღვევას სჩადის, ვთქვათ, იარაღს უკანონოდ ატარებს, ქუჩაში რა უფლებით უნდა გააჩერონ?! ფოფხაძე 90-იან წლებში, შოთა კვირაიას “რეიდების” პერიოდში გვაბრუნებს თუ როგორაა მაგის საქმე? თუ ეს საკანონმდებლო ინიციატივაა და შსს თვლის, რომ მისთვის აუცილებელია, ვიღაც ფოფხაძემ კი არ უნდა ილაპარაკოს, შსს თვითონ უნდა გამოვიდეს და დაასაბუთოს...
- ფოფხაძე ვიღაც კი არა, დეპუტატია, თან ის დეპუტატი, რომელმაც უმრავლესობა დაშლისგან იხსნა!
- ფოფხაძე ჩემთვის ვიღაცაა! როგორ შეიძლება, ადამიანი, რომელსაც თავში ასეთი სისულელე მოსდის, დეპუტატი იყოს? ყველაფერი ეს უსისტემობაზე, არაპროფესიონალიზმსა და უნიათობაზე მეტყველებს, თორემ შესაბამისი გზები და საშუალებები არსებობს, რითიც შეიძლება, ადამიანზე ინფორმაცია მიიღონ და დანაშაულის პრევენცია მოახდინონ. ის კი, რასაც ვიღაც ფოფხაძე ამბობს, პრევენცია არაა! დიახ, ფოფხაძე ადამიანის უფლებების შეზღუდვის დაკანონებას ითხოვს და ეს შეზღუდვა, თავისი მნიშვნელობით, მოსმენასა და გარე მეთვალყურეობაზე ნაკლები არაა!
ისე, დააკვირდით, ეს იდეა ფოფხაძემ ახალი წლის დღეებში გაახმოვანა, რადგან ამ პერიოდში საზოგადოება ნაკლებად აქტიურია და, როგორც ჩანს, სურს ეს ცვლილება მალე დააკანონოს! მაინტერესებს, შს მინისტრის მოადგილე ლევან იზორია, რომელიც თავის დროზე ხალხს ადამიანის უფლებების დაცვაზე ორიენტირებული სისტემის შექმნას პირდებოდა, ახლა ჩუმად რატომაა? რა, ეს ინიციატივა ადამიანის უფლებების დაცვისკენაა მიმართული? ადამიანები, სკამებზე რომ სხდებიან, იცვლებიან! სხვათა შორის, მათგან განსხვავებით, რასაც ადრე ვაკეთებდი, ახლაც იმას ვაკეთებ და მთელი ჩემი უბედურებისა თუ ბედნიერების მიზეზი ისაა, რომ სისტემაში მუშაობისას ადამიანის უფლება ერთხელაც არ დამირღვევია!
- ბატონო კონსტანტინე, საქართველოში ანტიტერორისტული ცენტრი ხომ ფუნქციონირებს?
- გლობალური ცენტრი, როგორც ვიცი, არ არსებობს, ამ კუთხით შსს-ს დანაყოფს კი, ირაკლი ჩიმაკაძე ხელმძღვანელობს.
- ასეა თუ ისე, ვერ გავიგე, ტერორიზმით ფული როგორ კეთდება? ისე, თქვენი ინფორმაციით, კონკრეტული დავალების შესრულებაში ტერორისტი გასამრჯელოს იღებს?
- რა თქმა უნდა... ტერორისტებს სპეციალურ ბანაკებში ამზადებენ.
სხვათა შორის, ისლამურის გარდა, სხვა სახის ტერორიზმიც არსებობს, მაგალითად, ე.წ. ნაცისტების მიმდინარეობა.
- ეს რომელია?
- ვთქვათ, ბრეივიკი, რომელმაც ნორვეგიაში უდანაშაულო ახალგაზრდები დახოცა. საერთოდ, მოტივაციის მორგება ძალიან ადვილია. ისე, განვითარებული და მოაზროვნე ადამიანები ტერორისტები იშვიათად ხდებიან. სამაგიეროდ, საამისოდ კარგი, ასე ვთქვათ, მასალა ფსიქიკურად ჩამოუყალიბებელი პიროვნებაა.
- საგულისხმოა, რომ ქრისტიანობა ტერორიზმის საბაბი არ ხდება...
- როგორ გეკადრებათ? აბა, კუკლუს კლანი რა იყო?
- კუკლუს კლანი უფრო მაფიოზური გაერთიანება იყო...
- კი ბატონო, მაგრამ საფუძვლად მაინც რელიგია ედო... ისე, ადამიანების მოკვლას არც ქრისტიანობა ქადაგებს და არც - მაჰმადიანობა. ისლამში ეს მიმდინარეობა, როგორც გითხარით, მე-20 საუკუნის 70-იან წლებში გაჩნდა...
- ტერორისტები, როგორ წესი, საბჭოთა წარმოების იარაღს იყენებენ. რატომ?
- იმიტომ, რომ აქაც ფულის ინტერესია.
- ანუ?
- ვანო, წინა ინტერვიუებში გითხარით, საბჭოთა კავშირი ჰამასსა და პალესტინელ ტერორისტებს იარაღით როგორ ამარაგებდა და ეს საკითხი, სხვათა შორის, პოლიტბიურის დონეზე წყდებოდა. იარაღის თითქმის ყველა ბარონი ყოფილი საბჭოთა სივრციდანაა...
მოკლედ, ტერორიზმით დიდი კი არა, ძალიან დიდი ფული კეთდება! ტერორიზმი ჩვეულებრივი მაფიაა.
- რომლის წარმომადგენლებიც პოლიტიკაშიც არიან, არა?
- რა თქმა უნდა...
- ისე, არსებობს ინფორმაცია, რომ პარიზის ტერაქტამდე პოლიციას გარკვეული ინფორმაცია ჰქონდა. თუკი ასე იყო, აბა, ტერაქტი რატომ არ აღკვეთა?
- საერთოდ, ძალიან საინტერესო დეტალებია, თუცა ვიდრე გამოძიება არ დამთავრდება, დასკვნების გაკეთება არ შეიძლება...
- მსოფლიო მედიამ განსაკუთრებული აქცენტი ორლანდის საახალწლო მილოცვაზე გააკეთა, რამდენიმე დღეში კი, პარიზში ტერაქტი მოხდა, ანუ ტერაქტი ვიღაცას თუნდაც იმიტომ ხომ არ აწყობდა, რომ მესამე მსოფლიო ომი დაიწყოს?
- საკითხს ასე ვერ შევხედავთ. ადამიანების სიკვდილი არავის უხარია, მაგრამ პოლიტიკაში ასეთი რაღაცებიც ხდება...
- ...ქუჩაში ტერორისტის ამოცნობა შეგვიძლია?
- (იღიმება) გულუბრყვილო შეკითხვაა... სხვათა შორის, საბჭოთა კავშირის დროს, 70-იან წლებში, მოსკოვის მეტროში დიდი ტერორისტული აქტი მოხდა და, როგორც ვიცი, ტერორისტები დაიჭირეს. პარიზის ტერაქტი კი, ჯიჰადის ტიპურ ნამოქმედარს არ ჰგავს.
- ამას იმიტომ ამბობთ, რომ ტერორისტები თვითმკვლელები არ იყვნენ?
- თუნდაც... პარიზის ტერაქტი გარკვეული მესიჯია, რასაც გაგრძელება აუცილებლად მოჰყვება...
